Babilonia nacionpa diosninkuna Tayta Diosman mana tinkunqan
46
Bel dios vincishqami kaykan.Nebo diospis manakaqman churashqami kaykan.a
Tsay diosninkunatami cawallunkunaman chaqnakurkur apayan.
Tsaykuna pasaypa lasarmi utikätsiyan.†
2 Tsay ïdulukunaqa ishkirpis manami shäriyantsu.
Yärakuyanqan runakunatapis manami salvayantsu.
Tsay runakunata ïdulunkunatawanmi juklä nacionman prësu apayan.
3 Tayta Diosmi nin:
“Jacobpita aywaraq Israel runakuna, wiyayämay.
Mamaykipa pachancho kayanqaykipita patsami qamkunata rikashqä.
Yuriyanqayki junaqpitami marqashqa puritsishqä.
4 Awkinyäyaptikipis tsaynöllami rikayäshayki.
Pasaypa soquyashqatapis yanapayäshaykimi.
Qamkunata noqami kamashqä.
Maypa pusharpis rikayäshaykimi.
5 “¿Imamanrä tinkutsiyämanki?
¿Pirä noqanö kanman?
6 Wakin runakunami qoritawan qellayta balanzacho pësarkur ïdulu ruraqta pägayan ïduluta rurapänanpä.
Rurapaskiptinnami tsay ïdulupa ñöpanman qonqurikuykur adorayan.
7 Umrukurkur aparmi jamaränanpä kaqman jamatsiyan.
Jamatsiyanqanpitaqa manami kuyukuntsu.
Tsay ïduluqa mayjina rugakuyaptinpis manami salvantsu.†
8 “Mana wiyakuq runakuna, tsayta tantiyakur penqakuyay.
9 Unaypita patsa castaykikunata imanö yanapanqätapis yarpäyay.
Noqallami Dios kä.
Noqapita mas juk Diosqa manami kantsu.
Manami ima ïdulupis noqaman tinkuntsu.
10 Noqami unaypita patsa ima kananpä kaqtapis willakatsï.
Imapis päsananpä atska wata pishiykaptinmi musyatsï.
Ruranäpä yarpanqätaqa llapantami rurä.
11 “Rupay yarqamunan kaqläpitami juk runata qayashqä.
Aytsapä mallaqashqa condornömi karu nacionpita shamunqa.
Ninqäta rurananpämi tsay runata pushamushä.
Yarpanqänöllami llapantapis rurashä.
12 “Salvanäpä kaqta mana criyiqkuna, wiyayämay.
13 Karu nacioncho kayanqaykipitami kutitsiyämushayki.
Qorimunäpä ichikllanami pishiykan.
Sióncho täyänaykipämi kutitsiyämushayki.
Kuyanqä Israel runakuna kayaptikimi salvayäshayki”.