Israel runakuna salvashqa kayänanpä willakunqan
61
Tayta Dios akramashqa karmi Espïritunta noqaman kachamushqa.Paymi kachamashqa muchuqkunata alli willakuyninta willanäpä,
llakishqa kawaqkunata shakyätsinäpä,
juklä nacionman prësu aywaqkuna librina kayanqanta willanäpä
y carcelcho wichqaraqkunatapis yarqayämunanpä kanqanta willanäpä.†
2 Tsaynöllami Tayta Dios kachamashqa pay salvananpä kaq tiempu chämunqanta willakunäpä,†
contrantsikkuna jutsata rurayanqanman tupu castigananpä kanqanta willakunäpä
y waqaqkunatapis shoqanäpä.†
3 Sióncho llakishqa kaqkunata shumaq tantiyatsirmi shakyätsishä.
Tsaymi umankunaman uchpata wiñakuyänanpa trokin corönatana jatikuyanqa,
lütuta jatikuyänanpa trokin aceitiwan llushikuyanqa
y llakishqa kayänanpa trokin kushishqana cantayanqa.
Tsaynö kaptinmi Tayta Dios plantanqan kuyayllapä encina jachanö kayanqanta niyanqa.
Tsaynöpami Tayta Diosta pïmaypis alabayanqa.
4 Unay juchutsiyanqan raqäkunatapis yapaymi allitsatsiyanqa.
Markakuna pasaypa ushakashqa kaptinpis yapaymi shäritsiyanqa.
5 Kuyanqä runakuna, uywaykikunatapis jäpa runakunami mitsipäyäshunki.
Chakraykikunacho arurmi üva plantaykikunatapis rikayanqa.
6 Tsaynöllami Tayta Diospa sacerdötinkuna kayanqaykita niyäshunki.
Tayta Diosnintsikta sirviq kayanqaykitami parlayanqa.
Juklä nación runakunapa riquëzankunawanmi quëdayanki.
Pasaypa chaniyuq adornunkunata jatikurmi kushikuyanki.
7 Ñöpata pasaypa penqakuyman y manakaqman churayäshurnikipis respitayäshurnikimi janaykina parlayanqa.
Atska riquëzata chaskirmi nacionnikicho imayyaqpis kushishqa kawayanki.
8 Tayta Diosmi nin:
“Allita rurar kawaq runata kuyämi.
Suwakuqkunata y mana alli ruraqkunatami itsanqa chikï.
Tsaymi alli kawayänaykipä yanapayäshayki.
Imayyaqpis yanapanäpämi qamkunawan pactuta rurashä.
9 Qamkunapita aywaraqkunami maytsay nacionchöpis y markakunachöpis reqishqa kayanqa.
Qamkunata yanapanqätami pïmaypis tantiyakuyanqa”.
10 Tayta Diosnï yanapamaptinmi kushikuypita shonqüpis atsikyarkun.
Paymi salvación latsapata jatitsimashqa.
Kuyayllapä latsapänömi alli ruraykunapis kaykan.
Majatsakänanpä shumaq cambiakushqa chölunömi kaykä.
Majatsakaq jipash kuyayllapä latsapan jatishqa kaykaqnömi kaykä.†
11 Maytsay nacionchöpis allillatana rurar payta alabayänanpämi Tayta Dios kamakätsinqa.
Qewata jeqatsimunqannö y huertacho plantata sheqllitsimunqannömi salvacionnin kanqa.