Mushuq Jerusalén kananpä ninqan
60
Tayta Diosmi nin:“¡Shäriy, Jerusalén!a
Salvacionniki chämushqana kaykaptinqa ¡atsikyay!
Munaynïmi qamcho atsikyaykan.
2 Kay patsata tsakaymi tsapaskishqa.
Nacionkunatapis tsakaymi ñitishqa.
Qammanmi itsanqa patsa warämuqnö chämushä.
Munaynïwan yanapanqätami pïmaypis rikayanqa.
3 Aktsinö kaptikimi llapan nación runakuna qamman shayämunqa.
Patsa waraykaqnö atsikyaptikimi reykunapis shayämunqa.†
4 “Jerusalén, ichirkur maytsaypa rikachakuy.
Maytsaypita qorikaskirmi runakuna aywaykäyämun.
Ollqu wamraykikunapis karupitami shamuykäyan.
Warmi wamraykikunatapis marqashqami apaykäyämun.
5 Paykuna chäyämuptin pasaypami kushikunki.
Shonquykipis atsikyanqami.
“Lamar washalänincho taqkunapis chanin kaqkunatami apapäyämushunki.
Nacionninkunapa riquëzankunatami qampä apayämunqa.
6 Madiánpita y Efapitami camëllunkunawan tröpa tröparä juntayämunqa.
Qorita y inciensiuta apakurkurmi Sabápitapis shayämunqa.
Noqata alabayämarmi chäyämunqa.
7 Cedarcho kaykaq üshakunatapis qampämi qatiyämunqa.
Altarcho rupatsiyänaykipämi Nebaiotcho carnërukunata qatiyämunqa.
Tsay rupatsiyanqaykimi shonqüpänö kanqa.
Maytsaypita imaykatapis apayämuptinmi templüpis kushikuypä kanqa.
8 “Büquikuna pukutaynörä shamuykaqta y palumakuna pununanman kutiqnö runakuna shamuykaqta rikay.
9 Tsay büquikuna karu nacionkunapitami shamuykäyan.
Tsay nacionkunacho taq runakunapis noqamanmi yärakayämun.
Tarsispita jatunkaray büquikunami puntankunata shamuykäyan.
Karupitami wamraykikunata apaykäyämun.
Qoritawan qellayta apakurkurmi shamuykäyan.
Tsaynö shamuykäyan qamcho feyupa mantsariypä kaqkunata ruranqäpita adorayämänanpämi.
Noqaqa Israel runakunapa santu Tayta Diosninmi kä.
10 “Pasaypa rabyakur castigashqa karpis kananqa kuyapäshaykimi.
Tsaymi jäpa runakuna shamur marka murällaykikunata allitsayanqa.
Mandaqnin reykunami ninqaykita rurayanqa.†
11 Maytsay nacionkunapita riquëzankunata apayämunanpämi paqaspis junaqpapis punkuykikuna kicharaykanqa.†
Reykunatapis qammanmi pushayämunqa.
12 Mayqan nación runakunapis ninqaykita mana ruraq kaqqa chipyaq ushakätsishqami kayanqa.
13 “Líbanupitapis allinnin cipreskunata, pïnukunata y abëtu qerukunatami templüta allitsayänanpä apayämunqa.
Tsaynöpami templü shumaq kuyayllapä kanqa.
14 Ñakatsishuqnikikunapa wamrankuna respitayäshurnikimi ñöpaykiman chäyämunqa.
Manakaqman churashuqnikikunapis llapanmi ñöpaykiman qonqurikayämunqa.†
Paykunami niyanqa Tayta Diospa markan kanqaykita.
Tsaynöpis niyanqa Israel runakunapa santu Tayta Diosnin tanqan Sión kanqaykita.
15 “Ñöpataqa kacharishqa y chikishqa karmi tsunyaq marka tikrarqayki.
Tsaynö kashqa kaptikipis kuyayllapä y kushishqa imayyaqpis kanaykipämi yanapashayki.
16 Llapan ministinqaykikunatapis maytsay nacionkunapitami apayämunqa.
Reykunapis llapan munanqaykitami kamaripäyäshunki.
Tsaynöpami musyanki noqa Tayta Diosniki salvakuq kanqäta.
Tsaynöllami musyanki Jacob yärakunqan munayyuq Dios kar qamta tsapanqäta.
17 “Bendisarmi broncipa trokin qorita,
fiërrupa trokin qellayta,
qerupa trokin broncita
y rumipa trokin fiërruta kamaripäshayki.
Qamcho taqkuna allimi kawayanqa.
Alli kaqllatami imaypis rurayanqa.
18 Wanutsinakuypis qamcho mananami kanqanatsu.
Nacionnikicho ushakätsinakuyänanpa trokinqa allinami kawayanqa.
Marka yaykuna punkuykikunapa päsaq runakunapis kushishqami alabayämanqa.
19 “Mananami ministinkinatsu junaqpa rupayta ni paqaspa killatapis.
Noqa Tayta Diosmi imayyaqpis aktsiki y salvashuqniki kashä.†
20 Tsaymi rupay mana jeqaqnö y killapis mana tsakaqnö imaypis qampä kaykäshä.
Noqa Tayta Diosmi imayyaqpis aktsiki kashä.
Qamta tsaynö rikaptïmi imaypis llakikunkinatsu.
21 “Qamcho taqkunaqa llapanpis alli runakunallanami kayanqa.
Qamchömi imayyaqpis paykuna täyanqa.
Munayyuq kanqäta pïmaypis musyayänanpämi plantanqä plantapita yapay sheqllimuqnö kayanqa.
22 Juk ishkay kaqkunami waranqanpa mirayanqa.
Wallkalla kaqkunami munayyuq nación tikrayanqa.
Noqa Tayta Diosmi kamakätsishä manaräpis unayta tsaynö kananpä”.