Isaías 25

Tayta Diosta alabar cantanqan

Tayta Dios, qammi Diosnï kanki.

Pipis mana ruranqanta ruranqaykipitami jutikita joqarir imaypis alabashayki.

Unaypita patsami awninqaykita imaypis cumplinki.

2 Chikimaqnï jäpa runakunapa markanta ranrallamannami tikratsishqayki.

Amparakuna jinchi murallashqa markankunatapis raqällatanami jaqishqayki.

Palaciunkunatapis juchutsir ushakätsinqaykita manami imaypis allitsayanqanatsu.

3 Tsaynö ruranqaykita rikarmi juk nacioncho munayyuq runakunapis munayyuq kanqaykita willakuyanqa.

Juk marka kallpasapa runakunami qampita mantsapakuyäshunki.

4 Imaynaqkunapa jananmi shärinki.

Pïninpis mana kaqkunatami tsapanki.

Mangäda tamya mana ushananpä pakakunanmi kanki.

Pasaypa achay mana rupananpäpis llantupankimi.^a

Mana alli runakunaqa runa mayinta ñakatsiyanmi.

Mangäda tamya murällata juchutsiqnömi kaykäyan.

5 Tsaynöllami tsaki jirkacho achay rupaqnö kaykäyan.

Tsaynö kaykäyaptinmi ollqüyanqantapis upällatsinki.

Pukutaywan rupayta tsapaskiqnömi upällatsinki.

Banquëtita Tayta Dios ruratsinanpä ninqan

6 Sión jirkanchömi llapanta mandaq Tayta Dios maytsay nación runakunapä banquëtita ruratsinqa. Tsay banquëtichömi alli mikuykuna mikukuy munay kanqa y alli vïnupis upukuy munay kanqa.

7 Tsay jirkancho llapan markakunata tsaparaq qachqa latsapata y llapan nacionkunata tsaparaq mortäjata^b ushakätsiptinmi 8 wanuypis kanqanatsu.^† Waqaqkunatapis kikin Tayta Diosmi shoqarnin weqinta pitsapanqa.^† Kuyanqan runakuna penqakuycho manami kayanqanatsu. Tsaynö kananpämi Tayta Dios nin.

9 Tsay witsanmi runakuna niyanqa:

“Kaychönami Tayta Diosnintsik kaykan.

Yärakunqantsiknöllami salvamashqantsik.

Paymi shuyanqantsik Tayta Dios.

Salvamanqantsikpita llapan shonquntsikwan kushishqa alabashun”.

10 Sión jirkancho runakunata Tayta Diosmi imapitapis tsapanqa. Moab naciontami itsanqa iska jitakunacho oqshata jaruqnö llutskar 11 runa tukuq kayninta ushakätsinqa. Wänupita llamkaykachar shäriyta mana kamäpakuqnömi Moab nacionpis imanö shäriytapis kamäpakunqatsu.^c 12 Tayta Diosmi markapa altu murällankunatapis chipyaq juchutsir ushakätsinqa.^†