Ayünu imanö kanqanpis
58
Tayta Diosmi nimarqan:“¡Mana mantsariypa llapan kallpaykiwan qayakuy!
¡Cornëta waqaqnörä qayakunqayki wiyakätsun!
¡Jacobpita aywaraq kuyanqä runakuna jutsata rurayanqanta tantiyatsiy!
2 Paykunaqa munanqänö kawayta munarmi qoyay qoyay ashiyäman.
‘Dios munanqannö kawashun’ nirmi yanapanäpä mañakayäman.
Tsaynö mañakamarpis mandamientükunata cäsukuq tukurmi kawayan.
Manami munanqänötsu kawayan
3 Mana yanapaptïmi niyäman:
‘Ayunaykäyaptïpis ¿imanirtä wiyayämankitsu?
Mallaqayta awantaykäyaptï ¿imanirtä cäsuyämankitsu?’
“Tsaynö niyämaptinmi noqa nï:
Qamkuna mana alli kawayaptikimi ayunayaptikipis cäsütsu.
Ayunayanqayki junaqpis imaykayuq kayta munarmi aruqnikikunatapis mana pägaypa aruykätsiyanki.
4 Ayunarpis rimanakullarmi kaykäyanki.
Tsaynöllami mana kuyapänakuypa maqanakuykäyanki.
Ayunar tsaynö kaykäyaptikiqa rugakayämanqaykitapis manami wiyayäshaykitsu.
5 “Qamkuna ayunarqa äjusyashqa jaranömi kaykäyanki.
Tsaynöllami qachqa latsapayki jatishqa uchpa janancho kitiraykäyanki.
¿Tsaytsurä munanqänö ayunay junaq kanman?
6 Noqa munanqänö ayunarqa manakaqta tumpar prësu wichqayanqayki runata kachäyanki,
runa mayikikunata ama ñakatsiyankitsu
y pasaypa aruykätsiyanqayki runakunata yüguta paskariqnö jamatsiyanki.
7 Tsaynöllami munä muchuqkunata mikuyta qarayänaykita,
wayiynaqkunata patsatsiyänaykita,
latsapaynaqkunata jatitsiyänaykita
y runa mayikita kuyapäyänaykita.
8 “Tsaynö kayaptikiqa patsa waraqnömi qamkunapä salvación kanqa.
Kushishqa kawayänaykipämi yanapayäshayki.
Allita ruraq kayanqaykimi puntaykikunata aywanqa.
Qepaykikunatanami munaynïwan imapitapis tsapäyäshayki.
9 Mañakayämaptikiqa kamaripäyäshaykimi.
Yanapanäpä qayayämaptikiqa yanapayäshaykimi.
“Runa mayikikunata amana ñakatsiyaynatsu ni ashlliyaynatsu.
Pitapis llutallaqa amana tumpayaynatsu.
10 Mallaqaqkunata mikuynin qarayay.
Llakikuykaqkunata shakyätsiyay.
Tsaynö karqa tsakaycho atsikyaqnömi kayanki.
Tsakäpakushqanö kayanqaykipis pullan junaqnömi atsikyanqa.
11 Noqami üsha mitsiqnö imaypis rikayäshayki.
Imata ministiyanqaykitapis kamaripäyäshaykimi.
Kallpayki kananpäpis yanapayäshaykimi.
Tsaynöpis alli qarpashqa huertanö y imaypis mana tsakiq pukyunömi kayanki.
12 Unay raqäkunatapis pirqarmi allitsayanki.
Unay cimientu janallanmanmi pirqata yapay shäritsiyanki.
Tsaymi qamkunataqa ‘juchushqa pirqakunata y wayikunata allitsaq’ niyäshunki”.
Jamay junaqpä yachatsinqan
13 “Jamay junaqtaqa respitayay.†
Tsay junaqqa imatapis ama rantiyaytsu ni rantikuyaytsu.
Tsaypa trokinqa tantiyakuyay tsay junaq kushikuypä kanqanta y akranqä sagrädu junaq kanqanta.
Tsay junaqta respitarnin ima ruraytapis jaqiriykur jamapäyay.
Shonquykikuna yarpanqanta ama rurayaytsu.
Llutankunatapis ama parlayaytsu.
14 “Tsaykunata cumplirqa kushishqami kawayanki.
Pïmaypis respitayäshunaykipämi churashayki.
Unay castayki Jacobta entreganqä nacionchömi kushishqa täyanki”.
Kikin Tayta Diosmi tsaynö nishqa.