2 Rey Ezequíaspa contran shärirmi Laquis markapita tsaytsika soldädunkunatawan capitanninta Jerusalénman Senaquerib kacharqan. Jerusalénman chaykurmi jana kaq pözuman aywaq sekya ñöpancho campamentuta rurayarqan. Tsayqa taqshakuna pampaman aywaq nänichömi karqan. 3 Tsaymi tsay capitanwan parlayänanpä Jerusalénpita aywayarqan Hilcíaspa tsurin Eliaquim, Sebna y Asafpa tsurin Joa. Eliaquimmi karqan palaciucho kaqkunata cuidaq, Sebnami karqan secretariu y Joanami karqan Judácho ima päsanqankunatapis qellqaq.

4 Chäyaptinmi capitán nirqan: “Ezequíasman kutiykur Asiriapa mandaqnin rey ninqanta willar niyay: ‘¿Piman yärakurtä qam yarpanki vinciyämänaykipä kanqanta? 5 ¿Imanirtä yarpaykanki alli parlaq kanqallaykipita guërracho vinciyämänaykipä kanqanta? ¿Piman yärakurtä noqakunapa conträ shäriykanki? 6 Egipto runakunaman yärakuptikipis paykunaqa manami yanapayäshunkitsu. Mandaqnin rey Faraónpis shoqushman tsarikuptiki maki paltaykiman kallapa yaykuqnömi qamkunapä kanqa.^† Payman yärakuqkunapäqa imaypis tsaynömi kaykan.

7 “ ‘ “Tayta Diosnïmanmi yärakuykäyä” nimaptikipis manami paypis yanapashunkitsu. Markakunacho kaq altarkunata juchutsir Judá runakuna Jerusalénllacho Tayta Diosta adorayänanpä ninqaykipitami payqa rabyashqa kaykan’ ”.

8 “Noqakunawan pelyayta munarqa mandamaqnï rey Senaqueribwan parlay. Cawallu muntaq soldäduykikuna kaptinqa noqami ishkay waranqa (2,000) cawallukunata pelyanantsikpä kamaripäshayki. 9 Guërra carrëtakunata y cawallu muntakuqkunata Egiptupita apamurpis tsayrä yachakuq capitannïkuna mandanqan soldädunkunallatapis manami vinciyta kamäpakuyankitsu. 10 Tsaynöpis kikin Tayta Dios nimashqa kay nacionta ushakätsiq shayämunäpä. Ama yarpäyaytsu kikïkunapa yarpaylläpita kay nacionta ushakätsiq shayämunqäta”.

11 Tsaynö niptinmi Eliaquim, Sebna y Joa Asiria soldädukunapa mandaqnin capitanta niyarqan: “Murälla janancho kaykaq runakuna niyanqaykita mana tantiyayänanpä hebreo idiömapa ama parlayaytsu. Tsaypa trokinqa arameo idiömacho parlapaykayämay. Noqakunaqa arameo idiömata tantiyayämi”.

12 Tsaynami Asiria nacionpa capitannin nirqan: “Manami patronllaykita ni qamkunallata willayänäpätsu Asiria nacionpa mandaqnin rey kachayämashqa, tsaypa trokinqa murälla janancho kaykaq runakunatapis willayänäpämi. Atacayaptïmi qamkunaqa pasaypa mallaqar rakchaykikunata mikuyanki y yakunarmi ishpaynikikunatapis upuyanki”.

13 Nirkurmi Asiria nacionpa capitannin shärirkur hebreo idiömacho jinchi parlarqan: “Shumaq wiyakuyay Asiria nacionpa mandaqnin rey ninqanta. 14 Paymi nin: ‘Rey Ezequías niyäshunqaykita ama cäsuyaytsu. Munaynïpita manami pay salvayäshunkitsu. 15 Tayta Diosllaman yärakuyänaykipä niyäshuptikipis ama criyiyaytsu. Tayta Dios salvayäshunaykipä kanqanta niyäshuptikipis ni kay markata pay tsapänanpä kanqanta niyäshuptikipis 16 ama criyiyaytsu’.

“Asiria nacionpa mandaqnin reymi nin: ‘Conträ shäriyänaykipa trokinqa alli chaskiyämay. Noqapa munaynïcho karqa jukniki juknikimi üvaykikunata y hïgusnikikunata añaw mikuyanki. Tsaynöllami kikikikuna uchkutsiyanqayki pözupita yakutapis añaw upuyanki. 17 Tsaynö kawayänaykipämi juk nacionman apayäshayki. Tsay nacionqa kay nacionnikinömi kaykan. Tsaychöqa tantata rurayänaykipä trïgupis allimi wayun. Üvapis vïnuta rurayänaykipä allimi wayun.

18 “ ‘Tayta Diosmi salvamäshun’ niyäshuptikipis Ezequíasta ama criyiyaytsu. Manami mayqan nacionpa diosninkunapis mayjina mañakuyaptinpis munaynïpita salvashqatsu. 19 Hamat runakunata atacaptï ¿maychötä diosninkuna kaykäyarqan? Tsaynöpis Arfad runakunata y Sefarvaim runakunata atacaptï ¿maychötä diosninkuna kaykäyarqan? Samaria markata atacaptïpis manami mayqan diospis salvashqatsu. 20 Tsay nacionkunapa diosninkunapis manami salvayta kamäpakuyashqatsu. Tsaynö kaykaptinqa kanan ¡imanöpashi Jerusalénta makïpita Diosnikikuna salvaykunqa!”

21 Tsaynö niptinpis murälla janancho kaykaq runakuna imatapis manami parlakuyarqantsu. Paykunataqa rey Ezequíasmi yätsirqan imatapis mana parlakuyänanpä. 22 Tsaymi Hilcíaspa tsurin Eliaquim, Sebna y Asafpa tsurin Joa pasaypa llakikurnin latsapankunatapis rachir ushayarqan. Eliaquimmi karqan palaciucho kaqkunata imatapis cuidaq, Sebnami karqan secretariu y Joanami karqan Judácho ima päsanqankunatapis qellqaq. Nirkurmi rey Ezequíasman aywayarqan Asiria nacionpa mandaqnin runa imata ninqantapis willayänanpä.