Jerusalénta salvananpä ninqan
52
¡Sión, rikchay, rikchay!¡Kallpata tsariy!
¡Santu Jerusalén marka, kuyayllapä latsapaykikunata jatikuy!†
Diosta mana cäsukuq jäpa runakuna imaypis manami atacayäshunkinatsu.
2 ¡Jerusalén, shärir janaykicho qanrata tapsikuy!
Prësu kaykaq Sión, kunkaykicho wataraykaq cadënakunata jipiskir trönuykiman jamakuy.
3 Tayta Diosmi nin:
“Juklä nacionman prësu apayäshuptiki ima pägutapis manami chaskishqätsu.
Tsaymi kanan qamta jipimurnï imatapis pägashätsu”.
4 Tayta Diosmi nin: “Unaymi kuyanqä runakuna Egiptuman aywaykur tsaycho täyarqan. Qepatanami achäquita mana ashipaykäyaptin Asiria runakuna ñakatsiyashqa. 5 Tsaymi nï: Kananqa ¿imatanatä rurashä? Imatapis mana pägamaypami kuyanqä runakunata juk nacionman apayashqa. Munaynincho tsararaqkunaqa allish tukurmi asipäyan. Qoyay qoyaymi manakaqman churayäman.† 6 Tsaymi tiempun chämuptin kuyanqä runakuna rikayanqa munayyuq kanqäta. Awninqänölla salvaptïmi tantiyayanqa yanapaykanqäta”.
7 Jirkakunapa shamur alli willakuyta apamuq runami pasaypa kushikuypä kaykan.†
Tsay willakuq runami alli kawaycho kawanantsikpä kaqta y salvashqa kanantsikpä kaqta willakun.
Sióntami nin: “¡Tayta Diosnikikunami llapantapis mandaykan!”
8 Tsayta wiyarmi rikachakuqnikikuna kushikuypita qayaraykäyan.
Siónman Tayta Dios kutimuqta rikarmi pasaypa kushikuyan.
9 Jerusaléncho kaykaq raqäkunapis, ¡kushishqa cantayay!
Kuyanqan runakunata Tayta Diosmi yanapanqa.
Jerusaléntami chikiqninkunapita salvanqa.
10 Tsaynö salvarmi munayyuq kanqanta maytsay nación runakunata Tayta Dios musyatsinqa.
Maytsay karu nación runakunapis rikayanqami Tayta Diosnintsik salvamanqantsikta.
11 ¡Babiloniapita witikuyay, witikuyay!
¡Imatapis impüruyätsikuqkunata ama yatayaytsu!
¡Jäpa markacho täyanqaykipita yarqukuyay!
¡Tayta Diospa manëjunkunata kutitsiqkuna, purificakuyay!†
12 Manami jananta rurintatsu yarquyanki.
Manami tsinkaypatsu aywayanki.
Tsaypa trokinqa kikin Tayta Diosmi jipiyäshurniki ñöpaykikunata aywanqa.
Qepaykitapis Israel runakunata kuyaq Tayta Diosmi aywanqa.
Sirviqnin ñakananpä ninqan
13 Sirviqninpämi Tayta Dios nin:
“Tantiyakuyay. Sirvimaqnï ruranqanqa llapanpis allimi kanqa.
Paytami llapanpitapis mas munayyuq kananpä churanqa.
Paymanqa manami pipis tinkunqatsu.
14 Chikiqninkuna maqayaptinmi qaqllanpis mana reqiypä karqan.
Tsaymi payta rikar runakuna pasaypa mantsakäyarqan.
15 Nirkurnami maytsay nación runakuna espantakuyanqa.
Reykunapis manami ima niyta kamäpakuyanqatsu.
Pipis mana willakunqantami musyayanqa.
Imaypis mana wiyayanqantami wiyayanqa”.a †