2 Tsaymi Jesús nirqan: “Rasunpaypami nï: Kay llapan rikayanqaykita chipyaqmi juchutsiyanqa. Manami ni juk rumillapis pirqaraykar quëdanqatsu”.

3 Tsaypitanami Olivos jirkanman aywaykur Jesús jamakurqan. Tsaychömi kikillankuna kaykar discïpulunkuna tapuyarqan: “Taytay, willaykayämay. ¿Imaytä ninqaykinö kanqa? Kutimunaykipä y kay patsa ushakänanpä ¿ima señaltä kanqa?”

4 Jesúsnami nirqan: “Paqtä pipis engañayäshunkiman. 5 Atskaqmi jutïcho shamur niyanqa: ‘Noqami Cristo kaykä’. Tsaynö nirmi atskaq runakunata engañayanqa. 6 Guërra kaptinpis y guërra kananpä kanqanta musyarpis ama mantsariyaytsu. Puntataqa tsaykunarämi kanqa. Tsaynö kaptinpis kay patsaqa manarämi ushakanqarätsu. 7 Juk nacionmi juk nacionwan guërrata rurayanqa y juk marka runakunami juk marka runakunawan wanutsinakuyanqa. Tsaynöllami [pestipis,] mallaqaypis, terremötupis maytsaycho kanqa. 8 Tsay ñakaykunaqa qallaykunanllarämi kanqa.

9 “Tsay witsanmi ñakatsiyäshunki y wanutsiyäshunki. Noqa raykuqmi pïmaypis chikiyäshunki.^† 10 Tsaynö ñakarmi yärakuyninta atskaq kachariyanqa. Paykunaqa yärakuqkunata chikirmi autoridäkunaman jukninpis jukninpis apatsiyanqa. 11 Llulla profëtakunapis atskaq yurimurmi llutanta yachatsir atskaq runakunata engañayanqa. 12 Maytsaychöpis jutsata rurar kawarmi kuyanakuyanqanatsu. 13 Tsaynö kaptinpis wanuyanqanyaq yärakuqkunaqa salvashqami kayanqa.^† 14 Tayta Diospa mandakuyninpa alli willakuyninta maytsay nacionkunachöpis willakuyaptinrämi kay patsa ushakanqa.

15 “Profëta Daniel qellqanqannöllami Tayta Dios mana munanqanta sagrädu templucho rikayanki.^† (Kay qellqanqäta liyiqkunaqa shumaq tantiyakuyätsun.)^a 16 Tsaynö kaykaqta rikar Judea markakunacho taqkuna jirkakunapa qeshpir aywakuyätsun. 17 Wayi janancho kaykaqkuna^b imankunatapis mana jipiypa aywakuyätsun. 18 Chakracho kaykaqkunapis ni punchun jipiqpis ama kutiyätsuntsu.^†

19 “¡Ay imanörä ñakayanqa qeshyaq warmikuna y llullu wamrayuq warmikuna! 20 Tayta Diosta mañakuyay qeshpiyanqayki junaq tamya killacho ni jamay junaqcho mana kananpä. 21 Tsay witsanqa runakuna pasaypami ñakayanqa. Tayta Dios kay patsata kamanqanpita patsa manami imaypis tsaynöqa ñakayashqatsu.^† Tsaynöpis yapayqa mananami imaypis tsaynö ñakayanqanatsu. 22 Akranqan runakunata kuyaparmi Tayta Dios tsay ñakay junaqkunata päsatsinqa. Mana päsatsiptinqa llapanpis wanurmi ushakäyanqa.

23 “ ‘Tayta Dios kachamunqan Cristo kaychömi kaykan’ niyäshuptikipis ama criyiyankitsu. ‘Washachömi kaykan’ niyäshuptikipis ama cäsuyankitsu. 24 Tsay witsanmi Cristo tukuqkuna y llulla profëtakunapis yuriyämunqa. Runakunata criyitsiyänan raykuqmi mantsakaypä milagrukunatapis rurayanqa. Tsaynö rurarmi Tayta Dios akranqan runakunatapis engañayta munayanqa. 25 Manarä tsaynö kaptinmi musyayänaykipä willaykä.

