Rey Cirupä Tayta Dios willakatsinqan
45
Cirutami Tayta Dios nin:“Qamtami akrashqä rey kanaykipä.
Makipita jancharkurmi yanapashayki nacionkunata munaynikicho tsararänaykipä,
munayyuq reykunata ushakätsinaykipä
y marka punkutapis kichapäyäshunaykipä.
Tsay punkutaqa manami pipis wichqapäshunkitsu.
2 Kikïmi ñöpaykita aywar altunnin jirkakunatapis pampatsashä.
Bronci punkukunatapis pakirmi ushashä.
Fiërru trancakunatapis chipyaqmi ushashä.
3 Chaniyuq tesörukunatami kamaripäshayki.
Pakaraykaq riquëzakunatami qoykushayki.
Tsaynöpami musyanki Israel runakunata kuyaq Tayta Dios kanqäta.
Tsaynöllami musyanki jutikipa kikï qayanqäta.
4 “Sirvimaqnï Jacobta kuyarmi y akranqä Israel runakuna raykuqmi mana reqiykämaptikipis jutikipa qayar qamta akrashqä.
5 Noqami Tayta Dios kä.
Noqapita mas juk Diosqa manami kantsu.
Mana sirviykämaptikipis puëdiq chölu kanaykipämi yanapashayki.
6 Tsaynö yanapashayki kay patsapa juk kuchunpita jukaq kuchunyaqpis noqalla Tayta Dios kanqäta pïmaypis musyayänanpämi.
Noqami Tayta Dios kä.
Noqapita mas juk Diosqa manami kantsu.
7 Noqami kamakätsï junaq kananpä y paqas kananpäpis.
Noqami kamakätsï bendición kananpä o desgracia kananpäpis.
Noqa Tayta Diosmi llapan tsaykunata kamakätsï”.
Tayta Dios kamakuq kanqan
8 “Ciëlu kichakätsun.
Pukutaypita tamyamuqnö kay patsaman salvación chämutsun.
Kay patsacho salvaciontapis y alli kawaytapis chaskikuyätsun.
Noqa Tayta Diosmi tsaynö kananpä kamakätsï.
9 “¡Allaw, imanörä kayanqa kamakuqninwan churakaqkuna!
Qamkuna mitu mankanölla kaykarqa manka ruraqta ‘¿imanirtä kay niraqta ruraykämanki?’ ¿niyankimantsurä?
‘Mana allitami ruramashqayki’ ¿niyankimantsurä?†
10 Wamrapis manami taytanta y mamanta ‘¿imapätä rurayämarqayki?’ ninmantsu”.
11 Kamaqnin kar Israel runakunapa santu Tayta Diosninmi nin:
“Wamräkuna kayaptikimi munanqänö qamkunata wätä.
Imanö wätanqäpitapis ¿jamuräyämankimantsurä?
Qamkunata waray warantin imanö rikanäpäpis ¿yätsiyämankimantsurä?
12 “Noqami patsata kamashqä.
Tsaycho täyänanpämi runatapis kamashqä.
Ciëlutapis makïwan mashtaskirmi llapan qoyllurkunatapis tsayman churashqä.
13 Noqami rey Cirutapis llapanta vincinanpä yanapashä.
Llapan ruranqankunapis alli kananpämi kamakätsishä.
Paymi Jerusalén markäta allitsatsinqa.
Prësu apayanqan Israel runakunatapis päguta mana cobrayllapami kachämunqa”.
Llapanta mandaq Tayta Diosmi tsaynö nin.
14 Israel runakunatami Tayta Dios nin:
“Egipto runakunapa y Etiopía runakunapa riquëzankuna qamkunapanami kanqa.
Sabá nacionpita jatusaq runakunapis makikichömi kayanqa.
Paykunaqa cadënawan watashqami qepaykita shayämunqa.
Ñöpaykiman qonqurikuykurmi kuyapäyänaykipä niyäshunki:
‘Rasunpaypami Tayta Dios yanapaykäyäshunki.
Paypita mas juk Diosqa manami kantsu’ ”.
15 Tayta Dios, Israel runakunata salvaq y mana rikakaq Diosmi kaykanki.
16 Ïduluta ruraqkunaqa llapanmi penqakuyanqa.†
17 Noqakunatami itsanqa salvayämanki.
Salvayämaptikimi chikimaqnïkuna imaypis manakaqman churayämanqanatsu.
18 Tayta Diosmi ciëluta kamashqa.
Kay patsatapis kamarmi shumaq takyätsishqa.
Manami manakaqpätsu kamashqa, sinöqa runakuna täyänanpämi.
Paymi nin:
“Noqami Tayta Dios kä.
Noqapita mas juk Diosqa manami kantsu.
19 Manami tsakaqninman ni pakapanman aywaykurtsu imatapis parlä.
Jacobpita aywaraqkuna manami manakaqllapä ashiyämänanpätsu nï.
Noqa Tayta Diosqa rasun kaqllatami parlä.
Alli kaqllatami musyatsï”.
Ïdulukunata manakaqman churanqan
20 “Juk nación runakuna mana tantiyarmi qerupita rurashqa ïdulunkunata umrushqa puritsiyan.
Mana salvaykaptinpis tsaykunatami mañakuyan.
Tsay runakunatami nï:
Qamkunata tapunäpä qorikaskir shayämuy.
21 Imata yarpäyanqaykitapis mä niyämay.
Kikikikunapurapis mä tapunakuyay.
¿Pitä unaypita patsa nirqan kanan kanqannö imapis päsananpä kanqanta?
¿Manaku noqa Tayta Dios tsaykunata willarqä?
Noqapita mas juk Diosqa manami kantsu.
Noqapita mas juk manami kantsu allillata ruraq y imapitapis salvaq.
22 “Patsapa kuchuncho taqkunapis, cäsukamar yärakayämay.
Yärakayämaptikiqa salvayäshaykimi.
Noqallami Dios kä.
Noqapita mas juk Diosqa manami kantsu.
23 Llapanpis ñöpämanmi qonqurikayämunqa.
Llapanpis cäsukayämänanpämi niyämanqa.
Tsaynö kananpä kanqanta kikïpa jutïchömi jurashqä.
Imatapis kamakätsinäpä nirqa mana qonqaypami kamakätsï.†
24 “Tsaymi runakuna niyanqa:
‘Munayyuq Tayta Diosllami salvamaqnintsik’.
Contran rikakuqkunami itsanqa paypa ñöpancho penqakushqa kayanqa.
25 Tayta Dios salvaptinmi Israel runakuna pay munanqannö kushishqa kawayanqa”.