Llapan runakunata Tayta Dios qayanqan
55
Tayta Diosmi nin:“Yakunaykaqkuna, yaku upuq llapaykikuna shayämuy.†
Mikuyta rantiyänaykipä qellaynïkuna mana kaptinpis mikuq shayämuy.
Vïnutawan lichita qaraylla apayänaykipä shayämuy.
2 Mikuyta rantiyänaykipa trokin ¿imanirtä qellaynikikunata manakaqkunacho ushayanki?
Arupakur gänayanqaykita ¿imanirtä llutankunacho ushaykäyanki?
Shumaq wiyayämay.
Cäsukamarqa alli mikuytami tariyanki.
Alli allillata mikurmi kushishqa kawayanki.
3 “Wiyamar noqaman shayämuy.
Ninqäta wiyamarqa allimi kawayanki.
Rey Davidta kuyar awninqäta cumplirmi† qamkunata yanapanäpä pactuta rurashun.
Tsay pactutami imaypis cumplishä.
4 “Munayyuq kanqäta maytsay nación runakuna musyayänanpämi rey Davidta churashqä.
Nacionkunapa mandaqnin y yachatsiqnin kananpämi churashqä.
5 Tsaynöllami qamkunapis mana reqiyanqayki nación runakunata qayatsiyanki.
Mana reqishuqniki runakunami qamkunaman cörrilla shayämunqa.
Tsaynö kanqa Tayta Diosniki kar qamkunata yanapaptïmi.
Noqaqa Israel runakunapa santu Diosninmi kä”.
6 Kawayanqaykiyaq Tayta Diosta ashiyay.
Kuyapäyäshunqaykiyaq rugakuyay.
7 Jutsaykikunata kachariyay.
Manakaqkunapä yarpachakuyänaykipa trokin Tayta Diosman kutikuyay.
Diosnintsik karmi kuyapäshunki.
Payqa imaypis perdonayäshunkimi.†
8 Tayta Diosmi nin:
“Yarpaynïqa manami qamkunapa yarpaynikikunanötsu.
Ruraynïkunapis manami qamkunapa ruraynikikunanötsu.
9 Kay patsapita mas altucho ciëlu kanqannömi
ruranqäkunapis qamkuna rurayanqaykipita mas alli kaykan.
Yarpanqäkunapis qamkuna yarpäyanqaykipita mas allimi kaykan.
10 “Ciëlupita tamyapis ni rashtapis manami kanqanman kutintsu.
Tsaypa trokinqa allpata ushmarmi murukuykunata jeqatsimun alli wayunanpä.
Tsaynöpami muru kanqa yapay muruyänanpäpis.
Mikuyänanpäpis mikuy kaykan.†
11 Palabräpis tamyanömi kaykan.
Kachamuptïmi imaypis munanqäta ruran.
Manami manakaqllapätsu maymanpis chätsï.
12 “Qamkunaqa maypa aywarpis kushishqami kawayanki.
Jirkakunapis jirkankunapis rikayäshurniki kushishqami cantayanqa.
Llapan muntikunapis kushikurmi llimllankunata kuyutsiyanqa.
13 Kashakunapa trokinmi cipreskuna wiñayämunqa.
Ishankakunapa trokinmi arrayankuna wiñayämunqa.
Tsaynöpami maytsaychöpis adorayämanqa.
Tsaytaqa manami pipis qonqanqatsu”.