Mana ajayaypa Tayta Diosta mañakunantsikpä Jesús yachatsinqan
18
Imaypis mana ajayaypa Tayta Diosman mañakuyänanpä discïpulunkunata Jesús imamanpis tinkutsiypa yachatsirmi 2 nirqan: “Juk markachöshi Tayta Diospita mana mantsapakuq ni runakunatapis mana respitaq juez kanä. 3 Tsay markachöshi juk viüdapis tänä. Payshi tsay juezman kutin kutin aywar ninä: ‘Taytay, quejakunqäta arreglaykallämay’. 4 Tsaynö aywaptinpis juezqa manashi cäsunätsu. Tsayshi yarpachakur shonqullancho ninä: ‘Diospita mana mantsapakurpis ni runakunata mana respitarpis 5 kay viüdapa demandunta juklla arreglashä. Mana arreglaptïqa umäta nanätsirmi imay hörapis kutiykämunqa’ ”.6 Tsaynö willakurmi Señor Jesús nirqan: “Mana alli juez imata ninqantapis shumaq tantiyayay. 7 ¿Manatsurä Tayta Diospis cäsunqa akranqan runakuna paqaspis junaqpis mañakuyaptin? Payqa mana shuyarätsiypami yanapanqa. 8 Noqami nï: Mañakuq kaqtaqa mana shuyarätsiypami Tayta Dios yanapanqa. Tsaynö kaykaptinpis Runapa Tsurin kay patsaman kutimur ¿pillapis Tayta Diosman yärakuykaqta tarinqatsurä?”
Fariseuman y impuestu cobraqman Jesús tinkutsinqan
9 Runa mayinta manakaqman churaq runakunapämi Jesús tinkutsiypa yachatsir nirqan: 10 “Ishkay runakunashi Diosta mañakuyänanpä templuman aywayänä. Jukaqshi fariseo kanä y jukaqnashi impuestu cobraq kanä. 11 Tsay fariseushi ichiykur Tayta Diosta mañakur ninä: ‘Tayta Dios, qamtami agradëcikü wakin runakunanö mana kanqäpita. Paykunaqa suwakuq, jutsasapa y majanta qanrataqmi kayan. Noqaqa manami taqay impuestu cobraqnötsu kä. 12 Noqaqa ishkay kutimi cada semänacho ayunä. Tsaynöpis llapan gänanqäpitami imaypis templuman diezmüta apä’.
13 “Impuestu cobraq kaqshi itsanqa karullacho ichiykur ciëluman rikayllapis rikanätsu. Tsaypa trokinqa pasaypa llakikurshi pëchunta takarrä ninä: ‘Tayta Dios, kuyapaykallämay. Noqaqa jutsasapami kä’.
14 “Noqami nï: Impuestu cobraq runami jutsanpita perdonashqana wayinman kutirqan. Fariseo kaqtami itsanqa Tayta Dios perdonarqantsu. Runa tukuqkunaqa penqakuyman churashqami kayanqa. Qollmi shonqu kaqkunami itsanqa alliman churashqa kayanqa”.
Parábola del Fariseo y el Recolector de Impuestos
Wamrakunapä Jesús mañakunqan
15 Tsaypitanami wamrakunata Jesús kaqman apayarqan umankunata yataykur Tayta Diosta mañakunanpä. Tsayta rikarmi discïpulunkuna michäyarqan. 16 Tsaymi wamrakunata qayaskir discïpulunkunata Jesús nirqan: “Wamrakunata apayämunanta ama michäyaytsu. Wamranö kaqkunapämi Tayta Diospa mandakuynin kaykan. 17 Rasunpaypami nï: Pipis Tayta Diospa mandakuyninta wamranö mana chaskirqa manami paypa mandakuyninman yaykunqatsu”.
Imaykayuq runa ajatarä salvakunanpä kanqan
18 Juk mandaq runami Jesústa nirqan: “Rabí, alli runami kanki. ¿Imatatä ruräman mana ushakaq kawayta tarinäpä?”
19 Jesúsnami nirqan: “¿Imanirtä alli runa kanqäta nimanki? Tayta Diosllami alliqa. 20 Musyankimi mandamientukuna ninqanta: ‘Ama majaykita qanratankitsu.† Ama runa mayikita wanutsinkitsu.† Ama suwakunkitsu.† Ama manakaqkunata pitapis tumpankitsu.† Mamaykita y taytaykita alli rikanki†’ ”.
