3 Tayta Diosta cäsukur unay castan David kawanqannömi Ezequíaspis kawarqan. 4 Paymi markakunacho kaykaq altarkunata juchutsirqan y runakuna adorayanqan wankakunatapis pakitsirqan. Tsaynöllami tseqtatsirqan Asera diösapä jawiyanqan raku qerukunatapis. Moisés ruranqan bronci culebratapis^† pakitsirqanmi. Tsaynö pakitsirqan Israel runakuna adorar inciensiuwan qoshnitsiyaptinmi. Tsay broncipita rurashqa culebrapa jutinmi Nehustán karqan.

5 Israel runakunata kuyaq Tayta Diosmanmi rey Ezequías llapan shonqunwan yärakurqan. Judá nacioncho punta y qepa kaq reykunapis manami paynöqa Tayta Diosman yärakuyarqantsu. 6 Ezequíasqa Tayta Dios munanqannö kawarmi wanunqanyaqpis Moisés chaskinqan mandamientukunata llapanta cumplirqan.

7 Tayta Dios yanapaptinmi llapan ruranqankunapis allilla karqan. Tsaymi Asiria nacionpa mandaqnin reypa munaynincho kaykanqanpita yarqukurqan. 8 Tsaynöllami filisteo runakunawan pelyar vincirqan rikachakuna törrikunacho täyaptinpis y murallashqa jatun markakunacho täyaptinpis. Tsaynö vincirqan Gaza markayaq y ñöpankunacho kaykaq markakunayaqmi.

9 Tsaypitanami Asiria nacionpa mandaqnin rey Salmanasar Samaria markata jiruruypa corralaskir soldädunkunawan atacayarqan. Tsayqa karqan Ezequías chusku wata Judá nacionpa mandaqnin rey kaykaptin y Elapa tsurin Oseas qanchis wata Israel nacionpa mandaqnin rey kaykaptinmi. 10 Kimsa wata tsaynö atacarmi Israel runakunata vinciyarqan. Tsayqa karqan Judá nacioncho Ezequías soqta wata rey kaykaptin y Oseas isqun wata Israel runakunapa mandaqnin rey kaykaptinmi.

11 Israel runakunata vinciskirmi Asiriaman soldädunkunawan apayarqan. Asiriaman chaykurmi Halah markaman y Gozáncho kaykaq Habor mayu ñöpancho kaykaq markakunaman tsaycho täyänanpä churarqan. Tsaynöllami Media runakunapa markankunaman tsaycho täyänanpä churarqan. 12 Tsaynö apayarqan Tayta Dioswan pactu ruranqanta manakaqman churayanqanpita, mandanqankunata mana wiyakuyanqanpita y Tayta Diospa sirviqnin Moisés ninqankunata mana cäsukuyanqäpitami.

13 Chunka chusku wata Ezequías rey kaykaptinmi Asiria nacionpa mandaqnin rey Senaquerib Judá nacionman soldädunkunawan chäyarqan. Chaykurmi jinchi murallashqa markakunata atacar qechuyarqan. 14 Judá nacioncho kaykaq Laquis markata atacaykäyaptinmi rey Ezequías juk willakuqta kacharqan Senaqueribta ninanpä: “Taytay, rey Ezequías impuestuta mana pägashunqaykipitashi perdonaykunki. Kaypita yarqukuptikiqa aykatapis mañanqaykitashi impuestuta pägashunki”.

Tsaymi rey Senaquerib nirqan: “Tsaynö kanan kaptinqa isqun waranqa isqun pachak (9,900) kïlu qellayta y isqun pachak isqun chunka (990) kïlu qorita pägamätsun”.

15 Tsaynö niptinmi Ezequíasqa palaciunpita y Tayta Diospa templunpita llapan qellayta qoriskir entregarqan. 16 Rey Senaqueribta pägananpämi templupa punkunkunapita y marcunkunapitapis kikin laqatsinqan qorikunata jipitsirqan.

17 Tsaynö entregaptinpis Senaqueribqa Laquis markapita tsaytsika soldädunkunatami Jerusalénta atacayänanpä Ezequíasman kacharqan. Tsay soldädukunata pushakurkurmi soldädukunapa capitannin y ishkay yärakunqan mandashiqninkunapis aywayarqan. Jerusalénman chaykurmi jana kaq pözuman aywaq sekya ñöpancho campamentuta rurayarqan. Tsayqa taqshakuna pampaman aywaq nänichömi karqan. 18 Tsaypitanami qayatsiyarqan Ezequíasta. Qayatsiyaptinmi paykunawan parlayänanpä rey Ezequías kacharqan Hilcíaspa tsurin Eliaquimta, Sebnata y Asafpa tsurin Joata. Eliaquimmi karqan palaciucho kaqkunata cuidaq, Sebnami karqan secretariu y Joanami karqan Judácho ima päsanqankunatapis qellqaq.

19 Paykunatami mandaq capitán nirqan: “Ezequíasman kutiykur Asiriapa mandaqnin rey ninqanta willar niyay: ‘¿Piman yärakurtä qam yarpanki vinciyämänaykipä kanqanta? 20 ¿Imanirtä yarpaykanki alli parlaq kanqallaykipita guërracho vinciyämänaykipä kanqanta? ¿Piman yärakurtä noqakunapa conträ shäriykanki? 21 Egipto runakunaman yärakuptikipis paykunaqa manami yanapayäshunkitsu. Mandaqnin rey Faraónpis shoqushman tsarikuptiki maki paltaykiman kallapa yaykuqnömi qamkunapä kanqa.^† Payman yärakuqkunapäqa imaypis tsaynömi kaykan.

