Egiptuman manakaqllapä yärakuyanqan
30
Tayta Diosmi wamrankunata nin:“Allaw mana wiyakuqkuna, ¡imanörä kayanki!
Tapukayämänaykipa trokinmi kikikikunapa yarpayllaykita ruraykäyanki.
Manapis nikaptïmi jäpa runakuna yanapayäshunaykipä willanakuykäyanki.a
Tsaynö karqa jutsaykikuna jananmanpis mas peor jutsatami ruraykäyanki.
2 Mana tapukamayllapami Egiptumanpis aywaykäyanki.
Yanapashunaykipä Faraónman rugakuq aywarmi Egipto runakunaman yärakuykäyanki.†
3 Faraónman yärakuyanqaykipis manakaqllapämi kanqa.
Egiptuman amparakurpis penqakushqami kayanki.
4 “Zoán markaman autoridänikikuna chäyaptinpis y Hanesb markaman kachayanqayki runakuna chäyaptinpis 5 llapaykikunami tsay mana väliq nacionman yärakuyanqaykipita penqakuyanki. Ministiyanqayki höra manami imallachöpis yanapayäshunkitsu. Tsaymi ima ruraytapis mana kamäpakur penqakushqa kayanki”.
6 Kaychömi qellqaraykan Tayta Dios revelanqan. Kay revelacionmi kaykan Neguevcho kaq uywakunapita.
“Egiptuman aywaqkunaqa mantsariypä tsunyaq jirkapami pasaypa ñakar aywaykäyan.
Tsaychöqa leonkunapis y venënuyuq culebrakunapis kayanmi.
Ashnunkunawan riquëzan chaqnashqa y camëllunkunawan alhäjankuna chaqnashqami aywaykäyan.
Egipto runakunapä päguta apayaptinpis manami ni ichikllapis yanapayanqatsu.
7 Yanapananpä awnirpis manami cumpliyanqatsu.
Tsaymi tsay Egipto nacionta nishqä: ‘Mana väliq awkis allqu’ ”.
8 Isaíastami Tayta Dios nirqan:
“Kanan aywar tsay revelanqäta runakunapa ñöpancho taksha tablaman qellqay.
Shamuq watakunacho ima päsananpä ninqäta musyayänanpä röllumanpis shumaq qellqay.
Tsayta rikarmi ninqäta imaypis yarpäyanqa”.
9 Kay nación runakunaqa mana cäsukurmi llullakuykäyan.
Tayta Diospa willakuynintapis manami wiyayta munayantsu.
10 Profëtakunatami niyan: “Revelación rikayanqaykita ama willayämaytsu”.
Tsaynöllami niyan: “Rasun kaqta ama musyatsiyämaytsu.
Llullakuyllapapis shonqükunapänö kaqllata willayämay.
11 Tayta Dios ninqankunata amana willayämaynatsu.
Paypa willakuyninta amana niyämaynatsu.
Israel runakunapa santu Diosninpita amana parlapäyämaynatsu”.
12 Tsaynö niyaptikimi Israel runakunapa santu Diosnin nin:
“Willakatsinqäta mana cäsukurmi llutan ruraykunallacho y llullakuykunallacho kaykäyanki.
13 Tsaynö kayanqaykipitami altu pirqa illaqpita juchuqnö ushakäyanki.
14 Tsaynöllami pasaypa shallushqa uyllunö tikrayanki.
Shallushqa uylluqa manami ninata apanallanpäpis ni yakuta chaqakunallanpäpis välinnatsu.
Tsaynöllami qamkunaqa imapäpis väliyankinatsu”.
15 Israel runakunapa santu Tayta Diosninmi niyäshunki:
“Mantsarir kawayanqaykipa trokinqa noqaman yärakayämuy.
Tsaynö kayaptikiqa alli kawayänaykipämi yanapayäshayki”.
Tayta Dios tsaynö niyäshuptikipis qamkuna manami cäsukuyashqaykitsu. 16 Tsaypa trokinmi niyarqayki: “Manami Tayta Diosllamantsu yärakuyäshä, sinöqa Egipto runakunamanpis yärakuyäshämi. Egipto runakuna mana yanapayämaptinqa cawalluta muntakurkurmi qeshpiyäshä”.
Niyanqaykinöllami contraykikuna atacayäshuptiki rasunpaypa qeshpiyanki.
Tsaynöllami niyashqayki: “Alli cörriq carrëtakunaman yarkurkurmi qeshpiyäshä”.
