64
(63.19b) ¡Ima allirä kaykunman ciëluta kichaskir urämuptiki!Urämuptikiqa jirkakunapis pasaypami tsuktsukyäyanman.†
2 (1) Kashakunata nina rupar ushanqannö y manka timpunqannömi shamuptiki nacionkunapis tsuktsukyäyanman.
Munayyuq kanqaykitami contraykikunapis tantiyayanman.
3 (2) Unay urämurmi pasaypa mantsariypä kaqkunata rurarqayki.
Tsaynö ruraptikimi jirkakunapis pasaypa tsuktsukyäyarqan.
4 (3) Manami pipis musyashqatsu ni rikashqatsu qamnö munayyuq kanqanta.
Qamman yärakamuqkunapä raykuqmi mantsakaypä kaqkunata ruranki.†
5 (4) Munanqaykinö kushishqa kawaqkunata yanapankimi.
Tsaynö kaptinpis manami munanqaykinötsu kawayä.
Unaypita patsa kananyaqpis jutsata rurar kawayaptïmi pasaypa rabyakushqayki.
Tsaynölla kawarqa ¿imanöparä salvakuyäman?
6 (5) Noqakunaqa qanranö melanaypämi kaykäyä.
Allita rurayanqäpis warmipa killa qeshyanwan qanratashqa ratashnömi kaykan.
Llapäkunapis qarwashtaykar jachapa rapran ushakaqnömi ushakaykäyä.
Imaykatapis wayra apaqnömi mana alli yarpaynïkuna jutsa rurayman apayäman.
7 (6) Manami pipis qamman mañakayämuntsu ni yärakayämuntsu.
Tsaymi noqakunapita pakakushqayki.
Jutsa ruraq kayaptïmi kachariykayämashqayki.
8 (7) Tayta Dios, imanö kashqa kayaptïpis qammi Taytäkuna kaykanki.
Noqakunaqa mitunöllami kaykäyä.
Qamnami manka ruraqnö kaykanki.
Llapäkunapis makiki ruranqallanmi kaykäyä.†
9 (8) Tayta Dios, tsayläya ama ajanaynatsu.
Jutsäkunatapis ama yarparaynatsu.
Kuyanqayki runakuna kaykäyaptïqa kuyapaykayällämay.
10 (9) Santu markakunatapis tsunyätsiypami ushakätsiyashqa.
Sión jirkanta ushakätsiyaptin Jerusalén markapis raqällanami tikrashqa.
11 (10) Unay castäkuna adorayäshunqayki kuyayllapä templuykitapis chipyaqmi kayayashqa.
Kuyayllapä kaqkunatapis llapantami ushakätsiyashqa.
12 (11) Tayta Dios, tsaynö rurayanqanta rikaykar ¿manatsurä paykunata castigankiman?
¿Manatsurä yanapaykayämankiman?
¿Tsaynöllatsurä imayyaqpis castigayämanki?