26 “ ‘Tayta Dios kachamunqan Cristo tsunyaq jirkachömi kaykan’ niyäshuptikipis rikaq ama aywayankitsu. ‘Tsay wayichömi kaykan’ niyäshuptikipis ama criyiyankitsu. 27 Illaqukuptin ciëlupa juk kuchunpita jukaq kuchunyaq atsikyanqanta rikayanqannömi Runapa Tsurin kutimuptin llapanpis rikayanqa.^† 28 Maychöpis wanushqakuna jitaräyanqanmanmi wiskurkuna qorikäyanqa”.^{c †}

29 “Pasaypa ñakaykuna päsaskiptinnami rupaypis tsakaskinqa, killapis atsikyanqanatsu, qoyllurkunapis shushuyämunqa y ciëlupis tsuktsukyanqa.^† 30 Tsaypitanami Runapa Tsurin shamunanpä señal ciëlucho rikakämunqa. Runapa Tsurin shamuptinnami pukutay janancho pasaypa chipipiykar munayyuq shamuykaqta maytsaychöpis runakuna rikayanqa. Tsaynö shamuykaqta rikarmi llapan nación runakuna mantsarir waqayanqa.^† 31 Cornëtata jinchi tukamuptinmi angelninkunata Runapa Tsurin kachamunqa akranqan kaqkunata maytsaypitapis qoriyämunanpä.

32 “Hïgus jachata rikar tantiyayay. Raprankuna sheqllimuptinmi usya tiempu qallananpäna kanqanta musyayanki. 33 Tsaynöllami ninqänö päsanqanta rikar musyayanki Tayta Diospa mandakuynin cercachöna kanqanta. 34 Rasunpaypami nï: Kanan tiempu runakuna manarä ushakaptinmi llapan ninqäkuna cumplinqa. 35 Ciëlu y kay patsa ushakaptinpis noqa ninqäkunaqa manami ushakanqatsu.

36 “Runapa Tsurin imay junaq imay höra kutimunanpä kanqanta manami runapis ni angelpis [ni Diospa Tsurinpis] musyantsu. Tsaytaqa Taytällämi musyan.

37 “Noé kawanqan witsan runakuna kawayanqannömi^† Runapa Tsurin shamunqan witsanpis kawayanqa. 38 Diluviu manarä kaptin arcaman Noé yaykunqan junaqyaqmi runakuna mikur, upyar y majatsakar kayarqan. 39 Tsaynö kaykäyaptinmi diluviu illaqpita shamuptin^† llapanpis shenqaypa wanur ushakäyarqan. Tsaynöllami mana musyayanqan höra Runapa Tsurinpis illaqpita shamunqa.

40 “Tsay hörami ishkaq runakuna chakracho aruykäyaptin jukaqta apanqa y jukaqtana jaqinqa. 41 Maraycho ishkaq warmikuna aqakuykäyaptinmi jukaqta apanqa y jukaqtana jaqinqa. 42 Tsaymi kamarikushqallana kayänayki. Manami musyayankitsu imay junaq Señorniki kutimunanpä kanqantapis.

43 “Tantiyakuyay. Imay höra suwa shamunanpä kanqanta musyarqa mana punuypami wayinta pipis täpanman. 44 Tsaynölla qamkunapis kamarikushqalla kaykäyay. Mana musyayanqayki hörami illaqpita Runapa Tsurin shamunqa.^†

45 “Mas yärakunqan y yachaq wätaynintami wayinman patronnin churan wakin wätaykunatapis hörancho qarananpä. 46 Patronnin kutimur yätsinqannö llapantapis ruraykaqta tariptinmi tsay wätay pasaypa kushikunqa. 47 Rasunpaypami nï: Tsay wätayninpa munayninmanmi llapan imaykantapis patronnin churanqa. 48 Mana yärakuypä wätay karmi itsanqa ‘patronnï manarämi kutimunqarätsu’ nir 49 wätay mayinkunata maqan y upyaq mayinkunawan mikur upyar jitaräkun. 50 Tsaynö kaykaptinmi mana yarpanqan höra illaqpita patronnin kutimur 51 mana kuyapaypa allish tukuq runakunatawan tsay wätayninta castiganqa. Tsaychömi pasaypa waqar kiruntapis uchunqa”.