Israel runakunata imaypis Tayta Dios kuyanqan
54
Tayta Diosmi nin:“Qolluq warmi,a ¡kushikuy!
Wamrayki mana kaptinpis ¡kushikur cantay!
Runan jaqishqa karpis runayuq warmipita masrämi wamraykikuna kayanqa.†
2 Atska wamraykikuna yuriyänanpä kaykaptinqa tolduykita jatuntsay.
Estäcakunata jawir waskakunawan tolduykikunata siguray.
3 Qamqa atskaman mirarmi derëcha kaqläpa y itsuq kaqläpapis juntayanki.
Qampita aywaraqkunaqa atska nacionkunatami qechuyanqa.
Raqällana kaykaq markakunatapis allitsaskirmi tsaycho täyanqa”.
4 Ama mantsariytsu. Manami pipis manakaqman churashunkinatsu.
Ama penqakuynatsu. Manami pipis ashllishunkinatsu.
Wamraynaq kar penqakunqaykitapis qonqaykunkinami.
Viüdayar penqakunqaykitapis manami yarpankinatsu.
5 Kamashuqniki Tayta Diosmi warmin kanaykipä qorikushunki.†
Paypa jutinqa llapanta mandaq Yahwehmi.
Payqa imapitapis tsapäshunkimi.
Israel runakunapa santu Diosninmi kaykan.
Tsaymi pïmaypis musyanqa entëru munduta makincho tsararaq Dios kanqanta.
6 Runan jaqirishqa warminö llakishqa kaykaptikimi Tayta Dios qayashurqayki.
Chölu kay warminta juk runa qoriqnömi qorikushurqayki.
Tayta Diosnikimi nin:
7 “Qamtaqa juk rätullami jaqiykurqä.
Kananmi itsanqa pasaypa kuyaparniki yapay qorikushayki.
8 Pasaypa rabyakurmi juk rätulla qampita witikurqä.
Kananpitaqa imaypis kuyashaykimi”.†
Salvashuqniki Tayta Diosnikimi tsaynö nin.
9 “Noé kanqan witsanmi jurarqä kay patsata imaypis yakuwan manana ushakätsinäpä.†
Tsaynöllami kananpis jurä yapay rabyanarpis manana castiganäpä.
10 Jirkakuna kuyuyaptinpis jirkankuna tsuktsukyaptinpis qamtami imaypis kuyashayki.
Imaypis allilla kawanaykipämi pactu ruranqantsikta cumplishä”.†
Kuyapäshuqniki Tayta Diosmi tsaynö nin.
Mushuq Jerusalénpä ninqan
11 Jerusalén markatami Tayta Dios nin:
“¡Pasaypa kuyapaypä marka!
¡Ñakatsiyäshuptiki manami pipis kuyapäshunkitsu!
Tsaynö kaptinpis kikïmi carbunclo rumikunawan cimientuykita rurashä.
Tsay jananmanmi zafiro rumikunawan pirqashä.
12 Rubí rumipitami rikachakuna törrikikunatapis rurashä.
Carbunclo rumipitami punkuykikunatapis rurashä.
Entëru kuchunpami murällaykitapis kuyayllapä rumikunawan pirqashä.†
13 “Kikïmi wamraykikunatapis yachatsishä.†
Yanapaptïmi pïmaywanpis alli kawayanqa.
14 Reypis munanqänömi mandanqa.
Mananami pipis ñakatsishunkinatsu.
Alli kawaycho kawarmi mantsarinkinatsu.
15 Mayqan nación runakunatapis ushakätsishunaykipä manami kachamushänatsu.
Shayämuptinqa kikinkunatami ushakätsinki.
16 “Noqami herrërutapis kamashqä shanshawan wayllarkatsir fiërruta takar armakunata rurananpä.
Noqami soldädukunatapis kamashqä llapanta ushakätsiyänanpä.
17 Tsaymi mayqan soldädutapis vinciyäshunaykipä kachapäshätsu.
Yanapaptïmi imatapis tumpashuqnikita upällatsinki.
Llapan sirvimaqkunata kikïmi salvashä”.
Tayta Diosmi tsaynö nin.