Pïmaytapis Tayta Dios salvananpä kanqan
56
Tayta Diosmi nin:“Manaräpis unaytami qoriyäshayki.
Salvarmi musyatsiyäshayki munayyuq kanqäta.
Tsaynö kaykaptinqa alli kaqllata rurayay.
Munanqänöna imaypis kawayay.
2 Ninqäta cäsukuq runaqa jamay junaqta respitanmi.
Ima jutsatapis manami rurantsu.
Tsay runaqa imaypis kushishqami kawan”.†
3 Tayta Dios munanqannö kawaq runaqa jäpa karpis
ama yarpätsuntsu Tayta Dios kuyanqan runakunapita qarqunanpä kanqanta.
Eunucu karpis ama llakikur yarpätsuntsu tsurin mana kaptin mana wayuq jachanö kanqanta.
4 Tayta Diosmi nin:
“Eunucu runapis jamay junaqkunata respitaptin, munanqänö kawaptin y pactu ruranqäta cumpliptinqa 5 wayïcho imaypis tänanpämi chaskishä.
Payta churapanqä jutinqa tsuriyuq kanqanpitapis mas allimi kanqa.
Paypa jutinta imaypis manami qonqäyanqatsu.
6 “Jäpa runakunapis sirvimar kuyayämaptin, jamay junaqkunata respitayaptin y pactu ruranqäta cumpliyaptinqa
7 akranqä sagrädu jirkanmanmi pushashä wayïcho kushishqa adorayämänanpä.
Noqapä sacrificiukunata tsaycho rupatsiyaptinqa chaskishämi.
Wayïqa maytsay nación runakuna mañakayämänanpämi kanqa”.†
8 Mashtakashqa kaykaq Israel runakunata qoriq Tayta Diosmi nin:
“Kuyanqä runakunata qorinqänöllami juklä marka runakunatapis qorimushä”.
Mana alli mandaqkunapa contran ninqan
9 ¡Jirka uywakuna y munti uywakuna, shayämuy!
¡Shamur runakunata mikur ushayay!
10 Autoridäkuna ni yachatsikuqkunapis manami tantiyatsiyantsu runakuna jutsa rurayta kachariyänanpä.
Paykunaqa qapranö karmi imatapis musyayantsu.
Llapanpis mana kanikuq allqunömi kayan.
Qela karmi qoyay qoyay punullar jitaräkuyan.
11 Mallaqashqa allqunömi imaypis kaykäyan.
Imatapis mana tantiyaq mitsikuqnömi kaykäyan.†
Paykunaqa llutanta rurarmi kawayan.
Imata rurarpis pägupä raykuqmi rurayan.
12 Paykunami niyan:
“¡Aku machanqantsikyaq vïnuta upyashun!
¡Kanan upyanqantsiknö waraypis jimanqantsikyaq upyakushun!”