Tayta Diosta sirviq kanqan
49
Costacho kaykaq nación runakuna, wiyayämay.Karu nacionkunacho taq runakuna, ninqäta shumaq tantiyakuyay.
Manaräpis yuriptïmi Tayta Dios qayamarqan.
Mamäpa pachallanchörä kaykaptillärämi jutï churapämarqan.†
2 Parlanqäpis alli afilashqa espädanö kananpämi kamakätsishqa.†
Makinwanmi imaykapitapis tsapämashqa.
Llawchi punta flëchanö kanäpämi churamashqa.
Flëchanta puritsikunanman wiñashqanömi kaykä.
3 Paymi nimarqan:
“Sirvimaqnï Israelmi kanki.
Sirvimaptikimi maytsaychöpis alabashqa kashä”.
4 Tsaynö nikämaptinpis mana tantiyakuypami nirqä:
“Manakaqllapämi Diostapis sirvishqä.
Manakaqllapämi kallpätapis ushashqä.
Tsaynö karpis Tayta Diospa makinchömi kaykä.
Paymi sirvinqäpita yanapamanqa”.
5 Mamäpa pachallanchörä kaykaptïmi sirviqnin kanäpä Tayta Dios akramarqan.
Paymi churamarqan Israel runakunata paywan amistatsinäpä.
Tayta Diosnï kuyamarmi yanapaykäman.
6 Paymi nimashqa:
“Manami Jacobpita aywaraq runakunawan amistatsimänallaykipätsu akrashqä.
Maytsay nacionkunapäpis aktsi kanaykipämi churashqä.†
Tsaynöpami maytsaychöpis runakuna salvakuyanqa”.†
7 Llapan nación runakunami chikiyäman.
Mandaq runakunami munaynincho tsararäyäman.
Tsaynö kaptinpis Israel runakunata salvaq santu Tayta Diosmi niman:
“Reykunapis y mandashiqninkunapis ñöpaykimanmi qonqurikayämunqa.
Tsaynö qonqurikayämunqa qamta akrashqa kaptï y awninqäta imaypis cumpliptïmi.
Israel runakunapa santu Tayta Diosnin karmi tsaynö kananpä kamakätsishä”.
Jerusalén allitsakänanpä ninqan
8 Tayta Diosmi sirviqninta nin:
“Kuyapänäpä kaq höra chämuptinmi rugakamanqaykinö yanapashqä.†
Salvanäpä kaq junaqmi qamta salvashqä.
Noqami imaypis tsapäshayki.
Runakunawan pactuta ruranäpämi churashayki.
Tsaynöpami Israel nacionta unay kanqanmannöna tikratsinki.
Jaqirishqa chakrakunatapis duëñunkunatami kutitsinki.
9 “Tsaymi prësunö kaykaqkunatapis ‘yarqayämuy’ ninki.
Tsakäpakushqanö kaykaqkunatapis ‘atsikyaqman yarqayämuy’ ninki.
Paykunaqa üshänömi kayanqa.
May nänipa aywayaptinpis allimi rikashä.
Tsaki jirkakunacho puriyaptinpis atskami qewa kanqa.
10 Rupaypa achayninpis manami paykunata rupanqatsu.
Paykunata kuyaparmi chuya yakuman pushashä.
Manami mallaqäyanqatsu ni yakunäyanqatsu.†
11 Jirkakunapapis alli nänitami rurashä.
Uchku uchku nänikunatapis pampatsashämi.
12 Kuyanqä runakunami karupita shayämunqa.
Norti kaqläpita, rupay jeqanan kaqläpita y Sinim partipitapis shayämunqami”.
13 ¡Ciëlu, kushikuypita cantay!
¡Kay patsa, pasaypa kushikuy!
¡Jirkakuna, kushikur alabayay!
¡Kuyanqan runakunata Tayta Dios salvanqanpita kushikuyay!
¡Imaynaqkunata kuyapanqanpitapis kushikuyay!
14 Siónmia nishqa:
“Tayta Diosmi jaqiriykamar qonqaykamashqa”.
15 Tsaymi Siónta Tayta Dios nin:
“¿Wawanta warmi qonqaykunmantsurä?
¿Wawanta manatsurä kuyapanman?
Wawanta qonqaptinpis noqaqa manami imaypis qonqäyäshaykitsu.
16 Maki paltämanmi jutikitapis qellqashqä.
Marka murällaykikunatapis yarparaykämi.
17 Allitsashishuqnikikuna rasmi shayämunqa.
Ushakätsiyäshuqnikikunapis aywakuykäyannami.
18 “Maski entërupa shumaq rikachakuy.
Maytsaypitami wamraykikunab qorikaykäyämun.
Noqa Tayta Diosmi jurar nï:
Wamraykikuna kutimurmi jipash majatsakänanpä kaq latsapanö kayanqa.
Qamnami tsay kuyayllapä latsapata jatikuqnö kar kushikunki.
19 “Atska runakuna kutimuptinmi nacionniki pasaypa kichki kanqa.
Raqäkunamanpis tsunyaqkunamanpis juntayanqami.
Ushakätsishuqnikikunaqa karumanmi aywakuyanqa.
20 Ushakäyanqantana yarpaptikipis wamraykikuna tsaytsika kutimurmi niyäshunki:
‘Tayta Diospa bendicionninwan mirarmi kay nacionman juntayashqä.
Juk partitana ashipaykayällämay tsaycho täyänäpä’.
21 “Tsaymi pasaypa kushikur yarpayllaykicho ninki:
‘Wamräkunata wanutsir ushaykäyaptinqa ¿pipatä kay wamrakuna?
Wakin wamräkuna jukläman qarqushqa kaykaptinqa ¿maypitatä kay wamrakuna yuriyämushqa?
Japallä kaykaptïqa ¿maypitatä shayämushqa?’ ”
22 Sióntami Tayta Dios nin:
“Maytsay nacionkunacho taqkunata niptïmi wamraykikunata warmita ollqutapis marqashqa y aparishqa apayämunqa.
23 Tsay wamraykikunatami reykuna legitimakuyanqa.
Reypa jipash tsurinkunami wätayanqa.
Paykunami respitayäshurniki qonqurikayämunqa.
Tsaymi musyanki noqa Tayta Dios kanqäta.
Noqaman yärakamuqkunaqa manami penqakuyanqatsu”.
24 Kallpasapa runa guërracho vincir imaykatapis apaptin ¿pillaqa qechunmantsurä?
Mana alli runa prësu apaptin ¿pillaqa qechunmantsurä?
25 Tayta Diosmi nin:
“Noqami itsanqa kallpasapa runa imatapis apanqanta qechushä.
Mana alli runa prësu apanqan runakunatapis qechushämi.
Janayki shärirmi chikishuqnikipa makinpita wamraykikunata qorimushä.
26 “Ñakatsiyäshuqnikikuna kikinpura wanutsinakuyänanpämi kamakätsishä.
Alläpa wanutsinakuy kaptinmi runa mayinpa aytsanta mikuqnö kayanqa.
Mayunörä yawar aywaptinmi runa mayinpa yawarninta upuqnö kayanqa.
Tsaynöpami llapan runakuna musyayanqa noqa Tayta Dios salvashuqniki kanqäta.
Tsaynöllami musyayanqa Jacobpa munayyuq Diosnin kar qamkunata tsapaq kanqäta”.