Egipto y Etiopía nacionkunata Asiria runakuna vinciyänanpä ninqan
20
Juk kutichömi Asiria nacionpa mandaqnin rey Sargón Asdod markaman kacharqan soldädunkunatawan mas mandaq capitanta. Tsaynö kachaptin aywarmi Asdod markata vinciskir munaynincho katsirqan.2 Tsay witsanmi Amozpa tsurin Isaíasta Tayta Dios nirqan: “Qachqa latsapa jatiraykanqaykita jipikur llanqikitapis jipiy”.
Tayta Dios ninqannö rurarmi qallapächulla y qalla chakilla Isaías purirqan.
3 Tsaypita kimsa watatami Judá runakunata Tayta Dios nirqan: “Egipto runakunawan Etiopía runakuna imanö ñakayänanpä kanqanta musyayänaykipämi sirvimaqnï Isaías kimsa wata qallapächulla y qalla chakilla purishqa. 4 Isaías purinqantanömi Egipto runakunatawan Etiopía runakunata qallapächuta, qalla chakita y qara sikita Asiria nacionpa mandaqnin rey prësu apanqa. Chölukunatapis awkinkunatapis penqakatsirninmi tsaynö apanqa.
5 “Tsaynö prësu apanqanta musyarmi pasaypa mantsakäyanki. Etiopía runakunaman y Egipto runakunaman yärakuyanqaykipita pasaypami penqakuyanki. 6 Tsay witsanmi lamar kuchunkunacho taq runakuna niyanqa: ‘¡Maski rikayay! ¡Imanöshi kaykäyan yärakunqantsik runakuna! Paykunamanmi yärakurqantsik Asiria runakunapita salvamänantsikpä. Kananqa ¿pirä salvamäshun?’ ”