22 “ ‘ “Tayta Diosnïmanmi yärakuykäyä” nimaptikipis manami paypis yanapashunkitsu. Markakunacho kaq altarkunata juchutsir^† Judá runakuna Jerusalénllacho Tayta Diosta adorayänanpä ninqaykipitami payqa rabyashqa kaykan’ ”.

23 “Noqakunawan pelyayta munarqa mandamaqnï rey Senaqueribwan parlay. Cawallu muntaq soldäduykikuna kaptinqa noqami ishkay waranqa (2,000) cawallukunata pelyanantsikpä kamaripäshayki. 24 Guërra carrëtakunata y cawallu muntakuqkunata Egiptupita apamurpis tsayrä yachakuq capitannïkuna mandanqan soldädunkunallatapis manami vinciyta kamäpakuyankitsu. 25 Tsaynöpis kikin Tayta Dios nimashqa kay nacionta ushakätsiq shayämunäpä. Ama yarpäyaytsu kikïkunapa yarpaylläpita kay nacionta ushakätsiq shayämunqäta”.

26 Tsaynö niptinmi Hilcíaspa tsurin Eliaquim, Sebna y Joa Asiria soldädukunapa mandaqnin capitanta niyarqan: “Murälla janancho kaykaq runakuna niyanqaykita mana tantiyayänanpä hebreo idiömapa ama parlayaytsu. Tsaypa trokinqa arameo idiömacho parlapaykayämay. Noqakunaqa arameo idiömata tantiyayämi”.

27 Tsaynami Asiria nacionpa capitannin nirqan: “Manami patronllaykita ni qamkunallata willayänäpätsu Asiria nacionpa mandaqnin rey kachayämashqa, tsaypa trokinqa murälla janancho kaykaq runakunatapis willayänäpämi. Atacayaptïmi qamkunaqa pasaypa mallaqar rakchaykikunata mikuyanki y yakunarmi ishpaynikikunatapis upuyanki”.

28 Nirkurmi Asiria nacionpa capitannin shärirkur hebreo idiömacho jinchi parlarqan: “Shumaq wiyakuyay Asiria nacionpa mandaqnin rey ninqanta. 29 Paymi nin: ‘Rey Ezequías niyäshunqaykita ama cäsuyaytsu. Munaynïpita manami pay salvayäshunkitsu. 30 Tayta Diosllaman yärakuyänaykipä niyäshuptikipis ama criyiyaytsu. Tayta Dios salvayäshunaykipä niyäshuptikipis ni kay markata pay tsapänanpä kanqanta niyäshuptikipis 31 ama criyiyaytsu’.

“Asiria nacionpa mandaqnin reymi nin: ‘Conträ shäriyänaykipa trokinqa alli chaskiyämay. Noqapa munaynïcho karqa jukniki juknikimi üvaykikunata y hïgusnikikunata añaw mikuyanki. Tsaynöllami kikikikuna uchkutsiyanqayki pözupita yakutapis añaw upuyanki. 32 Tsaynö kawayänaykipämi juk nacionman apayäshayki. Tsay nacionqa kay nacionnikinömi kaykan. Tsaychöqa tantata rurayänaykipä trïgupis allimi wayun. Üvapis vïnuta rurayänaykipä allimi wayun. Tsaynöllami tsaychöqa olïvu aceiti y abëjapa mishkin tsaytsika kaykan. Wanuyänaykipa trokin kushishqami tsaycho kawayanki.

“ ‘Ezequías ninqantaqa ama cäsuyaytsu. “Tayta Diosmi salvamäshun” niyäshurnikipis engañaykäyäshunkimi. 33 Manami mayqan nacionpa diosninkunapis mayjina mañakuyaptinpis munaynïpita salvashqatsu. 34 Hamat runakunata atacaptï ¿maychötä diosninkuna kaykäyarqan? Tsaynöpis Arfad runakunata, Sefarvaim runakunata, Hena runakunata y Iva runakunata atacaptï ¿maychötä diosninkuna kaykäyarqan? Samaria markata atacaptïpis manami mayqan diospis salvashqatsu. 35 Tsay nacionkunapa diosninkunapis manami salvayta kamäpakuyashqatsu. Tsaynö kaykaptinqa kanan ¡imanöpashi Jerusalénta makïpita Diosnikikuna salvaykunqa!’ ”

36 Tsaynö niptinpis murälla janancho kaykaq runakuna imatapis manami parlakuyarqantsu. Paykunataqa rey Ezequíasmi yätsirqan imatapis mana parlakuyänanpä. 37 Tsaymi Hilcíaspa tsurin Eliaquim, Sebna y Asafpa tsurin Joa pasaypa llakikurnin latsapankunatapis rachir ushayarqan. Eliaquimmi karqan palaciucho kaqkunata imatapis cuidaq, Sebnami karqan secretariu y Joanami karqan Judácho ima päsanqankunatapis qellqaq. Nirkurmi rey Ezequíasman aywayarqan Asiria nacionpa mandaqnin runa imata ninqantapis willayänanpä.