Contrankunata Tayta Dios ushakätsinqan
63
Edomcho kaykaq Bosra markapita ¿pitä shamuykan?¿Pitä puka latsapan jatishqa pasaypa munayyuq shamuykan?
“Noqa Tayta Diosmi shamuykä.
Noqami qamkunata salvanäpä kanqäta willakuykä.
Salvanäpä munayyuqmi kaykä”.
2 ¿Imanirtä üva jaruq runapa latsapannöpis latsapayki pukayashqa kaykan?
3 “Üvata llutskaqnömi conträkunata kikillä ushakätsishqä.†
Manami pipis yanapamashqatsu.
Pasaypa ajanashqa llutskaqnömi chipyaq ushakätsishqä.
Tsaymi yawarnin pillchipämaptin latsapäpis yawarllana kaykan.†
4 Unaypitanami yarparqä tsaynö ushakätsinäpä kanqanta.
Höra chämushqanami kuyanqä runakunata salvanäpä.
5 Wakpa kaypa rikachakurpis yanapamänanpä manami pitapis rikarqätsu.
Pipis mana kaptinmi mantsakashqa rikakurqä.
Pasaypa rabyanarmi conträkunata kikillä ushakätsishqä.†
6 Rabyanarmi markakunata ushakätsishqä.
Pasaypa ajanarmi chipyaq castigashqä.
Yawarnintapis yakutanörämi jichashqä”.†
Israel runakunata Tayta Dios kuyapanqan
7 Tayta Dios kuyakuq kanqantami imaypis willakushä.
Noqantsik raykuq imaykatapis ruranqanpitami Tayta Diosta agradëcikü.
Kuyapäkuq karmi Israel runakuna kaptintsik imaypis yanapamantsik.
8 Unay castantsikkunapämi Tayta Dios nirqan:
“Paykunaqa kuyanqä runakunami kaykäyan.
Wamräkuna karmi imaypis cäsukayämanqa”.
Tsaynö nirmi imaykapitapis salvarqan.
9 Paykuna ñakayaptinmi Tayta Diospa shonqunpis pasaypa llakikurqan.
Ñakayanqanpita kikinmi salvarqan.†
Pasaypa kuyapäkuq kayninwanmi marqakurkur apaqnö imaypis yanaparqan.
10 Tsaynö yanapaykaptinpis Tayta Diosta mana cäsukurmi Espíritu Santunta pasaypa llakikatsiyarqan.
Tsaymi Tayta Dios rabyanarnin paykunapa contran shärir pasaypa castigarqan.†
11 Tsaynö castigaptinmi yarpäyarqan Moisés kawanqan witsan Tayta Dios imanö salvanqanta.
Tsaymi niyarqan:
“¿Maytä Tayta Dios?
Paymi Moisésta churarqan castantsikkunata üsha mitsiqnö rikananpä.
Kuyanqan runakuna kayaptinmi lamarpa päsatsimurqan.
Tayta Diospa Santu Espïritunmi Moisésta yanaparqan.
Kananqa ¿maychötä Tayta Dios kaykan?
12 Paymi munayninwan Moisésta pushamurqan.
Lamartapis munayninwanmi ishkayman rakirqan.
Tsaynö ruranqanta manami imaypis qonqäshuntsu.†
13 Fiyu nänipa cawalluta päsatsiqnömi kuyanqan runakunata lamar chawpinpa päsatsimurqan.
14 Alli qewaman wäkakunata qatiqnömi alli kawayänanpä kaqman Tayta Diospa Espïritun pushamurqan.
Kuyanqan runakunata tsaynö pushamuptinmi Tayta Dios pasaypa munayyuq kanqanta pïmaypis musyayarqan”.†
Tayta Dios yanapananpä mañakunqan
15 Tayta Dios, chipipiykaq sagrädu ciëlucho taykanqaykipita rikaykallämuy.
Pasaypa kuyakuq y munayyuq kaykarqa ¿imanirtä yanapayämankinatsu?
¿Imanirtä shonquykipis chukruyäkushqa?
Kuyapäkuq kayniki ¿ushakashqaku?
¿Pasaypaku qonqaskayämashqayki?
16 Castan kayanqäta Abrahamwan Jacob ñëgayämaptinpis noqakunapa taytämi kaykanki.
Unaypita patsami salvamaqnï kaykanki.
17 Tayta Dios, ¿imanirtä llutanta rurayänäpä kachariykayämashqayki?
¿Imanirtä qampita mana mantsapakuyänäpä shonqükunatapis chukruyätsishqayki?
Sirviqniki wamraykikuna kaykäyaptïqa kuyapaykayämay.
18 Kuyanqayki santu runakuna kaykarpis wallka watallami rikatsiyämanqayki nacioncho täyashqä.
Mana respitaypami templuykimanpis conträkuna lluta yaykuyashqa.
19 Tsaymi imaypis mana kaykaqnö ni jutikita imaypis mana joqariqnö kaykäyä.