Egipto runakunaman mana yärakuyänanpä ninqan
31
¡Allaw, yanapayäshunaykipä Egiptuman rugakuq aywaqkuna!Qamkunaqa Egipto runakunapa cawallunkunaman,
atska carrëtankunaman
y cawallun muntashqa soldädunkunamanmi yärakuykäyanki.
Israel runakunapa santu Diosninmanqa manami yärakuyankitsu.
Tayta Diostaqa manami tapukuyllapis tapukuyankitsu.†
2 Egipto runakuna yachaq kayanqanman yärakuyaptikipis Tayta Diosmi mas yachaq kaykan.
Payqa runakunata imanöpa castigaytapis yachanmi.
Ninqantaqa imaypis cumplinmi.
Mana alli runakunata yanapaqninkunatawan castiganqami.
3 Egipto runakunaqa manami diostsu kayan, sinöqa runallami.
Cawallunkunapis manami munayyuq angeltsu kayan, sinöqa uywallami.
Tsaymi Tayta Dios castigaptin Egipto runakuna y paykunata minkakuqkunapis awantayanqatsu.
Paykunaqa llapanmi ushakäyanqa.†
4 Tayta Diosmi nimarqan: “Üshata león wanutsiptin llapan mitsikuqkuna qorikaykur qayaräyaptinpis león manami mantsarintsu. Noqapis tsay leonnömi kashä. Tsaymi kuyanqä runakunata Sión jirkancho salvaptï pipis mantsatsimanqatsu. 5 Pushapanta pishqu tsapaqnömi noqapis Jerusalénta tsapäshä. Imapis mana päsananpämi shumaq rikashä. Ima mana allipitapis salvashämi”.
6 Israel runakuna, Tayta Diosta alläpanami ajanätsiyashqayki.
Tsaynö kawaynikikunata jaqirir paypa munaynincho yapay kawayay.
7 Payta ajanätsirmi qoripita qellaypita ïduluykikunata rurayashqayki.
Diospa munaynincho yapay kawarnami tsaykunata jitariyanki.
8 Asiria runakunataqa Tayta Dios manami runakunapa espädanwantsu wanutsinqa, sinöqa kikinpa espädanwanmi.a
Espädapita chölukuna qeshpiyaptinpis paykunata tsariskirmi wätayninpä apakuyanqa.
9 Mantsariyllawanmi mandaqnin reypis qeshpinqa.
Capitanninkunapis bandërankunata jaqiriykurmi mantsakashqa aywakuyanqa.
Tsaynö kananpä kanqantami Tayta Dios nin.
Contrankunata ushakätsinanpämi Sión jirkancho ninata tsariykätsin.
Jerusalénchömi jornuntapis wayllaykätsin.b