Rey Ezequías mantsarinqan
19
Asiria nacionpa mandaqnin rey ninqanta willayaptinmi rey Ezequías pasaypa mantsarir jatiraykanqan latsapanta rachiskir qachqa latsapata jatikurqan. Nirkurnami templuman aywaykur Tayta Diosta mañakurqan. 2 Amozpa tsurin profëta Isaíasta willayänanpämi kacharqan palaciuta cuidaq Eliaquimta, secretariu Sebnata y mas mayor sacerdötikunata. Tsaynö kachaptinmi qachqa latsapankuna jatishqa llapan aywayarqan. 3 Isaías kaqman chaykurmi rey Ezequías ninqanta willar niyarqan: “Kanan junaq pasaypa llakikuycho y penqakuychömi kaykantsik. Qeshyakuyta ñakar warmi kallpaynaq rikakunqannömi noqantsikpis kallpaynaq kaykantsik. 4 Tayta Dios wiyashqami kanqa Asiria nacionpa mandaqnin rey kachamunqan capitán paypa contran parlanqanta. Tsaynö parlanqanpita Tayta Dios castigaykullätsun. Taytay, tsay runa ninqannö mana ushakätsimänantsikpä Tayta Diosta mañakuykullay”.5 Rey Ezequíaspa yanapaqninkuna tsaynö willayaptinmi 6 Isaías nirqan: “Tayta Dios ninqanta mandamaqnintsik reyta willar niyay: Asiria nacionpa mandaqnin rey kachamunqan runakuna manakaqman churamar imaykata niyäshuptikipis ama mantsariytsu. 7 Noqami kamakätsishä markancho mana alli novedäta wiyananpä. Tsayta wiyar tsay rey kutiykuptinmi markancho wanutsiyanqa”.
8 Tsayyaqmi Asiria nacionpa mandaqnin reyqa Laquis markapita Libna markamanna atacaq aywarqan. Aywanqanta musyaskirmi Jerusalénman kachanqan runakuna paypa qepanta aywayarqan. 9 Libnacho kaykarmi Asiria nacionpa mandaqnin rey wiyarqan Etiopía nacionpa mandaqnin Tirhaca soldädukunawan payta atacayänanpä shamuykäyanqanta. Tsay soldädukunawan pelyaq yarqunanpämi Ezequíaspä cartata qellqaskir kachakunawan apatsirqan. Tsay cartachömi nirqan:
10 Judá nacionpa mandaqnin rey Ezequías: Yärakunqayki Dios paqtä nishurqayki Jerusalénta atacayta mana kamäpakuyänäpä kanqanta. Tsaynö nishuptikipis ama criyiytsu. 11 Qam musyankimi Asiria nacionpa llapan mandaqnin reykuna mayqan naciontapis ushakätsiyta munarqa ushakätsiyanqanta. ¿Tsaytsurä qam salvakunkiman? 12 Unay castäkunaqa Gozán, Harán y Resef nacionkunatapis ushakätsiyarqanmi. Telasarcho taq Bet-edén runakunatapis ushakätsiyaptin manami mayqan diosninkunapis salvayarqantsu. 13 Hamat nacionpa, Arfad nacionpa, Sefarvaim nacionpa, Hena nacionpa y Iva nacionpa mandaqnin reykuna ushakäyanqannömi qampis ushakanki.
Tayta Diosta Ezequías mañakunqan
14 Tsay cartata liyiskirmi Ezequíasqa templuman aywaykur Tayta Diospa ñöpanman cartata kichaskir churarqan. 15 Tsaymi Tayta Diosta mañakur nirqan: “Israel runakunata kuyaq Tayta Dios, querubinkunapa chawpinchömi jamaraykanki.† Qamllami kay patsacho llapan nacionkunapä munayyuq kanki. Qamllami kay patsata y ciëlutapis kamashqayki. 16 Tayta Dios, mañakamunqäta wiyaykallämay. Imanö kayanqätapis rikaykullay. Senaquerib kachamunqan capitán imaykatapis contrayki ninqanta ama qonqaykuytsu.
17 “Taytay, cartacho ninqannöllami Asiria nacionpa mandaqnin reykunaqa nacionkunata pasaypa ushakätsir 18 adorayanqan ïdulukunatapis kayar ushayashqa. Tsay ïdulukunaqa manami rasunpaypatsu munayyuq, sinöqa qerupita y rumipita rurayanqallanmi karqan. Tsaymi Asiria runakuna ushakätsiyaptinpis tsay ïdulukuna imanayarqanpistsu.
19 “Tayta Diosllä, Asiria nacionpa mandaqnin reypa makinpita salvaykallämay. Tsaynöpami maytsay nacioncho taq runakuna musyayanqa qamlla munayyuq Dios kanqaykita”.
