Mana cäsukuqkunata castigananpä ninqan
65
Tayta Diosmi nin:“Mana mañakamaqkunatami yanapashqä.
Mana ashimaqkunatami parlapashqä.†
Mana rugakamaqkunatami nishqä: ‘¡Yanapanäpä kaychömi kaykä!’
2 Mana cäsukamaq runakunamanmi qoyay qoyay makïta makyarashqä.
Tsaynö kaykaptïpis kikinkuna munayanqannöllami llutankunata rurar kawaykäyan.†
3 Rikanächo llutankunata mana kachaypa rurarmi pasaypa ajanätsiyäman.
Ïdulukunapä sacrificiutapis huertakunachömi rupatsiyan.
Adöbiwan pirqashqa altarkunachöpis ïdulukunapämi inciensiuwan qoshnitsiyan.
4 Wanushqakunata tapukurmi panteonkunacho waraypa jamaräyan.
Kuchi aytsatapis mikuyanmi.†
Mana mikuna uywakunapa aytsantapis caldukuyanmi.
5 “Tsaynö ruraykarmi runa mayinta niyan:
‘¡Noqakunaqa qamkunapita mas santumi kayä!
¡Ama witipäyämaytsu!
¡Ama yatayämaytsu!’
“Utsuta rupatsiyaptin qoshnin qosqunqannömi tsay runakunapa jutsankuna ajanätsiyäman.
Mana upiypa nina rupaqnömi llutankunata imaypis ruraykäyan.
6 Paykuna jutsata rurayanqan llapanmi librücho qellqaraykan.
Mana castigaypaqa manami kachaykushätsu.
Llutankunata rurayanqanman tupumi pasaypa castigashä.
7 Unay castankunanöllami jirkakunacho inciensiuwan ïdulukunata qoshniykätsiyan.
Jirkankunacho ïdulukunata adorarmi ajanaykätsiyäman.
Tsaymi kikinkunapa jutsankunapita y unay castankunapa jutsankunapitapis castigashä.
Jutsata rurayanqanman tupumi castigashä”.
Tayta Diosmi tsaynö nin.
Sirviqninkunata salvananpä ninqan
8 Tayta Diosmi nin:
“Juk sartallatapis alli üvata tariykurqa kushishqami niyan:
‘Kay üvaqa wayuykanrämi. Ama mutushuntsu’.
Runakuna niyanqannöllami noqapis jutsa ruraqkunata ushakätsirpis sirvimaqnïkunataqa kuyapäshä.
9 Tsaymi nacionnïcho täyänanpä Israel runakunapita y Judá runakunapita akrashä.
Tsay akranqä runakunapa herencianmi kay nación kanqa.
Sirvimaqnïkuna karmi kaycho täyanqa.
10 Noqaman yärakamuqkunapa üsha mitsikunanmi Sarón pampapis kanqa.
Acor Pampachöpis paykunapa wäkankunami kayanqa.†
11 “Wakinnikikunaqa kachariykayämashqaykimi.
Sagrädu jirkätapis manami cäsuyankinatsu.
‘Suertita taritsikuq diospä’ nirmi ïdulukunata qaraykäyanki.
‘Alli destïnuta taritsikuq diospä’ nirmi vïnutapis wiñapaykäyanki.
12 Tsaynö rurayanqaykipitami espädawan wanutsiyäshunaykipä destinashayki.
Qayaptïpis manami wiyayämashqaykitsu.
Parlapaptïpis manami cäsuyämashqaykitsu.
Qamkunaqa mana munanqä kaqta y mana gustämanqan kaqtami ruraykäyanki”.†
13 Tsaymi Tayta Dios nin:
“Sirvimaqnïkunaqa pacha juntami mikuyanqa.
Qamkunami itsanqa mallaqäyanki.
Sirvimaqnïkuna upuyänanpä yaku kanqami.
Qamkunami itsanqa pasaypa yakunäyanki.
Sirvimaqnïkuna kushishqami kawayanqa.
Qamkunami itsanqa penqakuycho kayanki.
14 Sirvimaqnïkunaqa llapan shonqunwan kushikurmi cantayanqa.
Qamkunami itsanqa shonqu nanaywan pasaypa waqayanki.
15 “Kikïmi qamkunata wanutsiyäshayki.
Tsaymi pipis ajanätsiqninta maldicionar niyanqa:
‘Israel runakunatanömi qamtapis wanutsishunki’.
Sirvimaqnïkunatami itsanqa mushuq jutita churapäshä.
16 Tsay witsan pipis bendisaq kaqqa noqapa jutïchömi bendisanqa.
Tsaynöllami pipis juraq kaqqa noqapa jutïcho juranqa.
Unay ñakayanqankunatapis qonqaykuyanqami.
Jutsa rurayanqanpita castiganqätapis manami yarparäyanqanatsu”.
Ciëlupis y kay patsapis mushuq kananpä ninqan
17 “Ciëlutapis patsatapis mushuqtanami kamashä.†
Llapanpis mushuqna kaptinmi unay päsanqan kaqkunataqa pipis yarpanqanatsu.
18 Tsaynö kananpä kaykaptinqa ¡kushikuyay!
Kushikuypä kananpämi Jerusaléntapis mushuqtana kamashä.
Tsaycho taqkunaqa kushishqami imayyaqpis kawayanqa.
19 Mushuq Jerusalénta rikar kikïpis kushikushämi.
Kuyanqä runakunata tsaycho taykaqta rikarmi pasaypa kushikushä.
Paykunaqa manami imaypis waqayanqanatsu ni llakikuyanqanatsu.†
20 “Wamrakunapis yuriyanqanpita juk ishkay junaqllata mananami wanuyanqanatsu.
Awkinkunapis pasaypa awkinyäyanqanyaqmi kawayanqa.
Juk pachak (100) watayuq wanuqkunapis chölullarä kaykar wanukuqnömi kayanqa.
Juk pachak watamanpis manarä char wanuqpäqa maldicionashqa kanqantami niyanqa.
21 “Wayinkunata shäritsirmi kuyanqä runakuna tsaycho täyanqa.
Üvata plantarmi wayuyninta mikur kawayanqa.†
22 Wayita shäritsiyanqanchöpis manami juk runakunatsu täyanqa, tsaypa trokinqa kikinkunami tsaycho täyanqa.
Üvata plantayanqantapis manami juk runakunatsu pallayanqa, tsaypa trokinqa kikinkunami pallayanqa.
Jachakunanömi kuyanqä runakunapis atska wata kawayanqa.
Arukuyanqanwanmi akranqä runakuna kushishqa kawayanqa.
23 Wallällaqa manami arukuyanqatsu.
Wamrankunapis manami wanuyanqanatsu.
Tsaynö kayanqa bendicionnïta chaskiq runakunapita aywaraq karmi.
Paykunapita aywaraqkunapis tsaynöllami bendicionnïta chaskiyanqa.
24 “Manaräpis mañakayämaptinmi yanapaykäshäna.
Rugakayämayta manaräpis ushayaptinmi awnishä.
25 Üshawan atuqpis juntumi qewata mikuyanqa.
Leonpis wäkanömi qewata mikunqa.
Culebrami itsanqa maldicionashqa kar allpallata mikur kawanqa.†
Sagrädu jirkannïcho manami pipis mana allikunata rurayanqanatsu”.†
Tayta Diosmi tsaynö nin.