Jesúsman Zaqueo yärakunqan
19
Tsaypitanami Jericó markapa Jesús päsaykarqan. 2 Tsay markachömi Zaqueo jutiyuq imaykayuq runa tarqan. Paymi impuestu cobraqkunapa mandaqnin karqan. 3 Tsay runami Jesústa reqiyta munarqan. Itsanqa takshalla karmi atskaq runakuna tsapaptin rikayta kamäpakurqantsu. 4 Tsaymi cörrilla puntaskir sicómoro jachaman yarkuskirqan Jesús päsaqta rikananpä. 5 Tsaypa päsaykanqanchömi Zaqueuta rikaykur Jesús nirqan: “Zaqueo, juklla yarpamuy. Wayikichömi kanan patsakushä”.6 Zaqueo juklla yarpaskamurmi pasaypa kushikur wayinman Jesústa pusharqan. 7 Tsayta rikaykurmi runakuna Jesúspä rimar niyarqan: “¡Imanirtä jutsasapa runapa wayinman patsakun!”
8 Wayincho kaykarnami Zaqueo ichirkur Jesústa nirqan: “Taytay, llapan imaykäpita pullan kaqtami muchuqkunata qarashä. Y pipa imantapis qechushqa karqa chusku kuti mastami kutitsishä”.
9 Jesúsnami nirqan: “Kananmi kay wayiman salvación chämushqa. Kay runapis rasunpaypami Abrahampa castan. 10 Oqrakashqakunata ashir salvananpämi Runapa Tsurin shamushqa”.
Jesús y Zaqueo
Wätayninkunata patronnin qellayta jaqipanqan
11 Jesús tsaynö parlanqanta wiyar y Jerusalénman chänanpäna kaptinmi runakuna yarpäyarqan Tayta Diospa mandakuynin qallaykunanpäna kanqanta. Tsaynö yarpäyaptinmi tinkutsiypa Jesús yachatsir 12 nirqan: “Juk imaykayuq runashi karu nacionman aywanä rey kananpä cargu chaskimuq. 13 Manarä aywarshi chunka wätayninkunata qayaskatsir atska qellaytaa jaqipar ninä: ‘Kutimunqäyaq kay qellaynïwan aruykäyay’. 14 Tsaynö nir aywakuptinnashi marka mayinkuna chikirnin qepanta willakuqkunata kachayänä cargu qoqta niyänanpä: ‘Manami tsay runa mandayämaqnï rey kananta munayätsu’.
15 “Tsaynö niyaptinpis rey kananpäshi carguta chaskimunä. Tsaypita markanman kutiykurnashi qellayninpa wachayninta aykata gänanqantapis musyananpä qellaynin chaskiq wätayninkunata qayatsinä. 16 Tsayshi punta chaskiq kaq chaykur ninä: ‘Taytay, qellaynikiwan chunka kuti mastami gänashqä’.
17 “Tsayshi patronnin ninä: ‘Alli wätaymi kanki. Wallkallapitapis qellaynïta miratsinqaykipitami chunka markapa mandaqnin kanaykipä churashayki’.
18 “Jukaqpis chaykurshi ninä: ‘Taytay, qellaynikiwan pitsqa kuti mastami gänashqä’.
19 “Tsayshi paytapis ninä: ‘Pitsqa markapa mandaqnin kanaykipämi qamtapis churashayki’.
20 “Jukaq wätayninnashi chaykur ninä: ‘Taytay, kaychömi qellayniki. Ratashwan piturkurmi churaykurqä. 21 Qamqa mana churanqaykipitami qorinki y mana murunqaykipitami cosechanki. Tsaynö mana alli runa kaptikimi mantsapakur churaykurqä’.
22 “Patronninnashi ninä: ‘¡Qamqa mana yärakuypä wätaymi kanki! Kikikipa shimikipitami juzgashqa kanki. Yaqa kanqäta musyaykar, mana churanqäpita qorinqäta musyaykar y mana murunqäpita cosechanqätapis musyaykarqa 23 ¿imanirtä qellaynïta bancullamanpis churashqaykitsu kutimur wachaynintawan qorinäpä?’ 24 Tsaycho kaykaq runakunatanashi ninä: ‘¡Tsararanqan qellaynïta qechuskir chunka kuti mas gänaq kaqta entregaykuyay!’ 25 Paykunanashi niyänä: ‘Taytay, paypaqa chunka kuti masnami qellayninpis kan’.
