Tayta Diosta mana respitaqkuna imanö kayänanpä kanqanpis
66
Tayta Diosmi nin:“Ciëluqa trönümi.†
Patsapis jarukunämi.†
Tsaynö kaykaptinqa ¿maychörä wayita shäritsiyankiman?
¿Maychörä jamakunäta ruratsiyankiman?
2 Kikïmi ciëlutapis patsatapis kamashqä.
Kamashqa kaptïmi tsaykunapis kaykan.†
Noqa Tayta Diosmi tsaynö nï.
“Noqaqa llampu shonqu kaqkunata kuyaparmi yanapä.
Paykunaqa jutsata rurarmi pasaypa llakikuyan.
Ninqäkunataqa mantsapakurmi cumpliyan.
3 Wakin runakunami itsanqa jutsa rurayta mana kacharir kikin munayanqannö kawayan.
Tsaymi noqapä töruta rupatsiyanqanpis runa mayinta wanutsiyanqannö melanaypä kaykan.
Üshata altarcho rupatsiyanqanpis allquta pishtayanqannömi kaykan.
Tsaki mikuy ofrendankunata apayämunqanpis kuchipa yawarninta jichayanqannömi kaykan.
Adorayämar inciensiuwan qoshnitsiyanqanpis ïdulukunapä qoshnitsiyanqannömi kaykan.
4 Paykunataqa mantsariypä desgraciawanmi castigashä.
Qayaykaptïpis manami contestayämashqatsu.
Willaykaptïpis manami chaskikuyashqatsu.
Tsaypa trokinqa rikaykaptïmi jutsata rurayashqa.
Mana munanqä kaqtami rurayashqa”.†
5 Tayta Diosta wiyakuq kaqkuna, kanan niyäshunqaykita shumaq tantiyakuyay.
Paymi nishunki:
“Noqaman yärakayämunqaykipitami wakin marka mayikikuna chikiyäshunki.
Tsaymi asipar niyäshunki:
‘Kushishqa kawayanqaykita rikayänäpä Tayta Dios mä kanan yanapayäshuy’.
Tsaynö nir manakaqman churayäshunqaykipitami kikinkuna penqakur umpuräyanqa.
6 Contrayki kayanqanpitami pasaypa castigashä.
Markapita y templupitapis tsay runakuna qayaräyanqan wiyakämunqami”.
Mushuq Jerusalén kananpä ninqan
7 “Qeshyaq warmipis manarä höranchömi qeshyakushqa.
Qeshyakunanpä manaräpis nanay tsariptinmi ollqu wamrata qeshyakushqa.†
8 ¿Pillaqa wiyashqatsurä imayllapis tsaynö kanqanta?
¿Pillaqa rikashqatsurä imayllapis tsaynö päsanqanta?
¿Juk junaqllacho runakuna miranmantsurä juk nación kayanqanyaq?
¿Juk yuriyllacho yuriskinmantsurä juk nacionman juntaqpä?
Tsaynö kaptinpis Siónmi itsanqa nanay tsarinqan höra wamrankunata qeshyakunqa.a
9 Mirananpä kamaykarqa ¿manatsurä qeshyakunanpäpis yanapashä?
Wamrayuq kayänanpä kamaykarqa ¿wamra yurinanta michämantsurä?b
Noqa Tayta Diosnikikunami tsaynö nï.
10 “¡Jerusalénta kuyaqkuna, Jerusalénwan kushikuyay!
¡Jerusalénpä waqaqkuna, llapayki kushikuyay!
11 Jerusalénmi imayka mamaykinö pachayki juntanqanyaq alli allillata qarashunki.
Wamra chuchur kushikunqannömi shumaq kawar kushikuyanki”.
12 Tayta Diosmi nin:
“Noqa yanapaptïmi Jerusaléncho imaypis alli kaway kanqa.
Maytsay nacionkunami jakashqa mayunörä riquëzankunata apayämunqa.
Jerusalén marka mamaykinö karmi alli allillata qarashurniki marqaräshunki.
