Egipto nación imanö kananpäpis ninqan
19
Kaychömi qellqaraykan Egipto nación imanö kananpä Tayta Dios revelanqan.†Pasaypa aywaq pukutay jananchömi Egiptuman Tayta Dios aywaykämun.
Egiptucho kaykaq ïdulukunapis paypa ñöpanchöqa tsuktsukyäyanmi.
Pasaypa mantsariywanmi Egipto runakunapa shonqunpis ushakaykan.
2 Tayta Diosmi nin:
“Noqami kamakätsishä Egipto runakuna kikinpura chikinakuyänanpä.
Chikinakurmi wawqinwanpis y runa mayinwanpis pelyayanqa.
Juk markacho taqkunawan juk markacho taqkunapis pelyayanqami.
Juk nación runakunapis juk nación runakunawanmi guërrata rurayanqa.
3 Egipto runakuna mantsakashqami kayanqa.
Imata rurayänanpä yarpäyanqanpis manami kamakäpakuyanqatsu.
Tsaymi imata rurayänanpäpis ïdulukunata, brüjukunata, wanuqkunapa almanta y adivïnukunata tapukuyanqa.
4 Tsaynöllami juk reypa munayninman Egipto runakunata churashä.
Tsay reyqa pasaypa mana allimi kanqa”.
Llapanta mandaq Tayta Diosmi tsaynö nin.
5 Nilo mayu tsakiptin raqranpis yakuynaqmi rikakunqa.
6 Sekyakunacho qocharaq yakupis asyanqami.
Raqrakunapa aywaq yakupis tsakinqami.
Shoqushkunapis y ututukunapis tsakinqami.
7 Nilo mayu kuchunkunapis tsakinqami.
Ñöpankunacho kaykaq qewapis tsakirmi ushakanqa.
Ima murupakuykunapis chipyaqmi tsakiykar ushakanqa.
8 Nilo mayucho anzuëluwan pescaqkunapis llakikurninmi waqayanqa.
Mällawan pescaqkunapis pasaypami llakikuyanqa.
9 Lïnu manana kaptinmi lïnuta putskaqkuna ima ruraytapis kamäpakuyanqanatsu.
10 Tëla awaqkunapis lïnu ushakaptinmi pasaypa llakikuyanqa.
Arupakuqkunapis pasaypami mantsakäyanqa.
11 ¡Zoán markapa autoridäninkunaqa yarpayniynaq upa runakunami!
¡Rey Faraónta yätsiqkunapis upatakashqami kaykäyan!
¡Imanirtä Faraónta niyanki tantiyaq runakuna casta kayanqaykita!
¡Imanirtä payta niyanki unay reykuna casta kayanqaykita!
12 Faraón, ¿maytä yachaq runaykikuna? Rasunpaypa yachaq karqa mä musyatsiyäshuy llapanta mandaq Tayta Dios Egiptuta imanö rurananpäpis yarpaykanqanta. 13 Zoán markapa autoridäninkunaqa upanömi kaykäyan. Menfis markapa autoridäninkunapis llutantami criyiyan. Provinciakunapa mandaqninkunapis Egipto runakunata llutantami criyitsiyashqa. 14 Egipto runakunataqa Tayta Diosmi pantakätsishqa. Tsaymi lanzanqanyaq machashqa runa tsankapaykachaqnö imata rurayänanpä kaqtapis tantiyayantsu. 15 Egipto nación ushakänan junaq chämuptinqa manami mandaqnin reypis, ni común runapis, ni imaykayuqpis ni imaynaqpis salvanqanatsu.
Egipto runakuna Tayta Diosta sirviyänanpä ninqan
16 Llapanta mandaq Tayta Dios castiganan junaqmi Egipto runakuna warminö mantsariyanqa. Paykunata castigananpä makin joqarishqa kaykanqanta musyarmi pasaypa mantsarir tsuktsukyäyanqa. 17 Judá runakunatapis pasaypami mantsayanqa. Judá runakunapita parlaptillanmi yarpäyanqa llapanta mandaq Tayta Dios castigananpä kanqanta. Tsayta yarparmi pasaypa mantsariyanqa.
18 Tsay junaqqa Egiptucho pitsqa markachömi Canaáncho parlayanqannö hebreo idiömata parlayanqa. Tsaycho taqkunaqa llapanta mandaq Tayta Diosllata sirviyänanpämi awniyanqa. Tsay pitsqa markakunapita jukpa jutinmi kanqa Herez.
19 Tsay junaqqa patsan Egiptuchömi Tayta Diospä juk altarta pirqayanqa. Lindërunchönami Tayta Diosta yarpäyänanpä juk wankata ichïtsiyanqa. 20 Tsayta rurayanqa llapanta mandaq Tayta Diosta Egiptucho sirviyanqanta pïmaypis musyayänanpämi.
Pipis ñakatsiptinqa Tayta Diostami mañakuyanqa. Tsaymi juk salvaqta kachamunqa ñakaypita jipinanpä. 21 Tsaynöpami Egipto runakunata Tayta Dios musyatsinqa llapanpä munayyuq kanqanta. Tsayta tantiyarmi Egipto runakunapis sacrificiukunata y tsaki mikuy ofrendakunata awniyanqannölla templuman apayämunqa.
22 Egipto runakuna mana cäsukuq kayanqanpita castigarpis Tayta Dios yanapanqanami. Tsaynö yanapanqa paykunapis Tayta Dios ninqanta cäsukuyaptinmi.
23 Tsay witsanqa jatun nänimi Egiptupita Asiriayaq chanqa. Tsaymi Asiria runakuna Egiptuman aywayanqa y Egipto runakunapis Asiriaman aywayanqa. Egipto runakunawan Asiria runakuna takukaykurmi Tayta Diosta sirviyanqa.