Jutsa ruraq kanqantsik
59
Ama yarpäyaytsu salvayäshunaykipä Tayta Dios munayniynaq kanqanta.Payqa manami upatsu mañakuyanqaykita mana wiyayäshunaykipä.
2 Tsaypa trokinqa jutsaykikunami imayka jatun pirqanöpis paypita rakiykäyäshunki.
Tsaymi jutsata rurayanqaykipita Tayta Diosnintsik rikayäshunkinatsu.
Mañakuyaptikipis manami wiyayäshunkitsu.
3 Wanutsikuq kayaptikimi makikikunapis yawarllana kaykan.
Dëduykikunapis runa wanutsiqmi kaykan.
Shimikikunapis pasaypa llullami.
Qalluykikunapis mana allillatami parlan.
4 Manami pipis allita rurananpä yarpachakuntsu.
Demandakuqpis manami rasun kaqtaqa parlantsu.
Autoridäkunapis llullakuqkunatami criyiyan.
Manami pipis rasun kaqtaqa parlantsu.
Jutsata rurallarmi kaykäyan.
5 Llikanta pachka awaqnö y culebrapa runtunta oqllaqnömi kaykäyan.
Tsay runtukunata mikuq kaqqa wanunmi.
Runtuta pakiptinqa culebrakunami yarqayämun.a
6 Latsapata rurayänanpä pachkapa llikan mana alli kanqannömi tsay runakuna llapan rurayanqanpis mana alli kaykan.
Mana alli ruraykunallatami paykuna rurayan.
7 Tsaymi mana allita rurayänanpäpis ras cörriyan.
Jutsaynaq runata wanutsiyänanpäpis rasmi aywayan.
Mana allita rurayänallanpämi yarpachakuyan.
Maypa aywarpis llutankunata rurallarmi puriyan.†
8 Alli kaway imanö kanqantapis manami musyayantsu.
Manami imatapis allitaqa rurayantsu.
Paykuna kawayanqannö kawarqa manami pipis alli kawayta tarinqatsu.†
9 Tsaymi salvakuyta munarpis kamäpakuntsiktsu.
Runa mayintsikwan alli kawaytapis manami kamäpakuntsiktsu.
Atsikyayta shuyarashqapis tsakayllami kaykan.
Aktsichönö kawayta munarpis tsakaychönöllami kawaykantsik.
10 Qaprakuna pirqata yatayllapa puriqnömi kawaykantsik.
Rikayta mana kamäpakuqnömi llamkayllapa puriykantsik.
Pullan junaqpis tsakaypa llutskaqnömi kaykantsik.
Kawaykarpis wanushqanömi kaykantsik.
11 Pasaypa llakikurmi ösunörä waqaykantsik.
Paluma waqaqnömi llakishqa waqaykantsik.
Alli kawayta shuyashqapis manami chämuntsu.
Salvakuyta munarpis manami salvakuntsiktsu.
12 Imaypis jutsata rurarmi Tayta Diosta ajanätsintsik.
Llapan ruranqantsikmi jutsayuq kanqantsikta willakun.
Jutsa rurayta kachariyta mana kamäpakurmi jutsayuq kanqantsikta musyantsik.
13 Tayta Diosnintsik ninqankunata manakaqman churarmi cäsuntsiktsu.
Llutanta ruranantsikpä y runa mayintsikta engañanallantsikpämi willanakuntsik.
14 Juezkunapis alli runapa contranmi shäriyan.
Allita rurananpä manami pipis yarpannatsu.
Rasuntanörä parlarmi pïmaytapis criyiratsiyan.
Pïmaypis suwapänakullarmi kawayan.
15 Llapanpis llullapänakuyanmi.
Alli runakunataqa carcelmanmi wichqayan.
Tsayta rikarmi Tayta Dios pasaypa rabyanan.
16 Mana allikunata rurayaptin pipis mana michaqta rikarmi Tayta Dios pasaypa ajanan.
Tsaymi washänanpä ñakaqkunapa janan kikin Tayta Dios shärishqa.†
17 Pelyacho tsapakuna chalëcutami jatikushqa.
Tsay chalëcuqa alli rurayninkunami kaykan.
Tsaynöllami umanman cascu jatikunqan salvación kaykan.†
Runa mayinta ñakatsiqkunata castigananpä pasaypa rabyanarmi yarqushqa.
18 Llutanta rurayanqanman tupumi castiganqa.
Pasaypa ajanarmi contran runakunata jutsa rurayanqanman tupu castiganqa.
Lamar kuchun markakunacho taqkunatapis castiganqami.
19 Mayu atskayar bötiypa bötir shamuqnörämi castigananpä Tayta Dios shamunqa.
Tsaymi rupay yarqamunanpita rupay jeqananyaq Tayta Diospita mantsapakuyanqa.
20 Tayta Diosmi nin:
“Juk salvakuqmi Siónman shamunqa.
Jacobpita aywaraqkuna jutsa rurayta kachariyaptinqa llapantami salvanqa”.†
21 Tayta Diosmi nin:
“Paykunawan pactuta rurarmi nishä:
‘Espïritümi qamkunawan imaypis kaykanqa.
Kay pactutami imaypis yarparäyanki.
Manami imaypis qonqäyankitsu.
Tsurikikunapis willkaykikunapis manami qonqäyanqatsu’ ”.