tejón Tejonqa taksha allqu niraq uywami kaykan. Senqanmi itsanqa takshalla. Wishkashkunanöpis qaqakunachömi täyan (Lev. 11.5; Deut. 14.7; Sal. 104.18).

templu Templuqa Tayta Diosta adorayänanpä jatunkaray patiuyuq wayimi karqan. Patiukuna chawpin wayichömi ishkay cuartukuna karqan qoriwan adornashqa. Yaykuna kaq cuartunmanqa sacerdötikunallami tutapa y tardipa yaykuyaq inciensiuwan qoshnitsiyänanpä. Ruri kaq cuartumannami watacho juk kutilla mas mandaq sacerdöti yaykuq. Wakin runakunanami patiukunaman y kuchuncho alarkunallaman qorikaykur Tayta Diosta alabayaq. Templuqa manami wakin markakunacho karqantsu, sinöqa Jerusalénllachömi (Mat. 21.12; 24.1; Juan 2.20; Hech. 2.46).

Tinkuna Toldu Tinkuna Tolduqa runakuna Tayta Dioswan tinkuyänanpä toldupita rurashqa wayimi karqan. Puntataqa Israel runakuna tsunyaq jirkapa aywar campamentupita karulächömi Tinkuna Tolduta shäritsiyaq (Éxo. 33.7). Tsaypitanami campamentu chawpinchöna juk Tinkuna Tolduta rurayarqan (Núm. 2.2). Tsaymanmi Pactu Babulta Moisés churarqan mandaq sacerdötiwan Tayta Dios tsaycho tinkuyänanpä (Éxo. 29.42-43). Jukläpa aywarnami Tolduta paskaskir apakuyaq. Maymanpis chaykur patsakuyanqanchömi Tinkuna Tolduta ichïtsiyaq Tayta Diosta tsaycho mañakur alabayänanpä (Éxo. 40; Hech. 7.44; Heb. 9.1-7). Tinkuna Toldupa jukaq jutinmi Pactu Toldu karqan.

trïbu Trïbuqa ayllupita mas atskaq runakunami. Israel runakunaqa chunka ishkay trïbumi kayarqan. Tsay trïbukuna qallaykurqan Jacobpa chunka ishkay tsurinkunapitami (Gén. 49.28). Tsaymi Israel nacioncho kayarqan Rubén trïbu, Simeón trïbu, Leví trïbu, Judá trïbu, Isacar trïbu, Zabulón trïbu, Dan trïbu, José trïbu, Benjamín trïbu, Neftalí trïbu, Gad trïbu y Aser trïbu (1Crón. 2.1).

trönu Trönuqa mandaq reypa jamakunanmi kaykan. Trönunpitami munaynincho tsararanqan nacionta reykuna mandayan. Tayta Diosnintsikpis llapanpä munayyuq karmi gloriacho kaykaq trönunpita llapantapis mandaykan (Apoc. 4.2-6).

Tsaki Mikuy Cosëcha fiesta Liyinki Pentecostés fiestapita tantiyatsikuyta.