Jutsaman pitapis mana ishkitsinanpä Jesús ninqan
17
Tsaypitanami discïpulunkunata Jesús nirqan: “Runa mayinta jutsaman ishkitsiqkunaqa imaypis kayanqami. ¡Allaw, pitapis jutsaman ishkitsiq runa! 2 Juk wamrallatapis jutsata ruratsiptinqa mas allimi kanman mulinu rumita kunkanman watarkur lamarman jitarpuyaptin. 3 ¡Tsaynö kaykaptinqa paqtä tsaynö kayankiman!Runa mayintsikta perdonanapä Jesús yachatsinqan
“Runa mayiki mana allita rurashuptikiqa llutanta ruraykanqanta tantiyatsinki. ‘Perdonaykallämay’ niyäshuptikiqa perdonanki. 4 Juk junaqllacho qanchis kuti contrayki mana allita ruraskir qanchis kuti ‘perdonaykallämay’ nishuptikiqa perdonanki”.
Desdicha Hacia Aquellos que Hagan Pecar a Otros
Mas yärakuq kayänanpä mañakuyanqan
5 Tsaynami apostolninkuna Señor Jesústa niyarqan: “Yanapaykayällämay mas yärakayämunäpä”.
6 Señor Jesúsnami nirqan: “Ñäbuspa murunnö ichikllapis yärakuynikikuna kaptinqa kay sicómoro jachata ‘jawapita llukikaskir lamarman jawikay’ niyaptikipis cäsuyäshunkimanmi”.
Wätaynölla kanapä Jesús ninqan
7 “Mayqaykipapis wätayniki arunqanpita o mitsikunqanpita chämuptin manami ‘päsakamuy jamaykur mikunaykipä’ niyankitsu. 8 Tsaypa trokinqa niyanki: ‘Kusinakamuyrä qaramänaykipä. Mikur upur ushanqäyaq sirvimay. Mikuskiptïrämi qam mikunki’. 9 Tsaynö mandayanqaykita ruraykaptinpis manami tsay wätaynikita agradëcikuyankitsu.
10 “Qamkunapis Tayta Dios niyäshunqaykita cumplir niyay: ‘Noqantsikqa Diospa sirviqnin karmi nimanqallantsikta ruraykantsik’ ”.
Leprawan qeshyaykaq chunka runakunata Jesús alliyätsinqan
11 Jerusalénman aywaykarmi Samaria y Galilea lindërunpa Jesús päsarqan. 12 Juk takshalla markaman chäyänanpä kaykaptinmi leprawan qeshyaykaq chunka runakuna tinkupäyänanpä yarquyarqan. Manarä charmi karullapita 13 qayakur niyarqan: “Tayta Jesús, ¡kuyapaykayällämay!”
14 Paykunata rikaskirmi Jesús nirqan: “Rikayäshunaykipä sacerdötikunaman aywayay”.
Aywaykällarnami alliyaskiyarqan. 15 Alliyäyanqanta tantiyaskirmi juk runallana Tayta Diosta jinchi alabaraykar Jesús kaqman kutirqan. 16 Chaykurnami urkunpis patsaman chanqanyaq Jesúspa ñöpanman qonqurikuykur nirqan: “¡Päkillä, taytay!” Tsay runaqa Samariapitami karqan.
17 Jesúsnami nirqan: “Alliyaqkunaqa ¿manaku chunkaq kayashqayki? ¿Maytä wakin kaqqa? 18 Kay jäpa runallami Tayta Diosta agradëcikurnin kutimushqa”.
19 Tsay runatami nirqan: “Sharkur aywakuy. Yärakamunqaykipitami Tayta Dios alliyätsishushqayki”.
Tayta Diospa mandakuynin imay chämunanpä kanqanta Jesústa tapuyanqan
20 Juk kutimi fariseukuna Jesústa tapur niyarqan: “Tayta Diospa mandakuynin ¿imaytä chämunqa?”
Jesúsnami nirqan: “Tayta Diospa mandakuynin chämunanpäqa manami ima señaltapis rikayankitsu. 21 Manami pipis ninqatsu ‘kaychönami’ o ‘wakchönami kaykan’. Tayta Diospa mandakuyninqa qamkuna kaqchönami kaykan”.
Jesús manarä kutimuptin imanö kananpä ninqan
22 Tsaypitanami discïpulunkunata nirqan: “Shamuq watakunachömi Runapa Tsurin juk junaqllapis mandaq kanqanta rikayta munayanki. Mayjina rikayta munarpis manami rikayankitsu. 23 ‘Kaychömi kaykan’ o ‘wakchömi kaykan’ niyäshuptikipis ama cäsuyankitsu ni rikaqpis aywayankitsu. 24 Illaqukuptin ciëlupa juk kuchunpita jukaq kuchunyaq atsikyanqanta rikayanqannömi Runapa Tsurin kutimuptin llapanpis rikayanqa. 25 Tsaykuna manarä kaptinmi kanan witsan runakuna payta chikirnin pasaypa ñakatsiyanqa.
26 “Noé kawanqan witsan runakuna kawayanqannömi† Runapa Tsurin shamunqan witsanpis kawayanqa. 27 Arcaman Noé yaykunqan junaqyaqmi runakuna mikur, upyar y majatsakar kayarqan. Tsaynö kaykäyaptinmi diluviu shamur llapan runakunata ushakätsirqan.
28 “Tsaynöllami Lot kawanqan witsanpis† runakuna mikur, upyar, rantir, rantikur, murupakur y wayitapis shäritsir kayarqan. 29 Sodoma markapita Lot yarqunqan junaqmi azufriyuq nina ciëlupita tamyamur llapan runakunata ushakätsirqan. 30 Tsaynöllami kanqa Runapa Tsurin kutimunqan junaqpis.
31 “Tsay junaqqa wayi janancho kaykaqkunaa imaykantapis jipiq ama wayinman yaykuyätsuntsu. Chakracho kaykaqkunapis ama wayinman kutiyätsuntsu. 32 ¡Yarpäyay Lotpa warminta ima päsanqantapis!† 33 Kawayninta salvayta munaqkunaqa kawayninta oqrayanqami. Kawayninta oqraqkunami itsanqa kawayninta salvayanqa.b †
34 “Noqami nï: Tsay paqasmi juk cämallacho ishkaq punuykäyaptin jukaqta apanqa y jukaqtana jaqinqa. 35 Maraycho ishkaq warmikuna aqakuykäyaptinmi jukaqta apanqa y jukaqtana jaqinqa. 36 [Ishkaq runakuna chakracho aruykäyaptinmi jukaqta apanqa y jukaqtana jaqinqa]”.
37 Tsaynö niptinmi tapur niyarqan: “Taytay, ¿maychötä tsayqa kanqa?”
Jesúsnami nirqan: “Maychöpis wanushqakuna jitaräyanqanmanmi wiskurkuna qorikäyanqa”.c