Alli rey mandananpä ninqan
32
Juk reymi kanqa shumaq juzgar alli mandaq.Yanapaqnin autoridäkunapis shumaqmi juzgayanqa.
2 Paykunami marka mayinkunata shumaq rikayanqa.
Tsaymi mana alli runakuna imayka shukukuy wayranö atacayaptinpis runakunata tsapäyanqa.
Mangäda tamyanö desgracia päsaptinpis yanapayanqami.
Tsaki jirkakunacho yakunömi kayanqa.
Pasaypa achaptin runakuna llantukuyänanpä jatun qaqanömi kayanqa.
3 Tsay witsanmi Tayta Dios ninqanta runakuna shumaq wiyakuyanqa.
Pay munanqannö kawayänanpämi shumaq tantiyakuyanqa.
Ninqanta cäsukuyänanpämi llapantapis wiyayanqa.
4 Mana tantiyakuqkunapis shumaqnami tantiyayanqa.
Parlayta mana kamäpakuqkunapis shumaqnami parlayanqa.
5 Mana alli runataqa manami “alli runami kanki” niyanqanatsu.
Engañakuqkunatapis manami “respitädu runami kanki” niyanqanatsu.
6 Mana alli runaqa llutankunatami parlan.
Llutanta ruranallanpämi yarpachakun.
Tayta Diospäpis mana allikunatami parlan.
Mallaqaqkunatapis manami mikuyta qarantsu.
Yakunaqkunatapis manami yakuta makyantsu.
7 Engañakuq runaqa pitapis engañanmi.
Llutankunata rurananpämi yarpachakun.
Imaynaqkuna y qollmi shonqukuna demandakuyaptinpis manakaqtami tumpan.
8 Alli runaqa shumaq yarpachakuskirmi imatapis ruran.
Tsaymi paytaqa pïmaypis respitayan.
Jerusalén warmikunapä ninqan
9 Mana yarpachakuq warmikuna, tantiyakuyay.
Imapis mana päsayäshunaykipä kanqanta yarpaqkuna, ninqäta shumaq wiyakuyay.
10 Kananpita juk wata päsaskiptinqa üvapis ni ima mikuypis cosechayänaykipä manami kanqatsu.
Tsaynö kaptinmi pasaypa mantsakäyanki.
11 Imaykayuqpis kar alli kawaycho kaq warmikuna, ¡mantsarir tsuktsukyäyay!
Latsapaykikunata jipikuskir qachqa latsapatana jatikuyay.
12 Alli wayuq chakrakuna mananami wayunqanatsu.
Üva cosëchapis manami kanqanatsu.
Tsayta rikarmi makikikunatapis tsoqpashqa waqayanki.
13 Chakraykikunacho kashawan jachakunami juntayanqa.
Kushishqa kawayanqayki wayikikunapis y markaykikunapis muntiyanqami.
14 Rey tanqan palaciucho pipis manami tanqanatsu.
Cällikunacho tsaytsika runakuna karpis waray warantinqa tsunyaqmi tikranqa.
Marka murällapis törrikunapis llapanmi raqällana kanqa.
Munti ashnukunallanami tsaycho kushishqa pañayanqa.
Uywakunatami tsaycho mitsikuyanqa.
Espïritunta Tayta Dios kachamunanpä ninqan
15 Tsaynö kanqa ciëlupita Espïritunta Tayta Dios noqantsikman kachamunqanyaqmi.
Espïritunta kachamuptinqa tsunyaq jirkapis muruna chakramanmi tikranqa.
Chakrakunapis qoriyta mana atipaypämi wayunqa.†
16 Tsunyaq jallqachöpis muruna chakrakunachöpis allillatanami runakuna rurayanqa.
17 Maytsaychöpis allimi kawayanqa.
Imapitapis mana mantsarirmi imayyaqpis allilla kawayanqa.
18 “Kuyanqä runakuna kar markaykikunachöpis wayikikunachöpis allillami täyanki.
19 Muntikunata runtu tamya ushaptinpis,
juklä markakunata contrankuna juchutsir ushayaptinpis
20 qamkunaqa imapis mana ñakatsiyäshuptikimi kushishqa kawayanki.
Atska yakuyuq chakrakunachömi murukuyanki.
Alli qewa kanqanchömi wäkaykikunata y ashnuykikunata mitsikur kushishqa kawayanki”.