26 “Niyaptinshi patronnin ninä: ‘Yärakuypä kaqtaqa mastami kamaripanqa. Mana yärakuypä kaqtami itsanqa ichik tsararanqallantapis qechunqa. 27 Rey kanäta mana munar chikimaqkunataqa ¡kayman apaykamur ñöpächo wanuratsiyay!’ ”
Jerusalénman Jesús yaykunqan
28 Tsaynö yachaskatsirnami Jerusalénman Jesús aywar sïguirqan. 29 Olivos jirkancho Betfagé y Betania markakunaman chaykarnami ishkay discïpulunkunata kachar 30 nirqan: “Taqay markaman aywayay. Charmi pipis manarä muntakunqan ashnu wataraykaqta tariyanki. Tsay ashnuta paskaskir apayämuy. 31 Pipis ‘¿imanirtä ashnuta paskaykäyanki?’ niyäshuptikiqa ‘Señor Jesúsmi ministin’ niyanki”.
32 Discïpulunkuna aywarmi Jesús ninqannölla tariyarqan. 33 Ashnuta paskaykäyaptinmi duëñunkuna tapuyarqan: “¿Imanirtä ashnüta paskaykäyanki?” nir.
34 Tsaynö niyaptinmi niyarqan: “Señor Jesúsmi ministin”.
35 Ashnuta chaykatsir punchunkunata karunaparkuyaptinmi Jesús muntakurqan. 36 Muntashqa aywaptinnami runakuna kushikur punchunkunata näniman mashtayarqan.b 37 Olivos jirkanpita urämunanpä kaykaptinnami milagrukunata rikayanqanpita kushikur tsaytsikaq discïpulunkuna Tayta Diosta llapan shonqunwan alabar qallaykuyarqan. 38 Tsaynö alabarninmi niyarqan:
“¡Tayta Diospa jutincho shamuq rey alabashqa kaykullätsun!†
¡Tayta Dioswan allina kawashun!
¡Ciëluchöpis alabashqa kaykullätsun!”
Entrada Triunfal de Jesús
39 Tsaynami runakunapa chawpincho aywaq wakin fariseukuna niyarqan: “Rabí, qatiräshuqnikikuna upällakuyänanpä niykuy”.
40 Jesúsnami nirqan: “Noqami nï: Paykuna upällakuyaptinqa rumikunapis alabayanqami”.
41 Jerusalénman chaykarnami markata rikaskir Jesús waqar 42 nirqan: “¡Ima allirä kanman Tayta Dioswan alli kawayänaykipä kaqta kanan junaqllapis tantiyakuyaptiki! ¡Tsaynö kaptinpis manami tantiyayankitsu! 43 Tsaymi ñakayänaykipä junaqkuna chämunqa. Tsay junaqkunami marka murällaykikuna waqtanman allpata qotur chikiyäshuqnikikuna jiruruypa atacayäshunki. 44 Wayikikunatapis juchutsirmi wamraykikunatawan wanutsiyäshunki. Manami ni juk rumillapis pirqaraykar quëdanqatsu. Tsaynö kanqa Tayta Dios shamunqanta mana chaskikuyanqaykipitami”.
Jesús Llora Sobre Jerusalén
Templucho rantikuqkunata Jesús qarqunqan
45 Tsaypitanami templupa patiunman Jesús yaykuskir tsaycho rantikuqkunata [y rantiqkunata] qarqur 46 nirqan: “Tayta Diospa palabrancho kaynömi qellqaraykan: ‘Wayïqa runakuna mañakayämänanpämi kanqa’.† Tsaynö nikaptinpis qamkunaqa suwakunapa machayninmanmi tikratsiyashqayki”.†
47 Nirkurnami templupa patiuncho qoyay qoyay Jesús yachatsikurqan. Mandaq sacerdötikuna, ley yachatsikuqkuna y autoridäkunami imaykanöpapis Jesústa wanutsiyta munayarqan. 48 Itsanqa Jesús yachatsinqankunata llapan runakuna kushishqa wiyayaptinmi ima ruraytapis kamäpakuyarqantsu.
Jesús Expulsa a Los Cambistas