Siónman runakuna kutiyänanpä ninqan
35
Tsay witsanmi tsunyaq jirkapis y tsaki pampakunapis kushikuyanqa.Tsunyaq pampakunachöpis imaykaläya qewami lloqllurrä tuktunqa.
2 Waytakunapis pasaypami tuktuyanqa.
Pampakunapis kushishqami cantayanqa.
Muntikunapis Líbano muntikunanö kuyayllapämi kanqa.
Chakrakunapis Carmelucho y Saróncho kuyayllapä kanqannömi kanqa.
Tsaymi Tayta Diosnintsik munayyuq kanqanta pïmaypis tantiyanqa.
3 Kallpaynaq kayaptiki makikikuna warkukäkushqanö kaptinpis
y pishipäyaptiki qonqurnikikuna watakäkuqnö kaptinpis kallpata tsariyay.†
4 Mantsariqkunata nishun:
“¡Ama mantsariyaytsu!
¡Valorta tsariyay!
¡Tayta Diosnintsikmi yanapayäshunki!
Ñakatsiyäshuqnikikunatami castiganqa.
Kikin shamurmi salvayäshunki”.
5 Tsaymi qaprakunapis rikayanqa.
Mana wiyaqkunapis wiyayanqa.
6 Weqrukunapis lluytsunörä saltayanqa.
Mana parlaqkunapis shiminkuna pashtaptinmi kushikur cantayanqa.†
Tsunyaq jirkakunachöpis atskami yaku pashtamunqa.
Tsaki jirkakunapapis mayunörämi yaku aywanqa.
7 Tsaychömi qochakunapis tikranqa.
Pukyukunapis pashtamunqami.
Chacalkuna kayanqanchöpis shoqushwan ututunami jeqamunqa.
8 Tsaymanmi nänipis aywanqa.
Tsay nänipa jutinmi kanqa Diosman Chäna Sagrädu Näni.
Jutsa ruraq runaqa manami tsay nänipa purinqatsu.
Mana yachaq runakunaqa tsay näniman manami jaruyllapis jaruyanqatsu.
Tayta Dios munanqannö kawaq runakunallami tsay nänipa puriyanqa.†
9 Tsaypaqa leonkunapis manami puriyanqatsu.
Jatusaq chucaru uywakunapis manami yaykuyanqatsu.
Tsay nänipaqa salvashqa kaqkunallami puriyanqa.
10 Tayta Dios salvanqan runakunami tsay nänipa Jerusalénman kutiyämunqa.
Kushishqa cantaraykarmi Siónman yaykayämunqa.
Tsaychömi imaypis kushishqalla kawayanqa.
Kushishqa alli kawayaptinmi llakikuypis ni waqaypis kanqanatsu.†