Tsaynö niyaptikipis qatikachäshuqnikikunaqa mas rasmi qatiyäshunki.† 17 Juk runallami juk waranqa (1,000) runakunata qatikachäyäshunki. Pitsqa runakunallami llapaykita qatikachäyäshunki. Tsaymi jirkacho juk ishkay qeru jawiraykaqnölla quëdayanki.
Akranqan runakunata kuyapänanpä ninqan
18 Tayta Diosman yärakuyta mana munayaptikipis kuyapäkuq y alli kaqllata ruraq karmi payman yärakuyänaykipä shuyaraykäyäshunki. Payman yärakuyaptikiqa kuyaparmi yanapayäshunki. Payman yärakuqkunaqa alli kawaytami tariyan.
19 Sión runakuna, mananami waqayankinatsu. Jerusalén runakuna, mañakuyaptiki Tayta Dios yanapayäshunkimi. Rugakuyanqaykita wiyar kuyapäyäshunkimi.
20 Pasaypa ñakayman y llakikuyman chätsiyäshurnikipis tantiyatsishuqniki Tayta Dios manami jaqiriyäshunkitsu, sinöqa imaypis yanapayäshunkimi. Yanapaykäshunqaykita tantiyakuyankimi. 21 Pay munanqannö kawarqa alli nänipa aywaykaqnömi kayanki. Tsay nänipita itsuq kaqläpa o derëcha kaqläpa yaqaqnö kayaptikimi qepaykikunapita niyäshunki: “Kaypami näniqa. Kay alli nänipa aywayay”.
22 Tsay hörami qellaywan y qoriwan laqashqa ïduluykikunatapis pitsakuyanqayki papeltanö jitariyanki.
23 Murukuyänaykipäpis tiempullanchömi tamyatsimunqa. Mikuynikikunapis shumaq wayurmi maypis mikukuy munay kanqa. Uywaykikunapäpis tsaytsikami qewa kanqa. 24 Aruq yuntaykikunapis y chaqnakuna ashnuykikunapis alli qewatami mikuyanqa. 25 Entëru jirkakunapita y altunnin jirkankunapitapis mayunörämi yaku shamunqa. Tsay witsanmi llapan chikishuqnikikunata wanuskatsir amparakuyänan törrinkunatapis Tayta Dios chipyaq juchutsinqa. 26 Tsay witsanmi kuyanqan runakunata castigar däñanqanta Tayta Dios jampinqa. Killapis rupaynörämi atsikyanqa. Rupaypis qanchis rupaynörämi atsikyanqa.c
Asiria runakuna castigashqa kayänanpä ninqan
27 ¡Rikayay! Kikin Tayta Diosmi karupita aywaykämun.
Paypa ajanayninqa kayaypita qoshni shäriqnörämi kaykan.
Ajanashqa rimanqanpis imaykatapis ushaq ninanörämi kaykan.
28 Jamayninpis pasaypa mayu jakar runata apaqnömi kaykan.
Pay shamuykan juklä nación runakunata shuyshunawan shuyshuqnö llapanta ushakätsinanpämi.
Cawallupa shiminman frënuta churaparkur mana munanqanpa apaqnömi tsay runakunata desgraciaman apanqa.
29 Sión runakuna, qamkunami itsanqa Diosta alabana fiestacho paqaspa kushishqa cantayanqannörä cantayanki.
Tayta Diosta adorana jirkanman flautata tukaraykar witsaqnömi kushikuyanki.
Payqa imaykapitapis tsapämaqnintsik Diosmi kaykan.
30 Contrankunata ushakätsinanpä shamurmi pasaypa mantsariypä parlanqanta Tayta Dios wiyakätsinqa.
Lunyaypa lunyaykaq ninawan, maqakuywan, mangädawan y runtu tamyawanmi pasaypa rabyanar castiganqa.
31 Pay parlanqanta wiyallarmi Asiria nación runakuna ushakäyanqa.
Asiria runakunatami tukrunwan Tayta Dios pasaypa wirunqa.
32 Kutin kutin wiruykarmi Asiria runakunata Tayta Dios ushakätsinqa.
Tsaynö castigaptinmi panderëtakunata, arpakunata tukarrä kuyanqan runakuna kushikuyanqa.
33 Asiria runakunapa mandaqnin rey ñakananpä juk sitiu unaypitanami kamarish kaykan.
Tsay kamarinqan sitiuqa jatunkaraymi.
Tsaycho rupananpämi yantapis kamarishqana kaykan.
Tayta Dios pükaptinmi shiminpita atska azufri yarqamunqa.
Tsaywan ninata tsaritsirmi tsay reyta ushakätsinqa.