Jerusalén runakunata parlapanqan
51
Tayta Diosmi nin:“Allita rurar kawayta munaqkuna, wiyayämay.
Llapan shonquykikunawan mañakamaqkuna, wiyayämay.
Tantiyakuyay mayqan qaqapita qamkunata jipimunqätapis.
Tantiyakuyay maynincho kaykaq rumikunapita yarqayämunqaykitapis.a
2 Yarpäyay unay castayki Abrahampä y Sarapä.
Qayanqä höra paykunaqa wamraynaqllami kayarqan.
Bendicionnïta churaptïmi paypita aywaraqkuna atskaman mirayarqan.†
3 Tsaynöpis raqällana kaykaq Siónmanmi kuyapar bendicionnïta yapay churashä.
Tsunyaq jirkanö kaptinpis Edén huertanö kananpämi tikratsishä.
Tsaymi Sióncho pasaypa kushikur alabayämanqa.†
4 “Kuyanqä runakuna, shumaq wiyayämay.
Israel runakuna, shumaq tantiyakuyay.
Maytsaychömi leynïkunata willakuyanqa.
Entëru markakunacho yachatsikuynïta chaskikurmi aktsichönöna kawayanqa.
5 Kuyanqä runakunata salvanäpä wallkallanami pishiykan.
Llapan nación runakunatami jutsankunaman tupu juzgashä.
Maytsay nacioncho taq runakunapis noqallaman yärakamurmi shuyaraykäyämanqa.
6 Ciëluta rikar tantiyakuyay.
Kay patsata rikar tantiyakuyay.
Ciëluqa qoshninöllami ushakanqa.
Kay patsapis latsapa ushakaqnöllami ushakanqa.
Tsaynöllami runakunapis chuspinölla ushakäyanqa.
Salvacionnïmi itsanqa imaypis ushakanqatsu.
Munanqäqa imaypis rurakanqami.†
7 “Yachatsinqäkuna imanö kanqantapis musyaqkuna, wiyayämay.
Leynïkunata chaskikuq runakuna, cäsukayämay.
Runakuna imaykata ashlliyäshuptikipis ama llakikuyaytsu.
Imata niyäshuptikipis ama qallayäyaytsu.b
8 Latsapata y millwata puyu ushaqnömi tsay runakunata kuru ushanqa.
Salvacionnïmi itsanqa imaypis ushakanqatsu.
Munanqäqa imaypis rurakanqami”.
9 Tayta Dios, ¡rikchay!
Llapanpä munayyuq kanqaykita musyatsiyna.
Unay watakuna ruranqaykinö kananpis ruray.
¿Manaku mantsaypä Rahab kurutapis illakätsishqayki?†
10 ¿Manaku lamar yakutapis tsakiratsirqayki?
¿Manaku salvanqayki runakuna päsayämunanpä nänimanna tikraratsirqayki?†
11 Tsaynöllami kananpis salvamunqayki runakuna cantaraykar Siónman kutiyämunqa.
Tsaychömi imaypis kushishqalla kawayanqa.
Llakikuypis waqaypis manami kanqanatsu.†
12 Tayta Diosmi nin:
“Kikïmi qamkunata parlapä.
Qewanö ushakaqlla kaykäyaptinqa ¿imanirtä runakunata mantsayanki?
13 Kamashuqniki Tayta Diosmi kaykä.
Noqami ciëlutapis y kay patsatapis kamashqä.
¿Tsaynö kanqäta musyaykarku qonqaykayämashqayki?
Chikishuqniki runakuna ushakätsiyäshunaykipä kanqanta musyarmi qoyay qoyay pasaypa mantsakashqa kaykäyanki.
Mantsaykäyaptikipis tsay jurapäyäshuqniki runakuna ushakäyänanpänami kaykäyan.
14 Prësu apayanqantapis kachäyämunqanami.
Apayanqan runakuna manami carcelchötsu wanuyanqa
ni mikuytapis manami pishïpakuyanqatsu.
15 “Noqami Tayta Diosnikikuna kä.
Llapanta mandaq Yahwehmi jutïpis.
Lamarpis ‘pulchaqyay’ niptïmi pasaypa qayarar pulchaqyan.
16 Ciëluta mashtarmi kay patsatapis shumaq takyätsishqä.
Willakuynïta willakuyänaykipämi qamkunata churashqä.
Ima desgraciapitapis makïwanmi tsapashqä.
Sióntami nirqä: ‘Akranqä markami kanki’ ”.
Jerusalén runakunata Tayta Dios manana castigananpä ninqan
17 ¡Jerusalén marka,c ras rikchay! ¡Juklla sharkuy!
Cöpa junta wiñaraykaq rabyanayninta uputsishurnikimi Tayta Dios pasaypa castigashushqayki.
Tsaymi sharkuytapis mana kamäpakunqanyaq machashqa runanö kaykanki.†
18 Atska wamraykikuna kashqa kaptinpis pusharäshunaykipä manami ni jukllayllapis kannatsu.
Llapan wätanqayki wamraykikunapita jancharäshunaykipä manami ni jukllayllapis kannatsu.
19 Ishkay desgraciami päsashushqayki.
Jukmi kaykan nacionnikita ushakätsir imaykaykikunatapis apakuyanqan.
Jukaqnami kaykan mallaqay y guërra.
¿Pillarä kuyapaykushunki?
¿Pillarä shoqaykushunki?
20 Toqlla tsariptin lluytsu jitaraqnömi wamraykikunapis cälli esquïnakunacho unyashqa jitaräyan.
Tayta Diosmi pasaypa rabyanar tsaynö castigashushqayki.
21 Jerusalén runakuna, musyämi llakikur machashqanö kayanqaykita.
Manami vïnuwantsu machashqanö kaykäyanki, sinöqa Diospa castïgunwanmi.
Tayta Dios nishunqaykita kanan shumaq wiyayay.
22 Kuyanqan runakunapa janan shäriq Tayta Diosmi nin:
“Castigakunä cöpad aptaraykäyanqaykita qechushqänami.
Kananpitaqa rabyanar uputsinqä cöpata mananami upuyankinatsu.
23 Pasaypa ñakatsishuqnikikunatanami tsay cöpata uputsishä.
Paykunami niyäshurqayki: ‘Janaykipa päsayänäpä lätakäyay’.
Tsaymi lätakäyaptiki patsata jaruqnö waqtaykikunata jarur ushayäshurqayki”.