Israel runakuna markankunaman kutiyämunanpä ninqan
27
Tsay witsanmi lamarcho willwishturrä shiwyarrä aywaq mantsaypä Leviatán waräkuytaa † Tayta Dios jatunkaray fïlu espädanwan wanutsinqa.2 Tsay witsanmi Tayta Dios ninqa:
“Pasaypa mishki wayuq üva chakratab cantapäyay.
3 Noqa Tayta Diosmi tsay üva chakrata rikaykä.
Mana kachaypami qarpaykä.
Pipis mana jarunanpämi paqaspis junaqpis rikaykä.
4 “Ñöpata rabyanashqa karpis kananqa tsay chakrata manami rabyapänatsu.
Tsaynö kaptinpis kashakunata y mana alli qewakunata tarirqa llapantami rupatsishä.
5 Yärakamar mañakamaqkunatami itsanqa kuyapäshä.
Pipis alli rikanäta munarqa noqawan amistatsun.
Yapaymi nï: ¡Noqawan amistatsun!”
6 Shamuq watakunacho Jacobpita aywaraq Israel runakuna alli wiñaykaq jachanömi nacionnincho kawayanqa.
Michïkur shumaq sheqllimuqnömi kayanqa.
Shumaq tuktur wayunqanmic maytsay nacionkunaman chanqa.
7 Israel runakunata Tayta Dios castigarpis manami contrankunata castiganqannötsu castigashqa, sinöqa kuyapashqarämi.
Tsaymi contrankunata ushakätsirpis Israel runakunataqa ushakätsishqatsu.
8 Ushakätsinanpa trokin nacionninpita jukläman prësu apatsirmi castigashqa.
Tsunyaq jirkapita pasaypa wayramur imaykatapis apaqnömi apatsishqa.
9 Tsaynö kaptinpis Jacobpita aywaraqkunatami jutsankunapita perdonanqa.
Tsaynö perdonanqa juk dioskunata adorakuyänan altarkunata ushakätsiyaptin,
tsay altarta pirqanqan rumikunata isku rumitanö chipyaq rupatsir ushakätsiyaptin,
Asera diösapä raku qerukunata manana jawiyaptin
y juk dioskunapä inciensiuwan qoshnitsikuyänan altarkunatapis juchutsiyaptinmi.
10 Nacionninpita Israel runakunata apayaptin jinchi murallashqa markankuna tsunyaqmi rikakushqa.
Tsaytsika runakuna täyanqan markakunachöpis manami pipis kashqanatsu.
Mitsikuna jirkakunamanmi tikrayashqa.
Tsaychömi torïtukunapis qewata mikur pacha junta punuräyan.
11 Llimllakuna tsakir pakikaqkunatami warmikuna yantakuyan.
Tsaycho taq runakuna mana tantiyakuqmi kayashqa.
Tsaymi paykunata kamaq Tayta Dios kuyapashqatsu ni llakipashqatsu.