53
Willakuyanqäta ¿pirä criyishqa?Tayta Dios imanö salvamanqantsikta musyatsiptinpis ¿pirä tantiyashqa?†
2 Tayta Diospa sirviqnin paypa ñöpanchömi jatunyarqan.
Tsaki patsacho michïkur sheqllimuq jachanömi wiñarqan.
Pay manami kuyayllapätsu ni rikapäkuy munaytsu karqan.
3 Runakuna payta manakaqman churarmi chaskiyarqantsu.†
Pasaypa nanaywanmi ñakarqan.
Manami pipis rikayta munarqantsu.
Payta chikirmi pipis cäsurqantsu.
4 Paymi qeshyantsikkunata apakushqa.
Paymi nanaynintsikkunatapis jipishqa.†
Jutsata ruranqanpita Tayta Dios castigaykanqantami yarparqantsik.
5 Tsaynö yarpashqapis noqantsik mana wiyakuq kanqantsikpitami tuksishqa karqan.
Jutsata ruranqantsikpitami wanutsishqa karqan.
Tayta Dioswan alli kawayta tarinantsikpämi castigashqa karqan.
Yawarninta jicharmi alliyätsimashqantsik.a †
6 Llapantsikmi oqrakashqa üshanö kaykantsik.†
Tayta Diospita witikushqa karmi munanqantsiknö kawaykantsik.
Tsaynö kaykashqapis llapan jutsantsiktami Tayta Dios payman jitapashqa.
7 Pasaypa maqayaptinpis imatapis manami parlakurqantsu.
Üshata pishtananpä apaqnömi payta apayarqan.†
Millwanta rutuyaptin üsha wiyaräkunqannömi upällalla wiyaräkurqan.
Tsaynö upälla kakurmi ni juk shimillapis parlakurqantsu.
8 Imayka jutsayuqtanömi juzgayänanpä prësu apayarqan.
Payta wanutsiyaptin tsurinpis manami karqantsu.
Kuyanqä runakunapa jutsankunapitami pasaypa ñakarqan.†
9 Payqa manami ima jutsatapis rurarqantsu ni pitapis llullaparqantsu.†
Tsaynö kaptinpis jutsasapakuna y imaykayuqkuna pampakuyänanmanmi pampayarqan.
10 Tsaynö ñakanantami Tayta Dios munarqan.
Consagratsina sacrificiunö wanuptinmi wamrankuna atskaq kayanqa.
Nirkurmi atska wata kawanqa.
Pay raykuqmi Tayta Dios munanqannö llapanpis rurakanqa.
11 Ñakanqan allipä kanqanta rikarmi kushikunqa.
Tayta Diosmi nin:
“Payqa jutsaynaq sirvimaqnïmi.
Wanurmi atskaqta perdonanqa.
Jutsa rurayanqankunata paymi apakunqa.
12 Kikin salvakunanpa trokin jutsayuq runanöllami wanurqan.†
Runakuna raykuq wanurmi paykunata perdonanäpä mañakamarqan.
Tsaymi payta churashä mas respitashqa kananpä.
Guërracho vinciqkuna imaykatapis chaskiyanqannömi paypis premiuta chaskinqa”.