Babilonia nación imanö kananpäpis ninqan
21
Kaychömi qellqaraykan lamar kuchuncho kaykaq tsunyaq jirka imanö kananpä Tayta Dios revelanqan.Neguevpita shamuq shukukuynömi maytsaytapis ushaq soldädukuna aywaykäyämun.
Pasaypa mantsaypä tsunyaq jirkapami shamuykäyan.
2 Alläpa mantsariypäta revelamarmi Tayta Dios rikatsimashqa runakuna runa mayinta llullapaykäyanqanta.
Tsaynöllami rikatsimashqa wanutsikuq runakuna runa mayinta wanuykätsiyanqanta.
¡Elam runakuna, atacayänaykipä shayämuy!
¡Media runakuna, wanutsiyänaykipä yaykayämuy!
¡Babilonia runakuna amana pitapis ñakatsiyätsunnatsu!
3 Babilonia nacionta Tayta Dios ushakätsinanpä kanqanta musyaptïmi shonqüyaqrä nanaypis chaykun.
Wachay nanaywan llakikuq warmitanörämi llakikuypis tsariykaman.
Revelacioncho wiyanqä y rikanqä pasaypami mantsaritsiman.
4 Juiciü oqrashqanö karmi ima ruraytapis kamäpakütsu.
Mantsariyllawanmi tsuktsukyaykäpis.
Patsa tsakänanta munarpis tsakarkuptinqa pasaypami mantsarï.
5 Babiloniacho mësa kamarishqami kaykan.
Janancho mantilpis mashtaraykanmi.
Tsaychömi mikuykäyan, upuykäyanna.
¡Capitankuna, shäriyay!
¡Pelyar tsapakuyänayki escüduykikunata kamarikuyay!
6 Tayta Diosmi nimashqa: “Imata rikanqantapis willakamunanpä juk rikachakuqta churamuy. 7 Guërra carrëtan qarachash majanpa majanpa cawallukuna shamuykäyaqta rikar o ashnun muntashqa o camëllun muntashqa shamuykäyaqta rikar juklla willakamutsun”.
8 Nirkurnami rikachakuq churanqä runa qayakamur nimarqan: “Taytay, churamanqallaykichömi paqaspis junaqpis mana kuyukuypa kaykä. 9 Kananmi itsanqa rikaykä ishkay cawallukuna guërra carrëtan qarachash shamuykaqta”.
Paykuna chaykurmi niyarqan: “¡Ushakashqanami, ushakashqanami Babilonia marka!† ¡Adorayanqan dioskunapa ïdulunkunapis patsacho pakishqanami jitaraykäyan!”
10 Marka mayikuna, ëracho trïgu wirushqanö y wayrashqanömi pasaypa ñakaykäyanki. Qamkunata willaykä kuyamaqnintsik y llapanta mandaq Tayta Dios llapan nimanqantami.
Edom imanö kananpäpis ninqan
11 Kaychömi qellqaraykan edomita runakuna imanö kayänanpä Tayta Dios revelanqan.
Seirpitami juk runa qayakamur nimashqa:
“Tayta rikachakuq, ¿imay höranatä patsa waranqa?a
¿Aykarätä pishin patsa waränanpa?”
12 Rikachakuykanqäpitamib nirqä:
“Patsa wararpis yapaymi tsakanqa.
Masta musyayta munarqa yapay tapukuq kutimunki”.
Arabia runakuna imanö kayänanpäpis ninqan
13 Kaychömi qellqaraykan Arabia runakuna imanö kayänanpä Tayta Dios revelanqan.
Negociuta apar Arabiacho kaykaq ichishaq jachakunacho patsakuq Dedán runakuna, 14 qeshpiq runakunata yakun taripätsiyay.
Temacho taq runakuna, mikuyninkuna qarayay.
15 Arabia runakunaqa espädawan wanutsishqa kayänanpä kanqanpitami qeshpiykäyan.
Flëchawan wanutsishqa kayänanpä kanqanpitami ayqiykäyan.
Guërracho wanuyta mantsarmi qeshpiykäyan.
16 Tayta Diosmi nimashqa: “Kananpita juk watatami Cedar runakuna munayyuq kayanqan ushakanqa. Juk wata arunanpä conträtu ruraq runa cada junaqta yuparanqannömi tsay wata yupashqalla kanqa. 17 Flëchawan flëchaq allinnin chölukunaqa wallkaqllanami Cedarcho kawaykar quëdayanqa”.
Israel runakunata kuyaq Tayta Diosmi tsaynö nishqa.