21 Tsaynö niptinmi tsay runa nirqan: “Tsaykunataqa wamra kanqäpita patsami llapanta cumplishqä”.
22 Tsaymi Jesús nirqan: “Jukrämi cumplinaykipä pishin. Llapan imaykaykikunatapis rantikuskir tsay qellayta muchuqkunata qaray. Tsaynö ruraptikiqa ciëluchömi riquëzayki kanqa. Nirkur qatirämay”.
23 Tsaynö niptinmi pasaypa imaykayuq kar tsay runa llakikurqan. 24 Llakishqa kaykaqta rikarmi Jesús nirqan: “¡Pasaypa ajami imaykayuq runakuna Tayta Diospa mandakuyninman yaykuyänanpä! 25 Imaykayuq runa Tayta Diospa mandakuyninman yaykunqanpitaqa mas rasllami camëllupis awjapa uchkunpa ullkunman”.
26 Tsaynö niqta wiyaqkunami Jesústa tapuyarqan: “Tsaynö kaptinqa ¿pirä salvakunqa?”
27 Jesúsnami nirqan: “Runakunapä aja karpis Tayta Diospäqa manami ajatsu”.
28 Tsaymi Pedro nirqan: “Taytay, noqakunaqa llapan imaykäkunatapis jaqiskirmi qamta qatiraykäyä”.
29 Jesúsnami nirqan: “Rasunpaypami nï: Pipis wayinta, mamanta, taytanta, wawqinkunata, paninkunata, warminta o tsurinkunata Tayta Diospa mandakuynin raykuq jaqirqa 30 kay vïdacho mas atskatami chaskinqa. Tsaynöpis wak vïdacho mana ushakaq kawaytami tarinqa”.
Wanutsiyänanpä kanqanta Jesús yapay willakunqan
31 Chunka ishkay discïpulunkunata qayaykurmi Jesús nirqan: “Jerusalénman chänantsikpä wallkallanami pishin. Tsaychömi profëtakuna qellqayanqannölla Runapa Tsurinta llapanpis päsanqa. 32 Mana Israel autoridäkunapa makinmanmi entregayanqa. Paykunami burlakuyanqa, ashlliyanqa y toqapäyanqa. 33 Asutarkurmi wanutsiyanqa. Tsaynö kaptinpis kimsa junaqtaqa kawarimunqami”.
34 Tsaynö niptin discïpulunkuna manami tantiyayarqantsu ni musyayarqantsu imapä parlaykanqantapis.
Jesús Predice Su Muerte y Resurrección
Jericó markacho qaprata Jesús alliyätsinqan
35 Jericó markaman Jesús yaykuykaptinmi juk qapra runa limushnata mañakur nänicho jamaraykarqan. 36 Atskaq runakuna aywaykäyaqta mayaskirmi tsay qapra tapukurqan ima päsaykanqantapis.
37 Tsaymi willayarqan: “Nazaret runa Jesúsmi päsaykan” nir.
38 Tsaynö niyaptinmi qayakur nirqan: “¡Davidpa Tsurina Jesús, kuyapaykallämay!”
39 Tsaynö niptinmi puntata aywaykaqkuna upällakunanpä ollqutupäyarqan. Ollqutupäyaptinpis masrämi qayakur nirqan: “¡Davidpa Tsurin, kuyapaykallämay!”
40 Tsaymi Jesús ichiykur tsay qaprata qayatsirqan. Ñöpanman chaykatsiyaptinnami tapur nirqan: 41 “¿Imacho yanapanätatä munanki?”
Tsaymi qapra nirqan: “¡Taytay, ñawï alliyänantami munä!”
42 Jesúsnami nirqan: “¡Rikayna! Yärakamunqaykipitami ñawiki rikanqa”.
43 Tsaynö niptinmi jinan höra ñawin kichakaskiptin Tayta Diosta alabaraykar Jesúspa qepanta aywarqan. Tsayta rikaykurmi llapan runakunapis Tayta Diosta alabayarqan.
Sanación de Bartimeo