Mana cäsukuqkunata Tayta Dios castiganqan
50
Tayta Diosmi nin:“Paqtä qamkuna yarpäyanki warminwan runa rakikaqnö qamkunata jaqirinqäta.
Rasunpaypa tsaynö kaptinqa ¿maytä rakikanqantsik papel?
Paqtä tsaynöpis yarpäyanki pipapis jaqan kar wätay kayänaykipä rantikunqäta.
Tsaynö kaptinqa ¿maytä jaqa kanqä papel?
Tsaypa trokinqa jutsata rurayanqaykipitami rantikushqä.
Qamkuna mana wiyakuq kayanqaykipitami mamaykitaa qarqushqä.
2 “¿Imanirtä yanapanäpä shamur yärakamaqta pitapis tarishqätsu?
¿Imanirtä qayaptï contestayämashqaykitsu?
¿Manaku criyiyanki yanapanäpä munayyuq kanqäta?
¿Manaku criyiyanki salvanäpä poderyuq kanqäta?
Munayyuq karmi juk shimilla lamartapis mayukunatapis tsakiratsï.
Tsaymi pescädukunapis yaku mana kaptin wanur ushakäyan.
3 Munayyuq karmi ciëlutapis qachqa latsapata jatitsiqnö tsakaskatsï”.
Wätay runa ñakarpis Tayta Diosman yärakunqan
4 Tayta Diosmi yachatsimashqa llakishqa kaykaqkunata parlapar kushikatsinäpä.
Pay nimanqanta tantiyakunäpämi cada tuta rikchatsiman.
5 Wiyakuq kanäpämi Tayta Dios yanapaman.
Tsaymi pay nimanqanta imaypis cäsukü.
6 Runakuna castigayämänanpäpis waqtäta kamapashqämi.
Shapräta llukir ushayaptinpis manami imatapis parlakushqätsu.
Ashllir toqapäyämaptinpis qaqlläta manami tsapakushqätsu.†
7 Tayta Dios yanapamaptinmi awantashqä.
Mana penqakuypami Tayta Diosman yärakuykä.
Tsaymi mana kuyukuq qaqanö kaykä.
Tayta Diosman yärakunqäpita manami imaypis penqakushätsu.
8 Ñöpächömi Tayta Dios kaykan.
Paymi musyan jutsaynaq kanqäta.
¿Pirä noqapa conträ shärinman?
Conträ shäriqkuna qorikar mä imatapis niyämätsun.
9 Tayta Dios yanapaykämaptinqa ¿pirä imatapis conträ nimanman?
Puyur latsapa ushakanqannömi llapan conträkunapis ushakäyanqa.†
10 Mayqaykipis Tayta Diospita mantsapakuq karqa shumaq tantiyakuyay.
Wätaynin willakunqanta wiyakuq karqa shumaq yarpachakuyay.
Pasaypa llakikur tsakäpakushqanö karqa Tayta Diosman yärakuyay.
Ima ruraytapis mana kamäpakurqa yanapayäshunaykipä payta rugakuyay.
11 Tayta Diosmi nin:
“Kikillaykikunaman yärakuqkuna, shumaq tantiyakuyay.
Noqaman yärakayämunaykipa trokin qamkunaqa yarpaynikikunallamanmi yärakuykäyanki.
Tsaynö kayanqaykipitami castigaptï ñakar ushakäyanki”.