Israel runakuna mana wiyakuq kayanqan
48
Jacobpita aywaraq Israel runakuna, ninqäta wiyayämay.Qamkunaqa Tayta Diospa jutinchömi imatapis awniykäyanki.
Tsaynöllami nikäyanki kuyashuqniki Diosta sirviyanqaykita.
Tsaynö nirpis janan shonqullami paypa jutinta joqariykäyanki.
2 Qamkunaqa nikäyanki sagrädu Jerusaléncho täyarnin kushikuyanqaykitami.
Tsaynöllami nikäyanki kuyashuqniki Tayta Diosman yärakuyanqaykita.
Paypa jutinqa llapanta mandaq Yahwehmi.
3 Tayta Diosmi nin:
“Imapis manarä päsaptinmi päsananpä kaqkunata willakatsirqä.
Willakatsinqänöllami llapanpis illaqpita päsashqa.
4 Musyämi rumi shonqu kayanqaykita, kunkaykikunapis fiërrunö chukru kanqanta y urkuykikunapis broncinö chukru kanqanta.
5 Tsaynö kayaptikimi päsananpä kaqkunata unayna willakatsirqä.
Willakatsinqänö päsaptinmi tantiyayanki takaypa y fundiypa ruratsiyanqayki ïdulukuna ima päsananpä kaqtapis mana musyayanqanta.
6 Willakatsinqänö kanqanta musyaykar y rikaykarqa ¿imanirtä tantiyayankitsu rasun kaqta nikanqäta?
“Kanan mastapis musyatsiyäshayki.
Tsayqa mana musyayanqayki kaqkunami kaykan.
7 Tsayta imaypis manami yarpäyashqaykitsu ni wiyayashqaykitsu.
Tsaymi ‘tsaytaqa unaynami musyarqä’ niyankitsu.
8 Tsaytaqa manami imaypis wiyayashqaykirätsu.
Kananyaqpis manami musyayashqaykirätsu.
“Qamkunaqa yuriyanqaykipita patsami mana wiyakuq kayashqayki.
Kullu rinri karmi ïdulukunata adorar imaypis cäsukayämashqaykitsu.
9 Tsaynö kayaptikipis adorayämänayki raykuqmi rabyanarpis awantakushqä.
Alabayämänayki kaptinmi pacienciakur qamkunata illakätsishqätsu.
10 “Mana illakätsirpis qamkunata ñakatsishqämi.
Jornucho tsullutsir qellaypa qanranta jipiqnömi jutsaykikunapita mayllashqä.
11 Juk dioskunata adorayänaykipa trokin noqata adoramänaykipämi tsaynö perdonashqä.
Manami munätsu juk dioskunata adorar manakaqman churayämänaykita”.†
Kuyanqan runakunata salvananpä Tayta Dios ninqan
12 “Jacobpita aywaraq runakuna, cäsukayämay.
Qayanqä Israel runakuna, wiyayämay.
Noqallami Dios kä.
Unaypita patsa imayyaqpis Diosmi kaykä.†
13 Makïwanmi kay patsata kamashqä.
Derëcha kaq maki paltäwanmi ciëlutapis tupushqä.
Jutinta niykuptillämi llapanpis yuriskiyarqan.
14 “Llapaykikuna qorikar shumaq wiyayämay.
Persia nacionpa mandaqnin rey Cirutami akrashqä munanqäta rurananpä.
Paymi yarpanqänö Babilonia nación runakunata ushakätsinqa.
Tsayta manami mayqan ïdulupis musyashqatsu ni willakushqatsu.
15 “Noqami Ciruta qayaykamur kachashqä.
Tsaymi llapanta rurananpä yanapashä.
16 Llapaykikuna witiyämuy tsay ninqäta wiyayänaykipä.
Unaypita patsami tsaynö kananpä kaqta willashqä.
Rikaraykaptïmi llapanpis ninqänölla kanqa”.
Tayta Dios tsaynö ninqanta willakunäpämi Espïritunta noqaman kachamushqa.
17 Salvashuqniki kar Israel runakunapa santu Tayta Diosninmi niyäshunki:
“Noqami Tayta Diosnikikuna kaykä.
Noqami alli kaqkunata yachatsir munanqänö kawayänaykipä alli nänipa pushä.
18 Mandamientükunata cäsukurqa kushikuychömi kawayankiman karqan.
Alli kawayanqaykiqa mayu mana tsakiypa aywaqnömi kanman karqan.
Lamar pulchaqyanqan qatinayllaman aywaqnömi allillata imaypis rurayankiman karqan.
19 Lamar kuchuncho aqushanörämi qampita aywaraqkuna yupaytapis mana atipaypä kayanman karqan.†
Manami imaypis qamkunata ushakätsïmantsu karqan.
Ñöpäpitapis manami qarqümantsu karqan”.
20 ¡Babiloniapita qeshpir aywakuyay!†
¡Salvakuyanqaykita maytsaychöpis kushishqa willakuyay!
Willakur niyay:
“¡Sirviqnin Jacobpita aywaraqkunata Tayta Diosmi salvashqa!
21 Tsunyaqpa pushamuptinpis manami yakunäyarqantsu.
Mana yakunäyänanpämi qaqapita tsaytsika yakuta pashtatsimurqan”.†
22 Tsaynö kaptinpis Tayta Diosmi nin:
“Mana alli runakunaqa manami imaypis kushikuycho kawayanqatsu”.†