Tayta Dios salvamaqnintsik kanqan
33
¡Allaw, ushakätsikuq Asiria nación!Wakin nacionkunata atacayaptikipis qamtaqa manami mayqanpis atacayäshushqaykirätsu.
Juk nacionkunata traicionaptikipis qamtaqa manami mayqanpis tikrapäyäshushqaykirätsu.
Atacayta ushaskiptiki kikikitami atacayäshunki.
Juk nacionkunata traicionayta ushaskiptiki kikikitami tikrapäyäshunki.
2 Tayta Dios, kuyapaykayällämay.
Qamllamanmi yärakayämü.
Qoyay qoyay yanapaykayällämay.
Ñakaykuna chämuptinpis salvaykayällämay.
3 Maqakuynörä parlanqayki wiyakämuptinmi runakuna qeshpir aywakuyan.
Ajananqaykita tantiyakurmi llapan nación runakuna maytsaypapis qeshpir aywakuyan.
4 Paykunapa imaykankunatapis contrankunami apayan.
Tsaytsika chukllushkunanörämi ushayan.
5 Munayyuq Tayta Dios ciëluchömi kaykan.
Paymi Sióncho taq runakunata allita rurayänanpä yachatsin.
6 Ima päsamashqapis paymi yanapamäshun.
Paymi tantiyatsimäshun y yachayta qaramäshun.
Imayka mana allikunapitapis paymi salvamäshun.
Tsaymi Tayta Diospita mantsapakur imayka riquëzata tsararaqnö kaykantsik.
7 Chikimaqnintsikkunata rugakayämunanpä runakunata kachaykashqapis mana kuyapaypami atacamashqantsik.
Tsaymi soldäduntsikkunawan autoridänintsikkunapis cällikunacho llakikurnin pasaypa waqaykäyan.
8 Pipis manana puriptinmi nänikunapis tsunyaykan.
Mana atacamänantsikpä awnirkamarnintsikpis manami cumpliyantsu.a
Testïgukunapa ñöpancho awniyanqantapis manami cäsuyantsu.
Runa mayintapis manami respitayantsu.
9 Pasaypa llakikuywanmi kay patsapis antsa kaykan.
Líbano muntipis penqakuywanmi tsakiykan.
Sarón pampapis tsunyaqmi rikakuyashqa.
Basán jirkawan Carmelo jirkapis chipyaqmi lliwyaykan.
10 Asiria runakunatami Tayta Dios nin:
“Kanan castigayta qallaykuptïmi musyayanki llapanpä munayyuq kanqäta.
11 Qamkunapa yarpaynikikunaqa tsaki päjanöllami kaykan.
Llapan rurayanqaykipis trïgu päjanöllami kaykan.
Tsaymi päjata nina rupar ushaqnö qamkunatapis ushakätsishayki.
12 “Llapan markaykikunapis uchpayanqanyaqmi rupar ushakanqa.
Tsakishqa kashata nina uchpayanqanyaq ushanqannömi ushakätsiyäshunki.
13 Karucho taqkuna, ruranqäkunapita parlayanqanta wiyayay.
Cercacho taqkuna, munayyuq kanqäta tantiyakuyay”.
14 Sióncho jutsayuq runakuna pasaypa mantsakashqami kaykäyan.
Diosta mana cäsukuqkunami pasaypa mantsarir nikäyan:
“Kay ñakaykuna lunyaykaq ninanö kaykaptinqa ¿pirä kawanman?
Imaypis lunyaypa lunyar ninanö kaykaptinqa ¿pirä salvakunman?”
15 Tsaykunapita salvakunqa allillata ruraq runa,
rasun kaqllata parlaq runa,
pipa imantapis mana qechuq runa,
mana chaskipakuq runa,
wanutsinanpä niyaptinpis mana awniq runa,
y mana alli ruraykunapita witikuq runa.†
16 Tsaynö kawaq runaqa kay patsacho allimi kawanqa.
Qaqacho rurashqa wayiman amparakuqnömi kanqa.
Tsay runataqa manami imapis päsanqatsu.
Paypaqa mikuyninpis ni yakunpis manami pishinqatsu.
17 Munayyuq chipipiykaq reytami rikashun.
Nacionnintsikpa lindërunkunapis mas karuyaq kaykaqtami rikashun.
18 Tsaymi mantsaypä chikimaqnintsikkunapä yarparkur nishun:
“Impuestuta cobramaqnintsikkuna ni impuestu qellayta yupaqkunapis manami kannatsu.
Chikimaqnintsik soldädukunapis törrintsikkunata manami rikapäyannatsu”.
19 Tsay chikimaqnintsik jäpa runakunaqa mana tantiyanqantsik idiömapami parlayan.
Paykunaqa chölu tukurmi pitapis respitayantsu.
Tsay runakunataqa manami rikashunnatsu.
20 Tsaypa trokinqa Diosta alabana fiestata Sióncho ruraykaqtami rikashun.
Jerusaléncho runakuna allilla kawaykaqtami rikashun.
Estäcankuna mana sutakaptin y wataraq waskankuna mana rachikaptin puritsina toldu següru kanqannömi Jerusalén markapis següru kanqa.
21 Tsaychömi Tayta Dios musyatsimäshun munayyuq kanqanta.
Jerusalén kuchunpa jatun mayu tumaypa tsaparaqnömi kanqa.
Tsaymi contrantsikkuna atacayta munarpis kamäpakuyanqatsu.
22 Tayta Diosmi jueznintsik.
Tayta Diosmi leykunata qomashqantsik.
Tayta Diosmi mandamaqnintsik rey.
Paymi chikimaqnintsikkunapita tsapämäshun.
23 Büquipa mastilninpitab waskakuna paskakaptin aywayta mana kamäpakunqannömi contrantsikkunapis kayanqa.
Wayra tanqananpä büquipa vëlan mana mashtakaptin aywayta mana kamäpakunqannömi kayanqa.
Tsaymi chikimaqnintsikkunata vincir imaykankunatapis rakipänakushun.
Weqrukunapis paykunapa imaykankunatami apakuyanqa.
24 Sióncho taqkunataqa llapan jutsankunapitami Tayta Dios perdonanqa.
Tsaycho taq runaqa manami mayqanpis “qeshyaykämi” ninqatsu.