Jerusalén salvashqa kananpä kanqan
62
Jerusaléna, qamta kuyaykarqa manami upälla kakümantsu.Tayta Dios munanqannö kawanqaykiyaqmi y contraykikunapita salvashunqaykiyaqmi willaykäshayki.
Salvashqa karnami patsa waraptin rupay atsikyaqnöna kanki.
2 Allina kawanqaykita maytsay nación runakunami musyayanqa.
Llapan reykunami munayyuq kanqaykita rikayanqa.
Kikin Tayta Diosmi mushuq jutita churapäshunki.
3 Rey jatiräkunan corönanömi Tayta Diospa makincho kanki.
4 “Jaqirishqa” niyäshunaykipa trokinqa “Tayta Dios pasaypa kuyanqan” niyäshunkimi.
Tsaynöllami “ushakashqa marka” niyäshunaykipa trokin “Tayta Diospa majan” niyäshunki.†
5 Jipashwan chölu majatsakanqannömi Tayta Diospis qamwan majatsakanqa.
Warminwan runa kushishqa kawanqannömi Tayta Diospis qamwan kushishqa kanqa.
6 Jerusalén, murällaykikuna jananmanmi rikachakuqkunata churashqä.†
Paykunami paqaspa junaqpapis mana ajayaypa Tayta Diosta mañakuyanqa.
Tayta Diosta rugakuqkuna, ama upällakuyaytsu.
7 Jerusalénta allitsar ushayanqanyaq Tayta Diosta rugakuyay.
Maytsaychöpis runakuna Jerusalénta respitayanqanyaq Tayta Diosta mañakuyay.
8 Tayta Dios munayyuq karmi jurar Jerusalén markata nirqan:
“Chikishuqniki runakuna trïguykikunata apakuyänanta manami kachapäshänatsu.
Ñakar ruranqayki vïnuykikunata juklä runakuna upuyänantapis manami munashänatsu.
9 Tsaypa trokinqa qorinqayki mikuyta kikiki mikurmi alabamanki.
Üvaykipita ruranqayki vïnuykitapis kikikimi sagrädu templüpa patiuncho upunki”.
10 ¡Marka punkukunapa yarquyay!
¡Runakuna shayämunanpä nänita allitsayay!
¡Nänipita rumikunatapis jitariyay!
¡Llapan nación runakuna yaykayämunanpä señalta jawiyay!
11 Maytsaymanpis willakatsirmi Tayta Dios nirqan:
“Salvaqnin chämunanpäna kanqanta Sión runakunata willayay.
Chaykamurmi alli kawayman churanqa”.†
12 Kuyanqan runakunapä santu kayanqantami niyanqa.
Tayta Dios salvanqan runakuna kayanqantami niyanqa.
Jerusaléntanami täkuy munay marka kanqanta niyanqa.
Tayta Dios imaypis manana jaqinqan marka kanqantami niyanqa.