Senaqueribpä Isaías willakunqan
20 Tsaypitanami Amozpa tsurin Isaías rey Ezequíasman willakatsir nirqan: “Israel runakunata kuyaq Tayta Diosmi nin: ‘Noqa wiyashqämi Asiria nacionpa mandaqnin rey Senaqueribpa makinpita salvanäpä mañakamanqaykita. 21 Tsaymi tsay reypä nï:
“ ‘Qamta manakaqman churashurnikimi Sión asikun.
Jerusalén markapis päsaptiki umantami awipäshunki.
22 ¿Imanirtä manakaqman churamar ashllimashqayki?
¿Imanirtä conträ parlashqayki?
¿Imanirtä yuraq ñawikipa rikapämashqayki?
¿Manaku musyanki Israel runakunapa santu Diosnin kanqäta?
23 “ ‘Kachamunqayki runakunawan ashllitsimarmi nishqayki:
“Yupaytapis mana atipaypä carrëtäkunawanmi jirkakunamanpis yaykushqä.
Pipis mana yaykunqan Líbano jirkakunamanmi chashqä.
Tsaychömi jatusaqnin cedrukunatapis mutushqä.
Kuyayllapä pïnukunatapis mutuykarmi ushashqä.
Mas altunnin jirkakunamanpis chashqämi.
Mas kuyayllapä muntikunamanpis yaykushqämi.
24 Juklä nacionkunachömi pözuta uchkur yakuta upushqä.
Chakilläwanmi Egiptucho llapan mayukunatapis tsapashqä”.a
25 “ ‘Tsaynö nir ¿manaku tantiyanki llapanchöpis yanapanqäta?
Manami kikillaykipitatsu nacionkunata vincishqayki.
Vincinaykipäqa noqami unaypita patsa kamakätsishqä.
Noqa kamakätsiptïmi llapantapis tsaynö rurashqayki.
Tsaymi jinchi murallashqa markatapis juchutsir qotushqa rumitanö jaqishqayki.
26 Noqa kamakätsiptïmi tsay markakunacho taqkunapa kallpankunapis ushakashqa.
Pasaypa mantsakashqa karmi qewanö ushakäyashqa.
Wayi janancho wiñamuq qewakuna achaywan tsakiqnömi ushakäyashqa.
27 “ ‘Noqa musyämi llapan ruranqaykita.
Musyämi maypa aywanqaykita y maypita shamunqaykita.
Musyämi conträ shärinqaykitapis.
28 Conträ shärir pasaypa ollqunqaykipitami senqaykiman argöllata churashä.
Shimikimannami frënuta churashä.
Nirkurmi shamunqayki nänillapa kutitsishayki’ ”.
29 Tsaypitanami Ezequíasta Isaías nirqan:
“Ninqäkuna rasunpaypa kanqanta musyanaykipä kanan willashayki ima päsananpä kaqtapis.
Kay wata y watanpis chakracho kikin jeqamuqllatami mikuyanki.
Juknin watami itsanqa murukuyanki y cosechayanki.
Tsaynöllami üvakunata plantayanki y cosechayanki.
30 “Kawaykar quëdaq Judá runakunaqa shumaq michïkushqa jachanömi mana yarquypa markancho täyanqa.
Alli wayuq jachanömi atskaman mirayanqa.
31 Manami llapan Jerusalén runakunatsu wanuyanqa.
Sión jirkancho taq wakin runakuna kawaykar quëdayanqarämi.
Llapanta mandaq Tayta Diosmi kuyashurniki salvayäshunki”.
32 “Asiria nacionpa mandaqnin reypämi Tayta Dios nin:
Jerusalénman manami yaykunqatsu.
Manami ni juk flëchayllapis flëchanqatsu.
Manami escüdun aptashqa atacanqatsu.
Marka tsaparaq pirqa waqtankunamanpis yaykunanpä manami allpata qotutsinqatsu.
33 Shamunqallanpami kutikunqa.
Manami imanöpapis Jerusalénman yaykunqatsu.
Noqa Tayta Diosmi tsaynö nï.
34 Kikïmi kay markata tsapar salvashä.
Tsaynö salvashä runakuna alabayämänanpämi.
Tsaynö rurashä sirvimaqnï Davidta awnishqa karmi”.
35 Tsaypitanami tsay paqas Asiria soldädukunapa campamentunman aywaykur Tayta Diospa angelnin juk pachak puwaq chunka pitsqa waranqa (185,000) soldädukunata wanutsirqan. Waraynin tuta kawaykar quëdaq soldädukuna shärikurmi tsaytsika soldädu mayinkuna wanushqa jitaraykäyaqta tariyarqan. 36 Tsaymi Asiria nacionpa mandaqnin rey Senaquerib campamentunta apakurkur soldädunkunawan Nínive markaman kutikuyarqan.
37 Juk kutichömi diosnin Nisrocpa templuncho Senaquerib adoraykaptin tsurinkuna Adramelec y Sarezer yaykuskir espädankunawan wanuskatsiyarqan. Nirkurnami qeshpir aywakuyarqan Ararat partiman. Senaqueribpa trokin tsurin Esar-hadónnami rey kayta qallaykurqan.