Babilonia ushakänanpä ninqan
47
Tayta Diosmi nin:“Babilonia nación, trönucho jamaraykanqaykipita yarqur patsamanna jamakuy.†
Mananami pipis kuyayllapä kanqaykita niyäshunkinatsu.
2 Wätay warminöllana maraycho machkayki aqakuy.
Shukutaraykanqayki jakuykita jipiyna.
Chankaykikuna rikakanqanyaq träjikita qarikurkur mayukunatapis tsimpay.
3 Qallapächu kaptikimi penqaynikita pïmaypis rikanqa.
Llutanta ruranqaykipita castigaptï manami pipis salvashunkitsu”.
4 Tsaynömi nin Israel runakunapa santu Tayta Diosnin.
Paymi salvamaqnintsik.
Paypa jutinmi llapanta mandaq Yahweh.
5 “Babilonia nación, tsakaqman yaykuskir upällalla jamaräkuy.
Mananami pipis ‘nacionkunapa mandaqnin reina’ nishunkinatsu.
6 “Kuyanqä Israel runakuna ajanätsiyämaptinmi makikiman churarqä.
Castiganaykipä niptïmi pasaypa ñakatsishqayki.
Awkinkunatapis alläpa lasaq yüguta matankätsiqnömi mana kuyapaypa ñakatsishqayki.
7 Imayyaqpis reinalla kanaykipä kanqanta yarparmi llutanta ruraykanqaykitapis tantiyakushqaykitsu.
Ushakänaykipä kaqta manami imaypis yarpashqaykitsu.
8 “Babilonia marka, shumaq wiyamay.
Trönuncho mana yarpachakuypa jamaraq warminö karmi shonqullaykicho nikanki:
‘Manami pipis noqanö kantsu.
Manami imaypis viüdayäshätsu ni wawaynaqpis kashätsu’.
9 Tsaynö nikarpis illaqpitami juk junaqllacho viüdapis y wawaynaqpis rikakunki.†
Tsay junaqqa brüjuykikunapis ni suerti qatiqnikikunapis ima ruraytapis manami kamäpakuyanqatsu.
10 “Mana allikunata rurarmi pipis mana rikashunqaykita yarpashqayki.
Musyaq yachaq kanqaykita yarparmi pantakashqayki.
Shonquykichömi nirqayki pipis qamnö mana kanqanta.
11 Tsaynö niptikipis illaqpitami desgracia päsashunki.
Tsaypita manami imanö salvakuytapis kamäpakunkinatsu.
Tsay desgracia shamuptinmi chipyaq ushakanki.
12 “Unaypita brüju kayta yachakunqaykinölla sïguir ima desgraciallapitapis mä qeshpinkikush.
Brüju kayta sïguir mä pillataqa mantsaritsinkikush.
13 Yätsishuqnikikuna yätsishunqaykitapis ajayashqaykinami.
Cada killa imanö kayänaykipä kaqtapis willayäshunaykipä qoyllur estudiaqkunapis manami kayannatsu.
Kanan mä salvayäshunaykipä shayämutsun.
14 “Qamqa yarpanki tsay runakuna mashakuyänaykipä shanshanö kayanqantami.
Tsaynö yarpaptikipis manami tsaynötsu kanqa, sinöqa nina ushananpä oqshanöllami kayan.
Tsaymi Tayta Diospa castïgunpita imanöpapis qeshpiyta kamäpakuyanqatsu.
15 Wamra kanqaykipita patsa suertita qatitsikunqayki brüjuykikunapis ushakäyanqami.
Kawaq kaqkuna qeshpir aywakuyaptin manami pipis salvashunaykipä kanqatsu”.