Edom nacionta castigananpä ninqan
34
Maytsay nacioncho taqkuna, wiyayämänaykipä shayämuy.Maytsay markacho taqkunapis, qorikäyämuy.
Kay patsa y kay patsacho kaqkunapis, llapaykikuna wiyayämay.
2 Llapan nacionkunapäpis rabyanashqami Tayta Dios kaykan.
Nacionkunapa soldädunkunapäpis ajanashqami kaykan.
Paymi llapan nacionkunata chipyaq ushakätsinqa.
3 Wanuqkunapa ayankuna ismurmi pasaypa asyar jitaräyanqa.
Jirkakunapapis yakunörämi yawar aywanqa.
4 Ciëlucho kaqkunapis tsullurmi ushakäyanqa.
Röllu lluyllukaqnömi ciëlupis lluyllukanqa.
Qoyllurkunapis tsakishqa rapranömi shushuyämunqa.
Üva jachapa y hïgus jachapa tsakish raprannömi shushuyämunqa.†
5 Tayta Diospa espädan ciëlupita shamurmi Edom nación runakunata ushakätsinqa.
Paykunata castigar ushakätsinanpämi Tayta Dios destinashqa.
6 Runakunata ushakätsirmi Tayta Diospa espädan yawarllana y wirallana kanqa.
Bosra markacho runakunata wanutsirmi Tayta Diospä sacrificiuta pishtaqnö kanqa.
Tayta Diospa espädanqa üshakunapa y chïvukunapa yawarninwan pasaypa pichushqami kanqa.
Carnërukunapa rurunninpa wiranwan ñitishqami kanqa.
7 Tsaychömi törunö kallpasapa runakunapis ushakäyanqa.
Torïtunö kallpasapa chölukunapis chipyaqmi wanuyanqa.
Maytsaychömi yawar mashtaranqa.
Allpapis wirawan pichukashqami kanqa.
8 Tsay witsanmi Sión runakunapa chikiqninkunata Tayta Dios ushakätsinqa.
9 Ushakätsiptinmi chikiqninkuna täyanqan nacioncho raqrakunaman yaku aywananpa trokin breanaa aywanqa.
Allpapis azufrimanmi tikranqa.
Chakrakunapis breanörämi rupanqa.
10 Paqaspa junaqpapis mana upiypa rupaptinmi qoshnilla shäriykanqa.
Tsaynö ushakätsiptinmi imayyaqpis tsunyaqllana kanqa.
Tsaypaqa pipis mananami purinqanatsu.†
11 Tsaychöqa kayanqa pelïcanuwan erïzullami.b
Tukuwan killikshallanami qeshunkunata tsaycho rurayanqa.
Tayta Dios chipyaq ushakätsiptinmi imapis tsay nacioncho kanqanatsu.
12 Reypis ni autoridäkunapis mandayänanpä manami kayanqanatsu.
13 Palaciukunachöpis shirakallanami kanqa.
Murallashqa markakunachöpis ishankawan cardón kashakunallanami juntanqa.
Chacalkuna täkuyänan y avestruzpa pushapankuna punukuyänallanmi kanqa.
14 Jirka uywakunawan hienakunami tsaycho kayanqa.
Jirka cabrakunapis tsaychömi waqapänakuyanqa.
Chushiqkunallanami pipis mana mantsatsishqa tsaycho kayanqa.
15 Tukukunapis tsaychömi oqllayanqa.
Pashtatsiyanqan pushapankunatapis tsaychömi oqllaräyanqa.
Wiskurkunapis chinan orqumi tsaycho qorikäyanqa.
16 Tsayta musyayänaykipä Tayta Dios qellqatsinqan rölluta liyiyay.
Tsaycho qellqaranqannöllami llapanpis chinan orqu kayanqa.
Tayta Dios ninqannöllami tsay uywakuna tsaycho kayanqa.
Tsaycho kayänanpämi Espïritun qorinqa.
17 Kikinmi tsaycho täyänanpä tsay uywakunata churanqa.
Tsaymi imaypis tsaycho kayanqa.