Tayta Dioslla salvakuq kanqan
43
Jacobpita aywaraq Israel runakuna, kamashuqniki Tayta Diosmi nishunki:“Ama mantsariyaytsu.
Noqapa kayaptikimi jutikikunapa qayarnin qamkunata salvashqä.
2 Jondu mayukunata tsimpayaptikipis qamkunawanmi kaykäshä.
Mayjina jakashqa karpis manami apayäshunkitsu.
Nina chawpinpa päsayaptikipis manami rupayäshunkitsu.
Manami qashpayllapis qashpayäshunkitsu.
3 “Noqami salvashuqniki Tayta Dios kä.
Israel runakunapa santu Diosninmi kä.
Qamkunata salvamurmi Egipto runakunata castigarqä.
Tsaynöllami Etiopía y Seba nación runakunatapis trokiki ñakayänanpä churarqä.
4 Qamkunata pasaypami kuyä.
Imaykapitapis masmi väliyanki.
Tsaymi trokiki wanuyänanpä juk nación runakunata churarqä.
5 “Qamkunawan kaykaptïqa ama mantsariyaytsu.
Rupay yarqamunan kaqläpitami kutitsiyämushayki.
Rupay jeqanan kaqläpitapis qoriyämushaykimi.
6 Nortitapis y surtapis nishä:
‘¡Wamräkunata ama tsararäkuyaytsu!
¡Mayjina karucho tsarararpis ollquta warmitapis kutitsiyämuy!
7 ¡Noqata adoramaqkunata llapanta kutitsiyämuy!
Munanqänö kawar alabayämänanpämi kamashqä.
Kikïmi paykunata rurashqä’.
8 “Kuyanqä runakuna, qapranö, upanö karpis shayämuy.
9 Maytsay nacionkunacho y markakunacho taq runakunapis, shayämuy.
Mä niyämay: Adorayanqayki mayqan ïdulupis ima päsananpä kanqanta ¿willakushqatsurä?
Willakushqa kaptinqa testïgukuna mä niyätsun.
Tsay ïdulukuna willakuyanqanta mä pillapis parlakamutsun”.
10 Kuyanqan runakunata Tayta Diosmi nin:
“Qamkunami testïgükuna kayanki.
Akranqä sirvimaqnïkunami kayanki.
Qamkunata akrashqä reqiyämänaykipä, yärakayämänaykipä y japallä Dios kanqäta tantiyakuyänaykipämi.
Imaypitapis noqallami Dios kä.
Noqapita mas juk Diosqa manami kantsu.
11 “Noqami Tayta Dios kä.
Noqapita masqa manami pipis salvakuq kantsu.†
12 Salvanäpä kanqanta willakatsirqa salvashqämi.
Juk nacionkunapa diosnin manami imaypis salvayäshushqaykitsu.
Japallä Dios kanqätami testïgu kayanki.
13 “Imaypitapis noqallami Dios kaykä.
Makïpita manami pipis qeshpintsu.
Imata rurayta munaptïpis manami pipis tsapata churapämantsu”.
14 Salvashuqniki karmi Israel runakunapa santu Tayta Diosnin niyäshunki:
“Qamkunata salvayäshunaykipämi soldädukunata Babiloniaman kachashä.
Tsay soldädukuna atacayaptinmi Babiloniaa runakuna yärakuyanqan büquinkunawan qeshpir aywakuyanqa.
15 Noqaqa santu Tayta Diosnikikunami kä.
Israel nacionta kamashqa karmi mandaqniki rey kä.
16 “Noqaqa Tayta Diosmi kä.
Lamar chawpinpami nänita rurarqä.
Pulchaqyaykaq yaku chawpinpami cällitanö rurarqä.†
17 Nirkurmi atska carrëtankunawan y cawallunkunawan Israel runakunata qatipämuq soldädukunata ushakätsirqä.
Ushakätsiptï manami imaypis kawariyämushqatsu.
Aktsi upiqnömi llapanpis illakäyashqa.
18 “Kananqa unay päsanqankunata amana yarparäyaynatsu.
19 Noqaqa mushuqtanami rurashä.
Manaräpis unaytami salvashä.
¡Tantiyakuyay! ¡Qallaykushqänami!
Salvarmi nacionninman jäkuq tsaki nänipa kutitsimushä.
Imapis mana kanqan tsaki jirkachömi mayukunata yuritsimushä.
20 “Tsaymi jirka uywakunapis agradëcikayämanqa.
Chacalkunapis y avestruzkunapis kushishqami alabayämanqa.
Akranqä runakuna upuyänanpämi tsaki jirkacho mayukunata yuritsishä.†
21 Tsay runakunata kikïpämi rurarqä.
Alabayämänanpämi paykunata kamarqä.
22 “Jacobpita aywaraq Israel runakuna, yanapanäpä manami mañakayämashqaykitsu.
Mana cäsukamarmi jaqiriykayämashqayki.
23 Manami tsaki mikuy ofrendata apayämunaykipä obligayashqätsu.
Manami inciensiuwan cada rätu qoshnitsiyänaykipäpis obligayashqätsu.
Sacrificiupä uywakunata apamurpis manami shonqüpänötsu apayämushqayki.
24 Manami mushkuq jachatapis rantipäyämashqaykitsu ni uywakunapa wirantapis rupatsipäyämashqaykitsu.
Tsaypa trokinqa jutsata rurarmi pasaypa ajayätsiyämashqayki.
Mana allikunata rurarmi pasaypa rabyanätsiyämashqayki.
25 “Tsaynö kayaptikipis qamkunata kuyarmi llapan jutsaykikunapita perdonayäshayki.
Perdonaskirqa manami imaypis yarpäshänatsu.
26 Imallapitapis noqapita qallayashqa karqa mä niyämay.
Jutsaynaq kayanqaykita yarparqa mä niyämay.
27 Unay castayki Jacobpis jutsatami rurarqan.
Yachatsishuqnikikunapis manami cäsukayämashqatsu.
28 Tsaymi sacerdötikikunatapis templüpita qarqushqä.
Qamkunatapis castigaptïmi pïmaypis maldicionayäshunki”.