Millqayninman jamaykatsishurnikimi pasaypa kuyashunki.
13 Wawanta maman shoqaqnömi qamkunatapis Jerusaléncho shoqayäshayki”.
14 Tsaynö kaykaqta rikar pasaypami kushikuyanki.
Tamya witsan qewa lloqllunqannörämi qamkunapis tsaycho tarnin sänu kawayanki.
Sirviqninkunataqa Tayta Diosmi tsaycho yanapanqa.
Chikiqninkunatami itsanqa rabyanarnin castiganqa.
15 “Lunyaykaq nina rurinchömi Tayta Dios shamunqa.
Carrëtankunapis shukukuy wayranörämi shayämunqa.
Tsaynö shamunqa pasaypa rabyanarnin runakunata ninawan castigananpämi.
16 Ninawan y espädawan castigarmi llapan runakunata Tayta Dios juzganqa.
Tsaynö castigaptinmi atska runakuna wanuyanqa”.
17 Tayta Diosmi nin:
“Wakinnikiqa shumaq mayllakuskirmi ïdulukunata adorayänaykipä llallinakurrä huertakunaman aywaykäyanki.
Tsaynöllami kuchi aytsata, ukush aytsata y ima mana mikuna uywapa aytsantapis mikuykäyanki.
Tsaynö kayanqaykipitami llapaykikuna ushakäyanki.
Karu nacionkunacho willakuyänanpä ninqan
18 “Noqa musyämi imata ruraykäyanqaykitapis y imata yarpaykäyanqaykitapis. Tsaymi tiempu chämunqana llapan nación runakuna ima idiömata parlayaptinpis juk patsaman qorinäpä. Paykuna shamurmi munayyuq kanqäta rikayämanqa. 19 Munayyuq kanqäta rikayänanpämi tsaycho señalta rurashä.
“Kawaykar quëdaqkunata juklä nacionkunamanmi kachashä. Tsaymi chäyanqa Tarsisman, Libiaman y Lidiaman. Lidia nacioncho taqkuna pasaypami yachayan flëchawan flëchayta. Tsaynöllami chäyanqa Tubalman y Javánman. Wakintanami kachashä lamar kuchuncho kaykaq karu nacionkunamanpis. Tsay nacionkunacho taq runakuna imaypis manami wiyayashqatsu noqapita parlaqta ni rikayashqatsu munayyuq kanqäta. Tsay nacionkunachömi munayyuq kanqäta y salvakuq kanqäta willakuyanqa.
20 “Kachanqä runakunami noqapä ofrendata apamuqnö Israel mayinkunata maytsaypita pushayämunqa. Tsaymi cawallunkunawan, carrëtankunawan, andasninkunawan, mulankunawan y camëllunkunawanpis shayämunqa. Sagrädu jirkannïcho kaykaq Jerusalénmanmi chätsiyämunqa. Limpiu uyllukunawan tsaki mikuy ofrendata templüman apamuqnömi apayämunqa. Noqa Tayta Diosmi tsaynö nï.
21 “Paykunapitami wakinta akrashä sacerdötikuna y levitakuna kayänanpä. Noqa Tayta Diosmi tsaynö nï”.
Diosta adoraqkuna y contran shäriqkuna imanö kayänanpä ninqan
22 Mastami Tayta Dios nin: “Jutikita apayänanpämi qamkunapita aywaraqkuna imayyaqpis kayanqa. Mushuq ciëluwan mushuq patsa imayyaqpis kananpä kanqannömi† paykunapis mana ushakaypa kayanqa.† 23 Cada llullu killa y cada jamay junaqmi llapan runakuna templüman shamur adorayämanqa. Noqa Tayta Diosmi tsaynö nï.
24 “Templupita yarqurmi conträ shäriq runakunapa ayan jitaraykaqta rikayanqa. Tsay ayata mikuq kurukuna manami wanuyanqatsu. Tsaynöllami tsay ayakunata rupaq ninapis upinqatsu.† Tsayta rikarmi pïmaypis mantsakäyanqa”.