Jukllaylla Tayta Dios kanqan
44
“Jacobpita aywaraq sirvimaqnïkuna, akranqä Israel runakuna, shumaq wiyayämay.2 Kamashuqniki Tayta Dios karmi nï:
Jacobpita aywaraq sirvimaqnïkuna, ama mantsariyaytsu.
Jesurún runakuna,a † akrakuynïkunami kaykäyanki.
Mamaykipa pachanchömi qamkunata kamashqä.
Qamkunata yanapanäpämi kaykä.
3 Tsunyaq jirkakunachöpis noqami yakuta pashtatsimushä.
Tsaki pampakunapapis mayunörä yaku aywananpämi kamakätsishä.
Qamkunapita aywaraqkunamanmi Espïritüta kachamushä.
Paykunami bendicionnïta chaskiyanqa.
4 Qewa lloqllurrä wiñaqnömi kayanqa.
Mayu kuchunkunacho sauci verdiraqnörämi kayanqa.†
5 Wakinmi niyanqa: ‘Kikin Tayta Diospami kä’
Wakinnami jutinkuna Jacob kananpä churakuyanqa.
Wakin kaqnami makinkunaman jutïta qellqayanqa.
Israeltami jutinkunatapis churakuyanqa”.
6 Israel runakunata salvaq rey y llapanta mandaq Tayta Diosmi nin:
“Noqami qallanan y ushanan kaykä.†
Noqapita mas juk Dios manami kantsu.
7 ¿Pillaqa noqanö kantsurä?
Karqa mä shamur nimätsun.
Ima päsananpä kaqtapis ¿pillaqa unaypita patsa parlashqatsurä?
Mä ima päsananpä kaqtapis willayäshuy.
8 “Ama mantsariyaytsu.
Unaypita patsami qamkunata willashqä ima päsananpä kaqtapis.
Qamkunami testïgükuna kaykäyanki.
Noqapita masqa manami juk Dios kantsu.
Manami juk masqa kantsu tsapäyäshunaykipä.
Mas jukta manami reqïtsu”.
Ïdulu adoray upa ruray kanqan
9 Ïdulukunata ruraqkuna† manami imapäpis väliyantsu.
Mayjina kuyayllapäta rurayanqanpis manami välintsu.
Ïduluta adoraqkunaqa yarpayniynaqmi kaykäyan.
Kikinkunapis penqakurmi kayanqa.
10 Diosnin kananpä ïduluta rurarqa tiempunkunatami oqrayan.
11 Ïdulu ruraqpis manami Diostsu, sinöqa runallami.
Tsaymi ïduluta ruraqpis y adoraqpis juzgaptï pasaypa mantsarir penqakuyanqa.
12 Maski yarpachakushun herrëru imanö ïduluta ruranqantapis.
Fiërrutami carboncho alli pukayanqanyaq wayllätsin.
Nirkurmi combawan cincelwan takaykällar munanqannö kananpä ruran.
Tsaynö arur mallaqaptinmi kallpanpis ushakan.
Yakullatapis mana upurqa pasaypami aywapakan.
13 Carpintërupis metrunwanmi qeruta tupun.
Imanö rurananpäpis läpizwanmi dibujan.
Formonwan takapayllapami llaqllanpis.
Shumaq yarqunanpämi compaswan dibujan.
Tsaynöpami tsay ïduluta kuyayllapä runatanö ruran.
Rurayta ushaskirnami ïdulupä rurayanqan wayiman churayan.
14 Wakin runami cedruta, cipresta y encinata mutuskir ïduluta ruratsinanpä apamun.
Wakinnami pïnuta plantan tamyawan wiñarkuptin ïduluta ruratsinanpä.
15 Tsay apamunqan jachakunapa troncunpita ïduluta ruraykurmi ñöpanman qonqurikun.
Sobraq kaqtami yantapä tseqtan.
Wakin yantawanmi qoñukunanpä ninata tsaritsin.
