Jerusalén runakuna Tayta Diospita mana mantsapakuyanqan
22
Kaychömi qellqaraykan Rikachakuna Pampachoa ima kananpä kanqantapis Tayta Dios revelanqan.Jerusalén runakuna, ¿imatä markaykikunacho kaykan?
¿Imanirtä wayi janankunachob kushikuykäyanki?
2 ¿Imanirtä llutaypa llutar kushikuykäyanki?
Manami espädawantsu ni guërrachötsu wanuyanki,
tsaypa trokinqa mallaqaywan y pesti qeshyawanmi wanuyanki.
3 Autoridäkunapis flëchayänanta mantsarirmi qeshpir aywakuyashqa.
Karupa qeshpiyaptikipis llapaykitami prësu tsariyäshushqayki.
4 Tsaymi nï: ¡Ñöpäpita witikuyay!
Marka mayintsikkunata wanutsiyänanpä kaptinmi pasaypa waqä.
Tsaynö waqaptïpis ama shoqayämaytsu.
5 ¡Rikachakuna Pampacho pasaypa mantsariypämi kanqa!
¡Tsay junaq chämunanpämi llapanta mandaq Tayta Dios kamakätsishqa!
Marka murällatapis juchutsiyanqami.
Runakuna ausiliuta mañakur qayaräyanqanpis jirkakunayaqmi wiyakanqa.
6 Atacamänantsikpämi Elam runakuna flëchankunata kamarikuyashqa.
Carrëtankunamanpis yarkuyashqanami.
Cawallunkunatapis muntakuyashqanami.
Kir runakunapis escüdunkunac aptashqanami kaykäyan.
7 Maypis täkuy munay pampakunachöpis guërra carrëtankuna juntanami kaykäyan.
Cawallun muntashqa runakunapis markantsik punkuchönami kaykäyan.
8 Tsapämänantsikpä pipis mana kaptinmi munti niyanqan palaciucho churaraykaq armakunallaman yärakuykäyanki.† 9 Davidpa Markanpa murällan juchushqa kaqkunata allitsayänaykipämi rikapakuyashqayki. Yakupita mana ñakanantsikpämi ura kaq pözuman yakuta juntatsiyashqayki.† 10 Murällata allitsayänaykipämi Jerusaléncho wayikunata rikapaykur mana alli kaqta juchutsiyashqayki. 11 Markata tsaparaq murälla waqtancho estanqui kaptinmi marka rurinchöna yaku pözuta rurayashqayki tsaypitana yakuta jipiyänaykipä. Tsaynö kamarikurpis Tayta Diosman manami yärakuyankitsu. Atacamänantsikpä unaypita patsa Tayta Dios kamakätsishqa kaptinpis paypita manami mantsapakuyankitsu.
12 Llapanta mandaq Tayta Diosmi munarqan jutsata rurayanqaykita jaqirir waqayänaykita. Tsaynöllami munarqan llakikuyänaykita y aqtsaykikunatapis rutukuskir qachqa latsapakunata jatikuyänaykita. 13 Pay ninqanta cäsukuyänaykipa trokinqa fiestata rurarmi wäkakunata y üshakunata pishtar, aytsata mikur y vïnuta upyar kushikuyarqayki. Tsaymi niyarqayki: “Kawanqantsikyaq mikushun upushun. Wanukurqa pachantsiktami apashun”.†
14 Tsaynö kayaptikimi llapanta mandaq Tayta Dios nimarqan: “Tsaynö kayanqanpita manami imaypis perdonashätsu”.
Llapanta mandaq Tayta Diosmi tsaynö nishqa.
Sebna wanunanpä ninqan
15 Llapanta mandaq Tayta Diosmi nimarqan: “Reypa palaciuncho mandaq Sebnaman† ayway. Chaykur ninki:
16 “¿Pï kanqaykitatä yarpanki?
¿Imanirtä altunnin qaqacho kuyayllapä wayitanö nïchuykita ruraykätsinki?
17 Tsaynö kaykaptikipis Tayta Dios prësu tsaritsishurnikimi karu nacionman apatsishunki.
18 Pelötatanömi jatun nacionman jitariykushunki.
Tsaycho wanuptikimi kushishqa purinqayki carrëtaykikunapis ichiräkuyanqa.
Ushakaptikimi mandashuqniki reypis pasaypa penqakunqa.
19 Tayta Diosmi autoridä kanqaykipita qarqushunki.
Carguykipitapis jitarishunkimi.
20 “Tayta Diosmi nin: ‘Tsay junaqmi Hilcíaspa tsurin Eliaquimtana qayashä. Payqa sirvimaqnïmi kaykan. 21 Paytanami latsapaykikunata jatitsishä. Wachukuykiwanmi tseqllanta wachakätsishä. Nirkurmi qampa trokiki autoridä kananpä churashä. Paymi Jerusalén runakunapa y Judá runakunapa taytannö kanqa. 22 Paytami qoykushä rey Davidpa palaciunpa llävinta. Pay kichanqantaqa manami pipis wichqanqatsu. Wichqanqantaqa manami pipis kichanqatsu.†
23 “ ‘Paytami churashä pirqaman shumaq jatishqa estäcanö kananpä. Mandaq kanqanta rikarmi castankunapis kushikuyanqa. 24 Väsukuna, järrakuna y imayka niraq pucillakuna estäcacho warkuraqnömi llapan castankunapis, tsurinkunapis y willkankunapis payman amparakuyanqa.
25 “ ‘Sebnataqa pirqacho jinchi jatiraykaq qerunö kaykaptinpis jitarishämi. Tsay junaqmi payman amparakuqkunapis ushakäyanqa’. Llapanta mandaq Tayta Diosmi tsaynö nin”.