Llapan runakunata Tayta Dios castigananpä kanqan
24
Kay patsata pasaypa kuyutsirmi llapantapis Tayta Dios ushakätsinqa.Wakpa kaypami runakunata qarqunqa.
2 Tsay junaqqa común runapis, sacerdötipis,
patronpis, ollqu wätaypis,
patrönapis, warmi wätaypis,
rantiqpis, rantikuqpis,
prestaqpis, prestakuq kaqpis,
imaykayuqpis, imaynaqpis llapanmi ñakayanqa.
3 Kay patsata ushakätsirmi tsunyaykaqta jaqiykunqa.
Tsaynö kananpämi Tayta Dios nin.
4 Jacha tsakir ushakaqnömi kay patsapis ushakanqa.
Ciëlupis kay patsapis pasaypami llakikuyanqa.
5 Tsaynö kananpäqa kay patsacho taq runakunami jutsayuq kaykäyan.
Paykunaqa Tayta Diospa leyninkunata ni estatütunkunatapis manami cumpliyantsu.
Imayyaqpis cäsukunantsikpä pactutapis manami cumpliyantsu.†
6 Tsaynö kaptinmi kay patsata Tayta Dios maldicionar ushakätsinqa.
Kay patsacho taqkunapis ñakayanqami.
Wallkaqllanami kawaykar quëdayanqa.
7 Üva plantakunatapis qeshyami ushanqa.
Vïnupis manami kanqanatsu.
Ñöpata kushishqa kawaqkunapis llakishqanami kawayanqa.
8 Panderëtatapis manami tukayanqanatsu.
Fiestata manana rurayaptinmi kushikuypis kanqanatsu ni arpakunatapis tukayanqanatsu.
9 Cantarnin manami vïnutapis upuyanqanatsu.
Imayka machätsikuqta upuyaptinpis iwjinqami.
10 Tayta Diosta mana cäsukuq runakunapa markan juchutsishqami kanqa.
Wayinkunaman mananami pipis yaykunqanatsu.
11 Vïnu manana kaptinmi cällikunacho waqayanqa.
Llakikuyllana maytsaychöpis kaptinmi pipis kushikunqanatsu.
12 Raqällatanami markata jaqiyanqa.
Marka punkukunatapis pakirmi ushayanqa.
13 Kay patsacho runakunaqa wallkallanami quëdayanqa.
Olïvuta cosechar tapsiyaptin juk ishkayllana yurancho quëdanqannömi kayanqa.
Üva cosëchacho juk ishkayllana quëdanqannömi quëdayanqa.
14 Kawaykar quëdaq runakunaqa kushikuyanqami.
Tayta Dios imanöpis ruranqanta rikarmi rupay jeqanan kaqlächo taqkunapis cantayanqa.
15 Rupay yarqamunan kaqlächo taqkunapis Tayta Diostami alabayanqa.
Lamar kuchuncho taqkunapis Israel runakunata kuyaq Tayta Diostami alabayanqa.
16 Kay patsapa juk kuchunpita jukaq kuchunyaqmi alabayanqa.
“¡Allillata ruraq Tayta Diosta alabashun!” nir cantayanqanmi wiyakanqa.
¡Pasaypa llakishqami kaykä!
¡Shonqüpis nanayparämi llakikun!
¡Mana alli runakunaqa traicionërumi kayan!
¡Kuyapäkuyninpis manami kantsu!
17 Kay patsacho taqkuna pasaypami mantsariyanqa.
Uchkuman y trampaman jeqaqnömi kayanqa.
18 Mangäda tamyami tamyamunqa.
Kay patsata tukmaraqkunapis pasaypami tsuktsukyäyanqa.
Mantsariypä kaptinmi qeshpiq kaqqa uchkuman jeqanqa.
Uchkupita yarquq kaqnami toqllaman yaykunqa.†
19 Kay patsa pasaypa mantsariypämi tsuktsukyanqa.
Tsaymi maytsaychöpis rachir ushakanqa.
20 Machashqa runa tsankapaykaqnömi tikranqa.
Tsuklla ushakanqannöllami ushakanqa.
Runakuna jutsata rurayanqanwanmi kay patsa pasaypa lasätsikuykan.
Tsaymi atska qepiwan sharkuyta mana kamäpakuq runanölla kay patsapis kanqa.
21 Tsay junaqmi ciëlucho kaq munayyuqkunatapisa Tayta Dios castiganqa.
Kay patsacho kaq reykunatapis castiganqa.
22 Llapanta qorirkurmi pözuman wiñaqnö prësu wichqarätsinqa.
Tsaycho atska wata wichqararkatsirmi paykunata pasaypa castiganqa.
23 Llapanta mandaq Tayta Dios Sión jirkanpita kachamuptinmi killapis penqakunqa.
Rupaypis manami atsikyanqanatsu.
Jerusaléncho chipipiykaqta y munayyuq kanqantami mayor runakunapis rikayanqa.