Wakin yantawanmi masarananpä jornuta tsaritsin.
16 Wakin yantawannami ninata tsariskatsir aytsata kankan pacha junta mikunanpä.
Ninacho mashakurmi nin:
“Nina ñöpanqa maypis jamaräkuy munaymi qoñun”.
17 Ïduluta tsaynö ruraykurmi ñöpanman qonqurikun.
Tsaycho adorarmi mañakur nin:
“¡Qammi diosnï kanki! ¡Salvaykallämay!”
18 Tsay runakunaqa manami musyayantsu ni cuentatapis qokuyantsu.
Imayka ñawin wichqashqanö karmi tantiyakuyantsu manakaqta rurayanqanta.
19 Tantiyakuyänanpäpis manami juiciunkuna kantsu.
Manami shumaq yarpachakuyantsu.
Shumaq yarpachakurqa niyanman:
“Pullan kaq qerutami tullpaman waykushqä.
Shanshanchönami tantata kuwashqä.
Tsaychömi aytsatapis kankaskir mikushqä.
Tsaypita sobraq kaqwan manami ïduluta rurämantsu.
Jachapita mutunqä taksha kulluman manami qonqurikümantsu”.
20 Ïduluta adoraqkunaqa uchpata mikuqnömi mana tantiyakuq kayan.
Llutanta yarparmi tsaynö rurayan.
Manami tantiyantsu derëcha makincho aptaraykanqan ïdulu mana väliq kanqanta.
Israel runakunata Tayta Dios perdonar salvanqan
21 “Jacobpita aywaraq Israel runakuna, tsay ninqäkunata ama qonqäyaytsu.
Qamkunaqa sirvimaqnïmi kaykäyanki.
Noqami qamkunata kamashqä.
¡Ama qonqayämaytsu!
22 Llapan jutsaykikunapitami perdonashqä.
Pukutayta illakätsiqnömi jutsaykikunata illakätsishqä.
Qamkunata salvaykaptïqa noqaman yapay yärakayämuy”.
23 Ciëlu, ¡Tayta Dios salvakuq kanqanpita kushikur cantay!
¡Patsa rurincho kaqkunapis, vivar qayaräyay!
¡Jirkakuna, pasaypa kushikur jinchi cantayay!
¡Muntikuna, llapayki kushikur cantayay!
¡Jacobpita aywaraq Israel runakunatami Tayta Dios salvashqa!
¡Munayyuq kanqantami musyatsimushqa!
24 Israel runakuna, mamaykipa pachancho kamashuqniki y salvashuqniki Tayta Diosmi nishunki:
“Noqami imaykatapis kamaq Tayta Dios kä.
Ciëlutapis kikï kamarmi mashtamushqä.
Pipis mana yanapaykämaptinmi kay patsatapis kamashqä.
25 “Llulla profëtakuna willakuyanqannö mana kamakänanpämi tsapata churä.
Adivïnukunatapis noqami penqakuyman churä.
Yachaqkuna llutanta yätsiyänanpäpis yarpayninta noqami pantakätsï.
Niyanqankuna mana välinanpäpis noqami kamakätsï.†
26 Sirvimaqnï willakunqantami itsanqa cumplitsï.
Willakuqnïkuna niyanqannö kananpämi kamakätsï.
Jerusaléncho runakuna yapay täyänanpäpis noqami nï.
Judácho markakuna raqällana kaykäyanqanpita yapay markata shäritsiyänanpäpis noqami kamakätsï.
27 Noqa niptïqa lamar yakupis tsakiskinmi.
Noqami mayukunatapis tsakitsï.
28 “Noqami rey Cirupä nï:
‘Üsha mitsiqnï karmi llapan munanqäta ruranqa’.
Tsaymi Jerusalénta Ciro yapay allitsatsinqa.
Tsaynöllami templupa cimientunta pirqatsinqa”.†