Chunka jipashkunaman tinkutsiypa Jesús yachatsinqan
25
“Tayta Diospa mandakuynin imanö kanqantapis willayäshayki. Chunka jipashkunashi chiwchinkunata apakurkur majatsakaq chölu shamuptin fiestaman yaykuyänanpä shuyaq aywayänä. 2 Pitsqa kaq jipashkunashi alli yarpayyuq kayänä. Pitsqa kaqnashi yarpayniynaq kayänä. 3 Yarpayniynaq kaqkunaqa manashi chiwchinkunaman aceitita yapayänanpä apayänätsu. 4 Tsaynö kaptinpis alli yarpayyuq kaq jipashkunashi itsanqa chiwchinkunapä aceitita apayänä. 5 Majatsakaq chölu manarä chaptinshi tsay jipashkuna shuyaraykäyanqancho punukaskiyänä.6 “Pullan paqasnashi juk runa qayakur ninä: ‘¡Casarakuq chölu shamuykannami! ¡Chaskiyänaykipä yarqayämuy!’ 7 Tsayshi llapan jipashkuna shärirkur chiwchinkunata tsaritsiyänä. 8 Chiwchinkuna upinaptinnashi yarpayniynaq jipashkuna alli yarpayyuq kaqkunata mañakur niyänä: ‘Chiwchïkunami upinaykan. Aceitita qaraykayällämay’. 9 Tsaynö niyaptinshi alli yarpayyuq kaqkuna niyänä: ‘Mana ushakäpakunantsikpä aceiti rantikuqkunapita ras rantiyämuy’.
10 “Aceiti rantiq aywayanqanyaqshi majatsakaq chölu chänä. Tsayshi kamarikushqa shuyaraykaq jipashkunawan fiestaman yaykuskiptin punku wichqakaskinä. 11 Aceiti rantiq jipashkuna kutirnashi punku wichqaraykaqta tariyänä. Tsayshi qayakur niyänä: ‘¡Taytay, taytay! ¡Punkuta kichapaykayällämay!’ 12 Tsaynö qayakuyaptinshi majatsakaq chölu ruripita nimunä: ‘Qamkunata manami reqïtsu. ¡Pirä kakuyankipis!’ nir”.†
13 Tsaynö willaskirnami Jesús nirqan: “¡Qamkunapis maya mayalla kaykäyay! Manami musyayankitsu imay junaq ni imay höra [Runapa Tsurin kutimunanpä kanqanta]”.
Wätayninkunata patronnin qellayta jaqipanqan
14 “Tayta Diospa mandakuynin imanö kanqantapis willayäshayki. Juk runashi karupa aywakunanpä wätayninkunata qayaskir qellayninta arutsinanpä kachapänä. 15 Yachayninkuna imanö kanqanta musyarshi jukninta pitsqa talentua qellayta kachapänä, jukninta ishkay talentu qellayta kachapänä y juknintanashi juk talentu qellayta kachapänä. Nirkurshi karu markapa aywakunä. 16 Pitsqa talentu qellayta chaskiq kaqshi negociuta rurar pitsqa talentu masta gänanä. 17 Ishkay talentu qellayta chaskiq kaqpis negociuta rurarshi ishkay talentu mas qellayta gänanä. 18 Tsaynö kaptinpis juk talentu qellayta chaskiq kaqshi itsanqa patsata uchkuskir pampaykunä.
19 “Patronnin unayta kutiykurnashi qellayninta kachapanqanpita cuentata mañanä. 20 Tsayshi pitsqa talentu qellayta chaskiq kaq pitsqa talentu mas qellayta entregar ninä: ‘Taytay, pitsqa talentu qellayta jaqipämanqaykiwanmi pitsqa talentu mas qellayta gänashqä’.
21 “Tsaynö niptinshi patronnin ninä: ‘Alli wätaymi kanki. Wallkallapitapis qellayta miratsinqaykipitami mas mandaq kanaykipä churashayki. Wayïman yaykamuy fiestata rurar kushikunantsikpä’.
22 “Tsaynöllashi ishkay talentu qellayta chaskiq kaqpis ninä: ‘Taytay, ishkay talentu qellayta jaqipämanqaykiwanmi ishkay talentu masta qellayta gänashqä’.
23 “Patronninnashi ninä: ‘Alli wätaymi kanki. Wallkallapitapis shumaq miratsinqaykipitami mas mandaq kanaykipä churashayki. Wayïman yaykamuy fiestata rurar kushikunantsikpä’.
