Tayta Dios yanapanqanpita alabayanqan
26
Tsay witsanmi Judá nacioncho kay cantuta cantar niyanqa:“Markantsikqa shumaq tsapashqami kaykan.
Tayta Dios tsapämashqaqa ishkay murällawan tsapashqanömi kaykantsik.
2 ¡Alli runakuna yaykayämunanpä marka punkunta kichapäshun!
¡Tayta Dios munanqannö kawaq runakuna yaykayämutsun!†
3 “Qamllaman yärakuqkunataqa alli kawayänanpämi imaypis yanapanki.
Qamllapä yarparaqkunataqa mana llakikuyänanpämi imaypis tantiyatsinki.
4 ¡Tayta Diosllaman imaypis yärakushun!
Payqa amparakunantsik qaqami imayyaqpis kaykan.
5 “Tayta Diosmi runa tukuqkunata penqakuyman churan.
Täyanqan markatapis chipyaq juchutsirmi ushakätsin.
6 Ushakätsiptinmi imaynaqkunapis, waktsakunapis tsay runakunata asipäyanqa.
7 Alli runakunatami itsanqa pitsashqa nänipanö puriyänanpä yanapan.
Allillata ruraq karmi tranquïlu kawayänanpä imaypis yanapan”.
Tayta Dios salvananpä shuyäyanqan
8 Tayta Dios, mandamientuykikunata cäsukurmi salvayämänaykipä shuyaykäyä.
Jutikita joqarirmi qamllata imaypis yarparaykäyä.
9 Paqaspapis qamllamanmi yärakaykäyämü.
Tsaka tsakallanami llapan shonqükunawan mañakaykäyämü.
Runakunata castiganqaykita rikarrämi wakin runakunapis llutankunata jaqiriyanqa.
10 Mana alli runakunami itsanqa kuyapaptikipis mana alli rurayta jaqiriyanqatsu.
Alli runakunapa ñöpancho taykarpis mana allillatami rurayan.
Munayyuq kanqaykita imapäpis mana cuentaypami llutankunata rurayan.
11 Tayta Dios, castiganaykipäna kaykanqaykita tsay runakuna manami tantiyakuyantsu.
¡Kuyanqayki runakunapa janan shärinqaykita rikar penqakuyätsun!
¡Chikishuqnikikunata castigarnin nina ushaqnörä ushaykullay!†
12 Tayta Dios, kushishqa kawayänäpä qamllami yanapayämanki.
Qam kamakätsiptikimi llapan ruranqäkunapis alli kaykan.
13 Tayta Diosllä, mandaq jäpa runakunami munaynincho tsararäyämashqa.
Tsaynö kaptinpis qamllamanmi imaypis yärakayämü.
14 Tsay mandaqkunata castigarmi ushakätsishqayki.
Paykunata wanutsirmi illakäratsishqayki.
Tsay runakunaqa manami kawayämunqanatsu.
Paykunapä manami pipis yarpanqanatsu.
15 Tayta Dios, bendicionnikiwanmi nacionnï jatunyashqa.
Lindërunkunatapis mas karumanmi wititsishqayki.
Tsaynö ruranqaykipitami qamta alabayä.
16 Tayta Dios, pasaypa ñakatsiyämaptikimi qamta ashiyarqä.
Castigayämaptikimi rugakayämurqä.
17 Wachay nanaywan warmi qayaranqannömi qampa ñöpaykicho qayaräyashqä.
18 Juklä nación runakuna ñakatsiyämaptin imanöpapis salvakuyta manami kamäpakuyashqätsu.
Manami alli kawaytapis tariyashqätsu.
19 Tsaynö kaptinpis qamman yärakuqkunaqa kawayämunqami.
Pampayaptinpis sharkayämunqami.
¡Allpaman tikrashqa kaqkuna, shärir kushishqa cantayay!
Qamkunatapis alli kawayänaykipämi Tayta Dios yanapayäshunki.
Shullyatanömi salvacionninta kachamunqa.†
20 Marka mayikuna, wayikikunaman yaykur punkuykikunata wichqayämuy.
Tayta Diospa ajanaynin qallqunqanyaq pakaräkuyay.
21 Tänanpitami Tayta Dios yarqamunqa.
Kay patsacho taqkunatami jutsankunapita castiganqa.
Runakuna pakayllapa wanutsiyanqanta kay patsapis manami upällakunqatsu.
Wanutsikuq kayanqanpitami castigashqa kayänanpä shimpinqa.