Jerusalénta atacayänanpä ninqan
29
“¡Allaw Ariel markallanay, Ariel marka!a¡Allaw! ¡Davidpa Markan Jerusalén, imanörä kanki!
Pasaypami waqanki y llakikunki.
Altarcho uywakuna rupayanqannömi chipyaq rupanki.
3 Qammanmi soldädukunata kachamushä jiruruypa tsapaykur atacayäshunaykipä.
Murällayki jananpa yaykayämunanpämi törrikunatapis shäritsiyanqa.
4 Vinciyäshuptikimi patsacho jitaranki.
Parlanqaykipis patsa rurinpitanöllami wiyakanqa.
Jupay waqaykaqnöllami parlanqaykipis wiyakanqa.
5 “Atacashuqnikikuna atska kayaptinpis ñuchu allpata wayra illakätsinqannömi illakätsishä.
Puëdiq chölu kayaptinpis tsaki oqshata shukukuy ushakätsiqnömi ushakätsishä.
6 Llapanta mandaq Tayta Dios karmi castiganäpä shamushä.
Maqakuywan, temblorwan, räyuwan, shukukuy wayrawan, mangäda tamyawan y lunyaykaq ninawanmi chikishuqnikikunata ushakätsishä.
7 “Ariel markata atacaq runakuna atska nacionpita shayämushqa karpis pukutaynöllami illakäyanqa.
Atacayänanpä marka murällata juchutsiqkunapis suëñuychönöllami ushakäyanqa.
8 Mallaqaykar punuq runa suëñuynincho alli allillata mikuykarpis rikchaskamurqa jinalla mallaqaykaqnömi kayanqa.
Yakunaykaq runa suëñuynincho yakuta shumaq upurpis pishipashqa y kunkanpis tsakishqa rikchamunqannömi kayanqa.
Tsaynömi kayanqa Sión jirkanman atacayänanpä maytsay nacionpita shamuq runakuna”.
Jerusalén runakuna tsakäpakushqanö kayanqan
9 Chikishuqnikikunata Tayta Dios tsaynö ushakätsinanpä kanqanta ¿manaku criyiyanki?
Mana criyirmi qaprayashqanö kaykäyanki.
Ima machätsikuqkunata mana upuykarpis imayka machashqanömi llutankunata yarpachakuykäyanki.
10 Pasaypa mana tantiyakuq kayänaykipämi Tayta Dios kamakätsishqa.
Llulla profëtakunatapis llutanta willakuyänanpämi pantakätsishqa.†
11 Tayta Dios revelayäshunqayki willakuykuna sigurashqa librunö qamkunapä kaptinmi imatapis tantiyayankitsu. Liyiy yachaq runata liyipäshunaykipä niptikimi tsay runa nishunki: “Kay libru sigurashqami kaykan. Liyinäpä manami kichayta kamäpakütsu”.
12 Tsaynöllami liyiyta mana yachaq runata liyipäshunaykipä niptikipis tsay runa nishunki: “Liyiyta manami yachätsu”.
13 Tayta Diosmi nin:
“Kay runakunaqa janan shonqullami alabayäman.
Shimillanmi cäsukayämänanpä niyäman.
Shonqunkunachöqa juktami yarpaykäyan.†
‘Diospita mantsapakümi’ nirpis kikinpa yarpayllanpita yachatsiyanqantami ruraykäyan.
14 Tsay runakuna tantiyakuyänanpämi milagrukunata yapay rurashä.
Tsaynöpami yachaq runakunapa yarpayninkunatapis pantakätsishä.
Tantiyakuqkunapis mana tantiyakuyänanpämi kamakätsishä”.†
15 ¡Allaw!
¡Imanörä kayanki Tayta Diospita pakayllapa mana allita rurayänaykipä yarpaqkuna!
Qamkuna yarpäyanki tsakayllapa willanakuptiki Tayta Dios mana musyananpä kanqantami.
Tsaynöllami niyanki: “Tayta Dios manami rikamantsiktsu ni musyanpistsu”.
16 ¡Tsaynö yarpar pasaypa llutantami yarpaykäyanki!
Noqantsikqa Tayta Dios ruranqan mankanöllami kaykantsik.
Manka ruraqnö karmi Tayta Dios noqantsikpita masta musyan.
¿Ruraqninta manka ninmantsurä: “Qam manami ruramashqaykitsu”?
¿Ruraqninta tsay mitu manka ninmantsurä: “Manami rurayta yachankitsu”?†
Israel runakunata salvananpä ninqan
17 Kananpita manarä unaytami Líbano muntipis muruna chakraman tikranqa.
Muruna chakrakunanami jatusaq jachayuq muntiman tikranqa.b †
18 Tsay junaqmi Diospa willakuyninta mana wiyaq runakuna wiyayanqana.
Qapranö kaqkunapis tsakäpakushqanö kayanqanpitami rikayanqana.
19 Tayta Dios yanapaptinmi qollmi shonqukuna kushikuyanqa.
Israel runakunapa santu Diosnin yanapaptinmi imaynaqkunapis kushishqa kawayanqa.
20 Respëtuynaq runakuna llapanpis ushakäyanqami.
Mana alli runakuna mananami kayanqanatsu.
Llutan ruraykunallaman yarparaqkunapis llapanmi ushakäyanqa.
21 Tsaynöllami runa mayinta tumpaqkunata,
juezkunata llullapaqkunata
y jutsaynaq runakunata manakaqta tumpaqkunatapis Tayta Dios ushakätsinqa.
22 Tsaymi Jacobpita aywaraq runakunata Abrahamta jipimuq Tayta Dios nin:
“Jacobpita aywaraq runakuna, manami penqakuycho kayankinatsu.
Manami mantsakashqanatsu kaykäyanki.
23 Tsurikikunata yanapaykanqäta rikarmi jutïta joqarir agradëcikayämanki.
Santu Diosnikikuna kanqäta tantiyarmi noqallatana respitayämanki.
24 Mana cäsukamaqkunapis cäsukayämanqami.
Conträ shäriqkunapis yachatsinqäta wiyakuyanqami”.