Tiro y Sidón markakunata ima päsananpä kaqtapis ninqan
23
Kaychömi qellqaraykan Tiro markata ima päsananpä kaqtapis Tayta Dios revelanqan.†¡Jatusaq büqui manijaq runakuna, llakikurnin pasaypa waqayay!
¡Tiro markata ushakätsirmi büquiwan chäyänayki sitiukunatapis ushakätsiyashqa!
Tsaynö ushakanqanta Quitima islapitami willakayämun.
2 ¡Lamar kuchuncho taq Sidónb runakuna, pasaypa llakikuyay!
Qamkunami negocianti kar büquikunawan maytsaymanpis aywayanki.
3 Jatunkaray lamarpa päsarmi mikuytapis rantiyämunki.
Tsay mikuyqa Nilo mayu pampakunacho wayunqan mikuymi kaykan.
Qamkunawanmi maytsay nación runakuna negociuta rurayan.
4 Lamar kuchuncho kaykaq Sidón runakuna, ¡pasaypa penqakuyay!
Tiro marka ushakashqa kaptinmi lamarpis llakikur nikan:
“Tiro runakunaqa wamräkunanömi kayarqan.
Paykuna ushakäyaptin kananqa imaypis mana wachaqnö y mana qeshyakuqnönami kaykä.
Chölukunata ni wamrakunata imaypis mana wätaqnönami kaykä”.
5 Tiro marka ushakanqanta musyaykur Egipto runakunapis pasaypami llakikuyanqa.
6 ¡Lamar kuchuncho taqkuna, Tarsisman aywaykur pasaypa waqayay!
7 Tiro markaqa unay markami karqan.
Tsaychöqa imaypis fiestallami kakuq.
Tiro runakunaqa maytsaychömi mushuq markakunatapis shäritsiyaq.
8 Tsay markakunachömi reykunatapis churayaq.
Tiro markapita puriq negociantikunaqa maytsaychöpis reynörämi respitashqa kayaq.
Tiro markata ushakätsiyänanpä pï kamakätsinqantapis tantiyakushun. 9 Llapanta mandaq Tayta Diosmi kamakätsishqa runa tukuqkunata penqakatsir y munayyuq runakunatapis penqakuyman churar.
10 Tarsis runakuna, lamar kuchuncho büquikuna ichiräyänanpä puertukuna manami kannatsu. Kananqa büquiwan mikuyta apayämunaykipa trokin kikikikunana Nilo mayucho taq runakunanö mikuyta murukuyay.
11 Tayta Diosmi lamar jananpa makinta joqarir maytsay nacionkunata tsuktsukyätsishqa.
Canaánchoc amparakuna corralashqa markakunata ushakätsiyänanpämi nishqa.
12 Sidón marka runakunatami nishqa:
“Qamkunaqa fuerzashqa jipashnönami kaykäyanki.
Tsaynö kaykarqa fiestatapis amana rurayaynatsu.
Quitim islaman aywakurpis manami jamayta tariyankitsu”.
13 ¡Tantiyakuyay Babilonia markata imanö ushakätsiyanqantapis!
Yaykur atacayänanpämi Asiria runakuna törrikunatapis shäritsiyashqa.
Markaman yaykurmi palaciunkunatapis raqällatana kachaykuyashqa.
Kananqa jirka uywakunallanami tsaycho täyan.d
14 ¡Büqui manijaq Tarsis runakuna, llakikur waqayay!
¡Büqui chänan sitiupis manami kannatsu!
15 Ushakanqanpita qanchis chunka (70) watayaqmi Tiro markata pipis yarpanqatsu. Tsay watakuna kanqa qanchis chunka wata rey kawanqannömi. Qanchis chunka wata cumpliptinqa prostitütapä runakuna cantayanqannömi Tiro markapäpis cantayanqa. Cantarmi niyanqa:
16 “Qonqakashqa kaykaq prostitüta, arpaykita aptakurkur markapa tumamuy.
Pillapis yarpäshunaykipä tukaraykar kutin kutin cantay”.
17 Qanchis chunka wata cumpliptinqa Tiro markata yapaymi Tayta Dios yanapanqa. Tsaymi tsay markacho taq runakuna yapay rantikur qallaykuyanqa. Yapaymi maytsay nación runakunawan negociuta rurayanqa. 18 Tsaynö kaptinpis manami kikinkunapänatsu gänayanqanta qoriyanqa, sinöqa Tayta Diospänami. Tiro runakuna gänayanqanwanmi Tayta Diosta sirviqkuna pacha junta mikuyanqa y alli latsapata jatikuyanqa.