Samaria markapä ninqan
28
¡Allaw, Samaria marka!Alli wayuq chakrakuna janaqnin jirkanchömi shäritsishqa kaykanki.
Tsay jirkancho kuyayllapä marka karmi Efraín runakunapaa corönannö kaykanki.
Qamcho taqkunaqa vïnuta upuykällarmi qoyaskiyanpis.
Machaskir runa tukuykäyanqanchömi kuyayllapä wayta wanuytaqnö ushakäyanqa.
2 Paykunata ushakätsinanpämi kallpasapa y munayyuq runata Tayta Dios akrashqa.
Tsay runaqa runtu tamyanörä, shukukuy wayranörä y cargashqa mayunörämi imatapis tarinqan kaqta ushakätsinqa.
3 Machashqa Efraín runakunapa corönannö Samaria marka kaptinpis tsay markata lanqurmi ushanqa.
4 Tsaymi tsay alli wayuq chakrakuna janaqnin jirkancho kaykaq markaqa kuyayllapä kaykarpis waytanö ushakanqa.
Punta poquq hïgusta juklla pallar mikunqannömi tsay markata ushakätsinqa.
5 Tsay witsanqa kawaykar quëdaq runakunapa corönan llapanta mandaq Tayta Diosmi kanqa.
Kuyanqan runakunapaqa kuyayllapä adornunmi kanqa.
6 Demanduta shumaq arreglayänanpäpis paymi juezkunata alli yarpayta qonqa.
Marka täpaq soldädukunatapis puëdiq chölu kayänanpämi valuratsinqa.
7 Kananqa sacerdötikunapis profëtakunapis vïnuta y imayka machätsikuqkunata upyakurkurmi tsankapaykachaykäyan.
Machashqa karmi Diospa willakuyninta willakuyänanpäpis musyayantsu.
Shumaq juzgaytapis manami kamäpakuyantsu.
8 Lanzapakurmi llapan mësankunatapis qanratar ushayashqa.
Paykuna kayanqanchöqa llapanpis qanratashqami kaykan.
9 Tsay runakunaqa pipis yätsiptinmi niyan:
“¿Pita yachaykätsinqaykitatä yarpaykanki?
¿Pï kanqäta yarpartä Diospa willakuyninta willaykämanki?
¿Chuchuykaq wamra kanqätaku yarpaykanki?
¿Tsayrä wasqishqa wamra kanqätaku nikanki?
10 Parlapämanqaykiqa wamra parlayta yachakur ‘ba, be, bi, bo, bu’ ninqannömi kaykan.
Maycho tsaychöpis tsayllatami nikämanki”.
11 Tsaymi tsay runakunata castigar mana tantiyayanqan idiömapa Tayta Dios parlapanqa.b
12 Paykunatami Tayta Dios nirqan:
“Kaychömi alli kawayta tariyanki.
Pishipashqa kaykaqkunapis kaychömi jamayta tariyanqa”.
Tsaynö niptinpis manami wiyakuyashqatsu.†
13 Tsaymi paykunata castigar mana tantiyayanqan idiömacho Tayta Dios parlapanqa.
Tsay parlapanqanqa “ba, be, bi, bo, bu” niqnöllami kanqa.
Maycho tsaychöpis tsayllatami tantiyayanqa.
Tsaymi puriyta yachakuykaq wamra ankallaypa ishkiqnö jitaräyanqa.
Contrankunapa makinman chäyaptinmi prësu apayanqa.
Jerusalén markapa autoridäninkunata castigananpä ninqan
14 Jerusaléncho pitapis mana respitaq autoridäkuna, Tayta Dios ninqanta wiyayay.
15 Qamkunaqa nikäyanki:
“Wanuywanmi willanakuyashqä.
Sepultürawanmi pactuta rurayashqä.
Llullakuymanmi pakakuykäyä.
Manakaqkunamanmi yärakuykäyä.
Tsaymi noqakunamanqa wanuypis chämunqatsu”.c
16 Munaynincho tsararämaqnintsik Tayta Diosmi nin:
“Siónmanmi cimientupä allinnin rumita churä.
Tsay rumiqa akrashqami kaykan.
Wayi kuchuncho shumaq y mana kuyukuq rumimi kaykan.
Pipis tsay rumiman yärakuq kaqqa manami manakaqllapätsu yärakunqa.†
17 “Wayita shäritsinäpäd cordelnïpis y plomädäpis kanmi.
Cordelnïqa allillata ruranqämi.
Plomädänami pipapis janan mana shäriypa juzganqä.
Qamkuna yärakuyanqaykiqa mana väliq amparakuyänayki wayinömi kaykan.
Tsaymi runtu tamya y bunyaypa bunyar aywaq yaku wayita ushakätsinqannö contraykikuna shamur qamkunatapis ushakätsiyäshunki.
Amïguykikuna salvayäshunaykipä yärakuyanqaykipis manakaqllapämi kanqa.
18 “Wanuywan pactuta rurayanqaykitapis y sepultürawan willanakuyanqaykitapis manakaqmanmi churashä.
Castïgu shamurqa mangäda tamyanömi ushayäshunki.
19 Imaypis chämurmi qarachashqa apayäshunki.
Qoyay qoyaymi paqaspapis junaqpapis tsaynö ushayäshunki.
Chämunanpä kaykanqanta musyaskirmi mantsariywan tsuktsukyäyanki.
20 Taksha catricho punur sutqakuyta mana kamäpakuqnömi kayanki.
Taksha jakuwan qatakuyta mana kamäpakuqnömi kayanki”.e
21 Perazim jirkancho pelyanqannömi Tayta Dios yapay pelyanqa.†
Gabaón pampacho rabyakunqannömi yapay rabyakunqa.†
Mana criyiypämi runakunata castiganqa.
Runa mana tantiyanqantami ruranqa.
22 Tsayta rurarqa kay nacionta chipyaqmi ushakätsinqa.
Ushakätsinanpämi llapanta mandaq Tayta Dios nin.
Tsaynö kaptinqa willakuyninta manakaqman ama churayaytsu.
Tsaynölla mana cäsukuq kayaptikiqa pasaypami castigayäshunki.
23 Willanqäta tantiyakuyänaykipä shumaq wiyayämay.
Imata ninqätapis shumaq tantiyayämay.
24 Murupakuyta munarqa manami kutin kutin barbichallartsu kakuntsik.
Tsaynöpis manami kurpakunata takar qewankunata tapsillartsu kakuntsik.
25 Tsaypa trokinqa inöjutapis, comïnustapis, trïgutapis, cebädatapis y avënatapis murunantsikpä kaqman jukllami jichantsik.
26 Tsaynö shumaq arunantsikpämi Tayta Dios yarpayta qaramantsik.
27 Inöjutaqa manami ërantsiktsu.
Comïnustapis carrëtawan manami jarutsintsiktsu.
Inöjuta y comïnustaqa llanu qerullawanmi wiruntsik.
28 Trïgutami itsanqa trillatsintsik.
Trillashqana kaptinqa manami kutin kutin trillatsintsiknatsu.
Carrëtawan jarutsirpis manami trïgun ñuchunqanyaqqa jarutsintsiktsu.
29 Llapanta mandaq Tayta Diosmi tsay yarpaytaqa qaramashqantsik.
Paypa yachatsikuyninqa espantaypämi.
Pay yachanqanmanqa manami imapis tinkuntsu.f