24 “Juk talentu qellayta chaskiq wätayninshi itsanqa ninä: ‘Taytay, noqa musyämi mana kuyapäkuq kanqaykita. Qamqa mana murunqaykipitami cosechanki. Mana arunqaykipitami qorinki. 25 Tsaynö kanqaykita mantsarirmi qellaynikita pampaykurqä. Taytay, kay qellaynikitami kanqantanölla apamushqä’.
26 “Patronninnashi ninä: ‘¡Qamqa mana yärakuypä qela wätaymi kanki! Mana murunqäpita cosechanqäta musyaykar y mana arunqäpita qorinqäta musyaykarqa 27 qellaynïta bancullamanpis churankiman karqan kutimur wachaynintawan qorinäpä’.
28 “Tsaycho kaykaq runakunatanashi ninä: ‘¡Tsararanqan qellaynïta qechuskir chunka talentu qellay tsararaqta qoykuyay! 29 Yärakuypä kaqtaqa mastami kamaripäshä. Tsaynö kaptinpis mana yärakuypä kaqtami itsanqa ichik tsararanqallantapis qechushä.† 30 Kay yarpayniynaq wätayta mantsaypä tsakayman jitarpuyay. Tsaychömi pasaypa waqar kiruntapis uchunqa’ ”.†
Juiciu final imanö kananpä kanqan
31 “Runapa Tsurin chipipiykar santu angelninkunawan shamurmi† chipipiykaq trönunman jamakunqa.† 32 Tsay junaqmi maytsay nacionpitapis llapan runakuna ñöpanman qorikäyanqa. Tsaymi mitsikuq runa üshakunata cabrakunapita rakinqannö runakunata rakinqa. 33 Üshakunatami derëchanman rakinqa y cabrakunatanami itsuqninman rakinqa.
34 “Derëchancho kaqkunatami ninqa: ‘Qamkunataqa Taytä pasaypami kuyayäshunki. Tayta Diospa mandakuyninman yaykuyänaykipä shayämuy. Mandakuynintaqa kay patsata manarä kamarmi qamkunapä Taytä kamarishqa. 35 Qamkunami mallaqaptï qarayämashqayki. Yakunaptïpis yakuta qarayämashqayki. Jäpa kaptïpis patsatsiyämashqaykimi. 36 Latsapaynaq kaykaptïpis jatitsiyämashqaykimi. Qeshyaptïpis jampiyämashqaykimi. Carcelcho kaptïpis watukayämashqaykimi’.†
37 “Tsaynö niptinmi tsay alli ruraqkuna tapuyanqa: ‘Taytay, ¿imaytä mallaqaptiki qarayashqä? ¿Imaytä yakunaptiki yakuta qarayashqä? 38 ¿Imaytä jäpa kaptiki patsatsiyashqä? ¿Imaytä latsapaynaq kaptiki jatitsiyashqä? 39 ¿Imaytä qeshyaptiki o carcelcho kaptiki watukaq shayämushqä?’ 40 Tsaynö niyaptinmi rey ninqa: ‘Rasunpaypami nï: Pitapis tsaynö ñakaqkunata kuyaparqa noqatami kuyapäyämashqayki’.†
41 “Itsuqnincho kaqkunatanami ninqa: ‘¡Maldicionashqa kaqkuna, ñöpäpita witikuyay! ¡Diablupä y angelninkunapä kamarishqa imaypis mana upiq ninaman aywayay! 42 Qamkunaqa mallaqaptïpis manami qarayämashqaykitsu. Yakunaptïpis manami yakuta makyayämashqaykitsu. 43 Jäpa kaptïpis manami patsatsiyämashqaykitsu. Latsapaynaq kaptïpis manami latsapata jatitsiyämashqaykitsu. Qeshyaptïpis carcelcho kaptïpis manami watukayämashqaykitsu’.
44 “Tsaynö niptinmi itsuqnincho kaqkunapis tapuyanqa: ‘Taytay, ¿imaytä mallaqaykaqta, yakunaykaqta, jäpa kaykaqta, latsapaynaq kaykaqta, qeshyaykaqta, carcelcho kaykaqta rikaykar yanapayashqätsu?’ 45 Paykunatanami ninqa: ‘Rasunpaypami nï: Pitapis tsaynö ñakaqkunata mana kuyaparmi noqatapis kuyapäyämashqaykitsu’ ”.†
46 Tsaypitanami Jesús nirqan: “Tsay mana kuyapäkuq runakunaqa imayyaqpis castigashqami kayanqa. Tsaynö kaptinpis Tayta Dios munanqannö kuyapäkuq runakunami itsanqa mana ushakaq kawayta tariyanqa”.†