57
Tayta Diosta sirviq alli runakuna wanuyaptin manami pipis llakikuntsu.Manana ñakayänanpä Tayta Dios qorikunqanta manami pipis tantiyantsu.
2 Dios munanqannö kawaqkunaqa wanukurpis mananami ñakayanqanatsu.
Ïdulukunata adoraqkunapa contran parlanqan
3 Tayta Diosmi nin:
“¡Jutsasapakuna, shumaq wiyakuyay!
¡Qamkunaqa brüja castami kaykäyanki!
¡Majanta qanrataqnömi ïdulukunata adorar Tayta Diosta manakaqman churaykäyanki!
4 ¿Imanirtä cäsukamaqkunata asipäyanki?
¿Imanirtä manakaqman churar yachapäyanki?
¿Imanirtä aqtupäyanki?
¡Qamkunaqa llulla runakuna y jutsasapa runakunami kaykäyanki!
5 “Qamkunaqa roble jachakuna chakinkunacho, llimllasapa jachakuna chakinkunachömi ïduluykikunata adorarnin warmikunawan kakuykäyanki.
Tsaynöllami raqrakunacho y qaqakunacho sacrificiuta rupatsir wamraykikunata rupaykätsiyanki.†
6 Qamkunapa diosnikikunaqa mayu kuchuncho qollush rumikunallami kayan.
Tsaykuna yanapayäshunaykipä kanqanta yarparmi vïnutapis wiñapaykäyanki.
Tsaki mikuy ofrendakunatapis qaraykäyanki.
Tsaynö rurayanqaykita musyaykar ¿upällakümantsurä?
7 “Jatusaq jirkakunachömi adulteriu jutsata ruraqnö juk dioskunata adoraykäyanki.
Tsay jirkakunamanmi witsaykäyanki sacrificiukunata rupatsiyänaykipä.
8 Wayi punkuyki waqtankunamanmi ïdulukunata churaykäyanki.
Noqata mana cäsukamarmi adulteriu jutsata ruraqnö tsay ïdulukunawan pactuta rurar adoraykäyanki.
Qallapächu warmita rikapaqnömi tsay ïdulukunata rikapar adoraykäyanki.
9 “Aceitita apakurkurmi diosnikikuna Molocman cörriykäyanki.
Perfümitapis atskatami apaykäyanki.
Mana reqiyanqayki ïdulukunata adorayta munarmi apayämunanpäpis runakunata kachaykäyanki.
Mayjina karumanpis chaykätsiyankimi.
10 Ïdulukunata adorayänaykipä maytsaypa aywarpis manakaqllapä adorayanqaykita manami tantiyakuyankitsu.
Pishiparpis mana ajayaypami adoraykäyanki.
11 “¿Ïduluykikunata mantsarku noqaman yärakayämunkinatsu?
¿Ïduluykikunata respitarku qonqaskayämashqayki?
¿Unaypita mana parlakunqäta yarparku mantsapakayämankinatsu?
12 Kananqa imanö kawayanqaykitapis pïmaytami musyatsishä.
Llapan rurayanqaykipis manakaqllapämi kanqa.
13 Salvashunaykipä qayakuyaptikipis tsay ïduluykikuna manami salvayäshunkitsu.
Tsaykunataqa llapantami wayra apanqa.
Juk pükayllachömi wayrapis saqtarinqa.
Noqaman yärakamuqkunami itsanqa awninqä nacioncho täyanqa.
Paykunaqa sagrädu jirkannïchömi adorayämanqa”.
Israel runakunata salvanqan
14 Tayta Diosmi nin:
“Nänita arur shumaq pitsayanqaykinö jutsaykikunata kachariyay.
Kuyanqä runakuna noqaman kutiyämunanpä nänita shumaq allitsayay”.
15 Ciëlucho taq imayyaqpis kawaq santu Tayta Diosmi nin:
“Noqaqa junish sagrädu patsachömi tä.
Tsaynöllami jutsankunapita llakikuqkunawan kaykä.
Paykunata yanaparmi shakyätsishä.
16 Tsaymi kuyanqä runakunata castigaykäshätsu.
Paykunawanqa mananami imayyaqpis rabyanashqallatsu kaykäshä.
Tsaynö rabyanashqalla imaypis kaptïqa llapan kamanqä runakunami ushakäyanman.
17 “Kuyanqä runakuna jutsata rurayanqanpita rabyanarmi juk tiempu castigashqä.
Pasaypa castigaykurmi paykunata jaqirishqä.
Tsaynö castigaykaptïpis mana cäsukamarmi kikinkuna munayanqannö kawayashqa.
18 Tsaynö kawaykäyaptinpis cäsukuq kayänanpämi yanapashä.
Shumaq rikar yanapaptïmi llakishqa kawaqkunapis kushikuyanqa.
19 Kushishqa alabayämänanpämi yanapashä.
Karucho kaykaqkunamanpis y cercacho kaykaqkunamanpis alli kawayta tariyänanpämi willakatsishä.†
Kuyanqä runakunata noqami yanapashä.
20 “Mana alli runakunami itsanqa lamar pulchaqyaqnö kaykäyan.
Mana päraypa pulchaqyar mituwan y qanrawan putkataqnömi kaykäyan.
21 Mana alli runakunaqa manami imaypis alli kawayanqatsu”.†
Tayta Diosmi tsaynö nin.